المشاركة الأصلية كتبت بواسطة blade2011
هوة ياباشا بجد موضوع جامد جدا بس ممكن يكون 43 الف كتير شوية عليا الوقتى يعنى كقيمة وديعة + مقدم عربية لانى هادفع 38500 بالعافية وبعدين القسط كتير بردة شوية عليا 1300 + كمان انا ناوى اكيش ان شاء الله اخر اربع سنين عشان ارتاح فعلا بس مش الوقتى لانى ممكن اكون مزنوق شوية السنة دى والفترة دى لكن بالنسبة ليا انا عاوز ادفع قسط قليل شوية عشان اقدر اكيش الباقى ان شاء الله بدون مقاطعة على اخر السنة عشان اخلص بجد بس هوة حوار من الاخر جامد يعنى بس لظروفى صعبة كمان شروط بنك ناصر شوية مجحفة ومقرفة وشكرا اوى على مساعتدك ليا بجد المهم هيا الانوس لونها اية وعاملة معاك اية بجد ؟
|
لأ ياباشا مفيش مشكلة انا بس بحكيلك تجربتى مع شراء العربية وده لأنى لفيت كتير على كذا بنك وموضوع الاستعلام عن الدخل مع المهن الحرة الفترة ديه كانت شروطه صعبة جدا نظراً لظروف البلد اليومين دول وخوف البنوك من تعثر العميل وعدم الانتظام فى السداد وكده يعنى .... المهم لقيت بنك ناصر بدون استعلام اصلا وفكرة الوديعة دى هى الضمان مع فويدها اللى بتغطى فوايد اقساط العربية فتوكلت على الله على طول وزيك برضه ناوى ان شاء الله اكيش اخر سنتين او تلاتة حسب التساهيل .... عموما اسأل على موضوع تكييش العربية ده فى البنك اللى ناوى تتعامل معاه لأن انا كنت بسأل على النقطة دى وأفاجا بشروط عجيبة من البنوك زى مثلاً انهم بياخدو نسبة من فايدة السنوات الكاش (اللى انت اساسا خلاص مش مقسط ها وهتكيشها) زائد رسوم وبنوك تانية بتحطلك الفايدة متناقصة فبتلاقى نفسك بتدفع معظم الفايدة اول سنة وباقى السنين يخصمولك فايدة ضعيفة جدا ((( برضة على فكرة بنك ناصر بيخصم الفايدة مباشرة على السنوات المسددة كاش 6% فى عدد السنين ))) وعلى فكرة انا مش بشكر في بنك ناصر قوى يعنى لأن معاملتهم مش قد كده وفيه موظفين هناك كانو هيخلونى احرم اشترى عربية اساساً بس انا استحملتهم علشان الظروف اللى قلتها وبعد استلام العربية التعامل معاهم انعدم تقريبا الا فى سداد القسط كل شهر ودى حاجة مبتخدش دقايق.
بالنسبة للعربية لونها فضى وده اخترته علشان الالوان الغامقة فى الحر بتاعنا ده مقرفة وكمان التراب والخرابيش بيبانو فيها بسرعة ... لكن اللون الفضى الصراحة جميل جدا (( ديه أراء -- أرااااء)) مبيلمش تراب والخربيش الصغننة مبتبانش بسهولة .
العربية ما شاء الله زى الفل وانا عموما مشاويرى بيها مش كتير ونعمه العربية الزيرو وكل حاجة شغالة بدون مفاجأت ولا أعطال خفية الصراحة متعة .... العيب الوحيد فى العربية الصراحة صوت الموتور العالى شوية وان شاء الله يتظبط شوية بعد صيانة ال 5000 ومع الوقت زى الزملاء هنا ماقالولنا كمان هيا مش واطية قوى ومش عالية قوى فمع الحرص فى المطبات مبتحكش
عموما التقفيل وتشطيب العربية من الداخل لا بأس به (( متقارنش نفسك باللانسر والكورولا والا هتتعقد --- قارن نفسك بالمستعمل واللى بدون تكييف ولا باور هتحس بالنعمة اللى بين ايديك ))