[Nissan]

فكرت اعمل موضوع اتناقش مع أعضاء المنتدى فى إنت بتصلح عربيتك فينأ؟ مهتم بالصيانة ولا بتعتبرها فلوس ع الفاضى؟
من غير كلام للدعاية و الزيطة و الزمبليطة الصيانه مهمة جدا جدا لعربيتك و أسأل مجرب ولا تسأل طبيب و فى الموضوع هنا أى موقف ليه علاقة بالموضوع هحكيه عشان تستفيدوا من أخطاء غيركوا

كل يوم بتجيلى عربية ( معكوكة ) فى ورشة برة و العميل لما غلب و تعب ولف على رجليه الكرة الأرضية أخيرا فكر يروح التوكيل و هنا الكارثة لما بيكتشف إن فى ممشكلة مكلفة جدا جدا فى العربية كان فى غنى عنها لو إلتزم بالصيانة الدورية و حل المشكلة من بدايتها فى مركز الخدمة المعتمد او التوكيل

النهاردة عربية جاية على ونش مش دايرة سألت العميل إية اللى حصل قالى المفتاح وقع منى إتكسر و العربية مش بتدور و فعلا ألاقى ال ترانسبوندر اللى فى المفتاح مش موجود طلبت اعمل مفتاح للعميل وافق لكنى سألته حرتك حاولت تعمل فيها حاجة أو وديتها عند حد قالى لأ أول لما المفتاح وقع جيبتها علطول
و اكتر كلمة بتخنقنى أول لما المشكلة حصلت جيبتها علطول المهم جيبت المفتاح و عملت عملية التكويد و دارت العربية بس المفاجئة غن العربية دايرة 2 سلندر فقط و بالكشف تبين إن العربية محتاجة كنترول محرك ( كمبيوتر) و فى أثر لعب فى الضفيرة و ده اللى طير الكنترول جيبت العميل و شرحتله الموقف و فاجانى إن كهربائى بص عليها و قالى دور و العميل مصمم غن الكهربائى معملش حاجة
الراجل كدة هيحتاج كنترول و إمبولايزر و كمان مفتاح جديد و كل ده عشان عك بره و راح لناس مش فاهمة


و واحد تانى عايز يكشف على إضاءة لمبة الABS ركبت العربية عشان أدخلها الورشة و دوست فرامل و دورت و جيبت ال D و الأقى تزنيدة ماشوفتش زيها فى حياتى كلها قلت اخد لفة بالعربية و أحس إنى راكب كركة و بردو العداد صغير مش كبير تقريبا كان 40 ألف كم و قبل ما أدخل الورشة فتحت الكبود و كان شىء متوقع العربية عاملة حادثة و عايزة صدر و قواعد و أكيد بلى و صرر و غيره و غيره المشكلة غن العميل بيقول إن العربية مش عاملة حادثة ولا حاجة و طبعا رفضت دخول العربية بالمنظر ده عشان كان عامل شغل عك و كمان مش عايز يسهل علينا الأمور و بيقول إنه معملش حادثة

عارف إنه رغى و كلام ممكن مايستهويش ناس كتير بس النقاش فى قصص العملاء و التوكيل مفيد للعملاء و كمان للتوكيل

مستنى مشاركتكم و كمان مستنى مواقفكم فى مراكز الخدمة و التوكيلات

شكرا على سعة صدركم