للمـوظفيـن فقـــــط !!!!!!!!!!!!!
السلام عليكم ورحمة الله وبركاته
الموضوع ده خاص بالموظفين سواء قطاع عام أو خاص أو غيره لو فيه (المهم الناس اللى بتنزل تروح الشغل كل يوم فى مواعيد محددة وترجع بمواعيد محددة)
كلنا بننزل الصبح (من الساعه 7 الصبح لـ 10 تقريباً) طبعاً كله بيركب عربيته أو أتوبيس الشركة أو مواصلات علشان يروح الشغل
وطبعاً الدنيا بتتزحم لأن كلنا رايحيين الشغل
ونفس الكلام فى الرجوع (من الساعه 3 العصر لـ 6 تقريباً) معظمنا بيرجع من الشغل فى المواعيد ديه
وبرده الدنيا بتتزحم علشان كلنا راجعيين من الشغل
المشكلة بقى أن معظمنا برده لما بيروح الشغل:
1- مابيشتغلش أساساً
2- بيشتغل ساعتين تلاتة بالكتير على مدار اليوم كله
وده ممكن نلاحظه من الآتى:
- أنت نفسك " بتشتغل أد أيه؟ "
- شوف اللى قاعدين ع النت وهما المفروض فى شغلهم
- اللى بيتكلمو فى الموبايل طول النهار أو معظمه
- اللى بيعملوا شات مع أصدقائهم
- وغيرهم وغيرهم من اللى بيسلوا نفسهم أو بيضيعوا وقت
طيب ليه بننزل كل يوم الصبح نزحم الدنيا والطرق والمواصلات والأسم " رايحين الشغل " وآخر النهار " راجعين من الشغل "
ليه الشغل مايبقاش بالكم (الإنتاجية) يعنى الساعتين اللى بتخلص فيهم شغل اليوم كله - تخلصهم فى أى وقت (لا ترتبط بميعاد ذهاب ولا عوده)
أو مثلاً تخلصه فى البيت لو ينفع (على جهاز الكمبيوتر الشخصى وتبقى توديه الشغل وترجع فى أى وقت متاح)
أو حتى يبقى شغل الأسبوع كله تخلصه وقت مانت عاوز فى يوم فى يومين فى ساعه (المهم يخلص فى المواعيد المطلوبة)
متهيألى أن ده لو حصل هيختفى سبب كبير ومباشر لأزمة الطرق فى مصر وكمان أزمة البطالة المقنعه.
|