تعرفي حضرتك - نفس طريقة الردود دي هي اللي خلت الواحد يحرم يعلق علي اي حاجة ذات طابع ديني او سياسي
عارفه ليه : لان لازم الموضوع ينتهي بفتوي - وهوب - لو انت مش معانا في الكلام -يبقي انت خرجت من الملة يا باشا - وهاتندم اشد الندم علي ارائك المارقة يا فاسق
معلش يعني - انا هاسأل شوية اسئلة - ومش عايز اجابه - بس هي طريقة لتوفير الوقت علشان ماكتبش 3 صفحات - وبالمناسبة مش هاتكلم في الدين لان مش شايف ان في اي علاقة بين الموضوع والاجتهادات الفقهية
1- هوا القواعد اللي حضرتك قولتيها - مايعرفهاش الامام الاكبر للمسلمين السنه شيخ الازهر لما قابل ساويرس و ساويرس قبل يده -
ولو ده انسان حاقد وكاره الخ الخ
الم يكن شيخ الازهر - امامنا الاكبر - اولي ان يحذرنا و يحدثنا عن الولاء والبراء
2- تعميم الكلام - والخلط بين (المؤمنين والصحابة والتابعين) - و(المسلمين)
هو في الواقع تعميم مضلل
يعني بالبلدي كده - فيه مسيحيين انا ائتمنهم علي حياتي
وفيه اخواتنا من المسلمين - رزعوا دماغ خالد سعيد في رخام السلم حتي الموت
ومنهم كانوا قناصة في التحرير
ومنهم كانوا بيعلقوا الناس في السقف زي الدبايح
فمعلش يعني - الكلام اللي علي الصحابه والتابعين - مش علي الناس بتاعة دلوقتي اللي - بلاش احدد نسبة مئوية - لحسن نزعل من بعض- حدث ولا حرج
نصب وكدب ونفاق وشهادة زور واكل اموال الناس بالباطل الخ الخ
3- 10 سنين مع الراجل ده تثبت هو مين
لو كان حاقد او كاره او او - كان اكيد ظهر- كان اقل شئ ماكانش اكتر من 80% من موظفين شركاته مسلمين - وبلاش والنبي الرد الجاهز من نوعية
- مايقدرش لانها سياسة دوله, لا ياسيدي يقدر بحكم حجم امواله وعائلته
- مايقدرش علشان مش هيلاقي كفاأت - هاقول لحضرتك قديمه - ماكل شركات السلف والاخوان ماشيه بيهم بس - وبرضه عشان ماحدش يزعل - شركة فريش للاجهزة الكهربائية مافيهاش ولا مسلم في اي فرع او موقع عمل في الشركه بالكامل
4 - ليه الكلام اتحول من نقاطعه - ل نقاطعهم ؟؟
مش دي كراهية الاخر اللي ما بتصدق تعبر عن نفسها في اي وقت وباي حجه
افترضي انه غلط (لوحده) - يبقي نقاطعهم !!!!!!!!!
من الاخر اسهل شئ - ان نتحمس و ننفعل - ونكره
بس الاصعب ان نتروي و نفكر ونسامح ونعذر
واللي اعرفه ان رفعة شان الدين في سمو اخلاق افراده وليس بقوة سلاحهم او تعصبهم
والله علي ما اقول شهيد