والله تسلم أيدك يا احمد يابدر ده انا امبارح دخت دوخة الأرملة على معاش جوزها علشان الاقى حكاية جمال والثورة دى بالذات
وخصوصا ان البيت عندنا كان محاصر
المقالة (14 )
سلم نفسك البيت كله محاصر
مندوب شرطة غبى من مدينة سمالوط (احد مراكز المنيا /قبلها مباشرة ب 25 كيلو ) هرب منه مسجون ومتفهموش اتعفرت والا جات له حالة نفسية والا حصل ايه ؟؟؟؟
راح طالع على محطة قطار سمالوط و......طيخ .......طاخ ....وضرب كام طلقة عشوائى عور حوالى 15 وموت حوالى 12 منهم حوالى 3 اقباط (البيانات الرسمية انه موت 1 وعور 5 ) لكن بعد البحث عرفت ان الموضوع اكبر شوية وربما اكون غلطان
المهـم
كانت نتيجة الكلام ده ايه ؟؟؟؟
اتـقـلبت الدنيا
ليه لان المتوفين فيهم أقباط (مش لان المتوفين كلهم مصريين وبنى آدمين )
وحدثت تحقيقات واسعة وانقلبت مديرية أمن المنيا رأسا على عقب
وقال احد الضباط جملة غريبة / يعنى هو مكانش قادر يموت المسلمين بس ....لازم يوجع دماغنا (بناء على كلام المسلمانى فى برنامج الطبعة الأولى )
أيه الغباء ده
وأيه الحساسية دى
جيرانى كثير منهم اقباط وليس بيننا الا كل خير وسلام وبعد ذلك كل منا مشغول فى امور حياته الخاصة وخصوصا ان المعيشة فى مصر صعبة
ازاى قاتل هينقى وهوبيضرب نار عشوائى
وليه الحساسية الضخمة دى لدرجة ان بيتنا والشوارع المؤدية اليه والمحيطة به كانت محاصرة بقوات الأمن المركزى والمباحث والمخبرين ومأمور قسم الزيتون شخصيا كان جالسا فى الشارع ورئيس المباحث
واكثر من 10 عربيات أمن مركزى غير الجنود المنتشرة ومعها العصى الضخمة
طيب ليه كل ده ؟؟؟؟؟؟؟
مش لان انا فى البيت طبعا ومطلوب بسبب لسانى الطويل
ولكن
لان جنازة الاقباط المتوفين فى حادث القطار سيتم الصلاة عليها فى الكنيسة الملاصقة للبيت
ومن الصباح الباكر وحتى الو احدة من ليلة امس والمنطقة فى حالة حصار
أيه ده ؟؟؟
احنا جرى لنا أيه ؟؟؟؟
لا انسى ابدا الست أم عياد جارتنا ولا اعرف اين هى الأن
كانت ست كويسة جدا وطيبة جدا
وكانت أمى رحمة الله عليها (بسبب تأخرى بعد المدرسة للعب الكرة) تـنـتـظرنى على باب البيت بالعصاية وكانت ام عياد تاتى على صوت صراخى وتحوش عنى ثم ينسونى هم الاثنين وهااااااااااات ياكلام وهزار
ثم تنصرف كل واحدة منهم الى بيتها وفى المساء كانتا تجتمعان ولايزال اثر العصا مؤثرا على جسمى ويؤلمنى وهما يتحدثان ولا كأن فى واحد انضرب ونسيونى تماما ويتكلمون فى كل شىء واى شىء
طبعا أمس كان شارعنا هادئا اكثر من هدوئه المعتاد وخرج بعض الجيران وان كان الخروج والدخول قليلا لان السادة الضباط والجنود والأمناء كانو يجلسون او يقـفـون فى اى مكان وعلى باب بيتنا كانت موضوعة ترابيزة يجلس عليها بعض الضباط بغض النظر عن ان ده مدخل بيت يعيش فيه بنى أدمين يريدون الدخول والخروج
ونظرا لان بينى وبين المشاكل مغناطيس قوى فآثرت السلامة ولم أخرج
ما أفهمه ان كلنا مصريين ولن يسعنا الا بيتنا (مصر) ومن خرج من داره ..... سواء بقى كان مسلم او قبطى فسيقـل مقداره لانه ليس من اصحاب البلد الذى سيذهب اليه
طيب ليه بنعمل كده ؟؟؟؟
اشمعنى فى الكورة وفى المدرجات لاتعرف المسلم من القبطى
اشمعنى فى المواصلات والزحمة والشعبطة لاتعرف المسلم من القـبطى
اشمعنى فى طابور العيش لاتعرف المسلم من القبطى
اشمعنى فى طابور بنزين 80 لاتعرف المسلم من القبطى
اشمعنى......
واشمعنى ............
واشمعنى ......
فوقو يامصريين
هناك ذئاب تراقب الملعب من المدرجات وتنتظر لحظة احتساب اى فاول لتـنـقــض على الملعب بمن فيه وليس العراق ولا السودان ولا لبنان منا ببعيد
ولكن مصر هيا اللى عليها العين والنية
مصر بلدنا كلنا
لا احنا كمسلمين ضيوف عند حد ......... اى حد
ولا هما كأقباط اسمهم (آخر ) هذه الكلمة الغبية التى يرددها الكثيرون بلا وعى وكل شوية يطلع واحد اهبل ويقول التعايش مع الآخر والتعامل مع الآخر
ايه الجهل ده
مين قال انهم (اخر) بل هم زيهم زينا مع الفارق ان لهم حق الحماية علينا
تصورو
لانهم اقلية ولذلك يجب ان نحميهم وشرعا لايدخلون الجيش ولا الشرطة حتى لايتعرضو للقتال والموت ويقل عددهم اكثر مما هم اقلية ولذلك للحفاظ عليهم لايدخلون الجيش والشرطة فى مقابل دفع مبلغ معين يعفى منه الفـقـراء منهم والغير قادرين
هذا المبلغ الذى يعفى منه غير القادرين هو (الجزية) واللى كتير فاكرين انها فردة (بكسر الفاء ) او أتاوة لكنها مقابل عدم دخول الجيش والشرطة والحماية لهم
اه والله العظيم ده كلام شرعى
وانا اتحدى
لو أعلنت الحكومة دفع رسوم معينة مقابل عدم دخول الجيش لاى فرد من افراد الشعب
فلن تجد احدا يدخل الجيش
بعد ان كان شرفا وواجبا وطنيا وشرعيا
ومع ذلك الغيت هذه الجزية الأن لانهم يدخلون الجيش والشرطة وغيرها من المناصب
عجيبة
لابد ان يعلم الجميع
اننا مصريون وهذه الحساسية يستغل فيها شوية عيال لافاهمين دين ولاشرع من الجانبين
فهم مننا واهلنا وجيراننا واخواتنا
وانا شخصيا من المعجبين بذكاء البابا شنودة وحنكته السياسية
وحين سألوه سؤالا عن كيفية التعامل مع الأخر
فقال / الاقباط ليسو آخر بل هم جزء من نسيج الشعب المصرى
واذكر عم فايق كراس
فاكرينه؟؟؟؟
قال لى حين قابلنى بعدها وقال لى مازحا / بس يا اخى ابونا مقالش احنا الفـتـلة اللى بالطول والا اللى بالعرض فى حتة القماش دى.........ههههههههههه
اللهم اجعل مصر سخاءا رخاءا وبلدا أمنا
اللهم أمين ....أمين ....أمين