السلام عليكم ورحمه الله وبركاته
كل عام وانتم طيبون اخواني
لعل الله وجهني اليكم لما فيكم من خير واهل كلمه ورأي
طبعا انا هتكلم شويتين كده ويمكن يكون كلامي قديم حبتين لكن نعمل ايه بقا هو دا قدر الناس الخدومه اللي موجوه هنا ودايما تقع في الناس اللي زينا كده وغرقانين في شبر ميه
مش حابب اتكلم كتير علشان يبقي الكلام في صلب الموضوع
انا مواطن مصري من الطبقه العاديه وبقالي حوالي 15 سنه نفسي اشتري عربيه لان انا مش من القاهره بس شغال في القاهره وساكن فيها وبسافر كتير وشغلي مش قريب من سكني وعندي 4 اولاد ربنا يخليهم ليا
طبعا هما مش صغيرين ودارت الايام ومشيت السنين وتلاقت رغبتي القديمه في شراء سياره مع طموح الشباب اللي عايز يركب عربيه اليومين دول
طبعا ما باليد حيله لكن الحمد لله كان عندي حته ارض بعتها وكنت محوش قرشين كده علي مكافأه نهايه الخدمه علي دهب ام العيال ممكن اوصل كده ل 75 او 85 الف
وطبعا اللي اتحرمت منه 15 سنه مش عايز احرم عيالي منه خصوصا بعد ما كبروا
المهم انا نويت فعلا اشتري عربيه ......................... .......................
لكن والله طلع قرار الجواز اسهل من شراء العربيه .. لقيت نفسي داخل في دوامه ياباني وكوري وصيني وكل واحده فيهم فيها قواميس
وبعدين قلت ياباني لقيت نفسي حيران 1300 ولا 1400 ولا 1500 ولا 1600
وايه حكايه الحصنه الكتير دي مع العلم ان العربيه في الغالب هتتعب معايا ومع ولادي كتير وخصوصا اننا هنسافر بيها كتير
حاولت استقر علي حاجه لقيت نفسي بتسأل ايه هي عوامل الامان المطلوبه ليا
وهل مطلوب الرفاهيه بالنسبالي
ثم هل هاتشباك ولا سيدان
طيب ياباني ولا كوري
طيب قسط ولا كاش
طيب هل هتفرق الانتشار والكلام دا معايا ولا اجيب اللي هيريحني وخلاص
طيب صني ولا اكسنت ولا افيو ولا ياريس ولا ريو ولا اوبترا ولا لانسر ولا فيرنا ولا في حااااااااااااااااجه تانيه احسن انا مش عارفها
وتقفيل مصري ولا كوري ولا ياباني
موديل 2011 ولا 2012 ولا مستعمل
وايه العربيه اللي فيها عوامل امان اعلي وافضل من حيث الثمن اللي اقدر عليه
والعفشه اعرف ازاي انها ممتازه
والماتور 1300 ولا 1600
واي عربيه حمار شغل ومش مهم اوي الرفاهيه بس يكون شكلها محترم
مع العلم ان العربيه يمكن تموت معانا يعني مش هنفكر نبيعها خالص
بس بحاول اوصل لانسب شكل مع قوه الماتور وصلابه العفشه وعوامل الامان وفي الاخر خالص ممكن نقول الرفاهيه
بـــــــــــــــصراحه تعبت جدا جداااااااااااااااااا
......................... ................... بعد كل التفكير دا ظهر ليا واحد صاحبي وقالي
ما تخليك في المستعمل وهاتلك ماتور من بورسعيد
طبعا الكلمتين دول مسحوا تفكير 4 شهور في ايه اللي ينفع في الجديد
اناااااااااااااااااا مش هطول عليكم
لكن بالله عليكم ساعدوني ازاي اختار عربيتي الجديده خصوصا ان انا لا اعلم شئ عن العربيات ومش عارف ازاي اختار
فبالله عليكم بحق هذه الايام المفترجه لا تبخلوا عني بالمشوره