كنت مسافر من الإسكندرية للقاهرة و كان الوقت بالليل و العربية كانت لسة زيرو و كان بقالى كام سفرية شوشو عمال يوسوس ليا إنى أقفل العداد رغم إنى كنت بمشى 120
المهم لقيت بى إم الفئة الخامسة مستعجل و عمال يقلب نور قمت شديت معاه و طلعت منه و بعد كده هو طلع منى فأخدنى الغرور بالعربية و قلت يعنى هو هايمشى أكتر من 180 و حتى لو وصل ل 200 أنا معاه
المهم طفيت التكييف علشان أجمع بسرعة و أخدت اليمين علشان هو كان ماسك الشمال ووصلت ل 175 و عديت منه لغاية أختفى من المراية
و فجأة لقيت الأسفلت الغامق و عين القطة إختفوا و بعد ثانية و احدة لقيت قدامى حاجات حمراء فعليت النور لأكتشف أن الطريق بيضيق حارتين من اليمين و قافلينه ببلوكات خرسانة و قاموا مشكورين بوضع علامات حمراء عليها
و فى جزء من الثانية: فرامل على قد ما قدرت نزلت سرعتى لحوالى 90 ثم سبت الفرامل خالص و أخدت شمال و الحمد لله دخلت الطريق بس بعدها لقيت صاحبنا ورايا بيقلب نور قمت زى الباشا منور إشارة يمين و خليته يعدى مع ألف سلامة
الدروس المستفادة:
1- بلاش مكابرة فى السرعة لإن السرعة مالهاش كبير
2- 120 , 140 , 180 كله بيوصل ... المهم مين يوصل بالسلامة و مين يوصل كفتة
3- ما تجريش أبداً على طريق مش حافظة صم و خصوصاً بالليل
4- أوعى تفرمل قوى مع لف الطارة بدرجة كبيرة و خصوصاً لو على سرعة عالية لإن العربية ممكن تلف منك أو تتقلب
كفانا الله و إياكم شر الطريق