[sh_masry]

جه الوقت اللى احكيلكم فيه على اول خبطه بألألانترا حبيبتى ...... من حوالى 3 اسابيع كده كنت ماشى فى امان الله و معايا مراتى و راجعين البيت و كانت الساعه حوالى 6 مساءا و كنا فى طريق مصر-الأسماعيليه و السكه زحمه و حاجه اخر قرف ..... المهم طلع فى دماغى انى ابعد عن الطريق ده و ادخل من مدينه السلام - و طلعت و للا سلام و للا امان حتى - المهم لقيت برده السكه زحمه و العربيات واقفه فوق بعضيها و انا واقف جنبى عربيه ميكروباص على الناحيه الشمال و هــــــــــــــب اسمع صوت خبطه جامده فى عربيتى و رجه عنيفه ..... طبعا انا من النوع اللى مش بتصدم على طول و رد فعلى بيبقى هادى علشان اعرف اتصرف ...... المهم نزلت واحده واحده من العربيه و ابص الاقى فيسبا مرميه على الباب الورانى الشمال و السواق بتاعها تقريبا لابس فى الميكروباص ,,,,,يعنى ابن الذينه نط من الفسبا قبل ما تخبطى و هو لبس فى الميكروباص اللى واقف جنبى.......... قوم انا بقى اعمل ايه علشان اخد حقى من العيال البلطجيه دى و بالذات انى معايا مراتى و مش عايز بهدله لا ليا وللا ليهم ؟؟؟؟
اول حاجه رحت واخد المفتاح بتاع الفيسبا .......
تانى حاجه رحت مزعق فى الواد بتاع الميكروباص و واخد رخصته و طبعا ده مش سهل علشان تخليه طلع رخصته من جيبه كده و بالذات انه عمال يقولى طب و انا ذنبى ايه و انا مالى و الكلام ده و هو فعلا مالوش اى علاقه بالحادثه .... و هاقولكم انا عملت كده ليه بعدين ......
المهم رحت على الواد بتاع الفيسبا و قولتله هاتدفع حق التصليحات و للا اشيل الفيسبا معايا فى شنطه العربيه و اتصرف فيها ..... قام قايلى شوف عايز ايه و انا اب لعيال و انا مش عارف ايه ,,, المهم قلتله و انا مايمنيش الكلام ده كله عيالك تتشرد عيالك تضيع مش مشكلتى و اصل انا كمان مالاقيتش العربيه فى الشارع ..........
المهم من هنا لهنا و طبعا بتاع الميكروباص عمال يتحايل عليا و يقولى طب انا عايز امشى و السكه مشيت و انا ماليش ذنب .... المهم لقينا واحد سمكرى بالصدفه معدى و بيقول دى تتصلح ب 200 جنيه .... بصيت للواد بتاع الفيسبا و قولتله : طبعا ده سمكره بس و لسه الرش . بس عموما انا هاخد تمن السمكره بس .
قالى خد 100 جنيه اهيه و مافيش غيرها رحت واخدها طبعا و هب بلاقيه بيطلع تليفون محمول علشان يعمل مكالمه هب رحت شائط منه التليفون و قولتله ادى كده الحسبه مظبوطه و طبعا كان بيولول على التليفون و رحت لبتاع الميكروباص و قلتله عايز تمشى هاتلى حقى من الراجل ده و انا امشيك ........
عنك و لاقيت بتاع الميكروباص قلب على الواد بتاع الفيسبا و بيقوله خلص يا عم و طلع بقيت الفلوس و الا هاروح فيك فى داهيه ..... و طبعا انا مبسوط لأنى جبت بتاع الميكروباص علشان يبلطجوا على بعضيهم و ابقى انا فى السليم ;-) عرفتوا بقى ليه خدت رخصه سواق الميكروباص بالرغم انا ماجاش جنبى ؟؟؟ ههههههه................ز و طبعا الواد بتاع الفيسبا طلع ال100 جنيه التانيه قمت مديله مفتاحه و موبايله و رجعت لبتاع الميكروباص الرخصه و كلنا كنا مرضيين و مبسوطين ..............
هو ده المنطق اللى تعرف تعيش بيه فى مصر , و اللى مالوش بلطجى يشوفله بلطجى يتبلطج على حسه ههههههههههه