[Komy]

بسم الله الرحمن الرحيم

إن شاء الله تقرر عمل ثانى مقابلات طنطا بتوجيهات من السيد حازم بك خضر وقد تفضل سيادته بطرح فكرة الموضوع وجارى أخذ موافقات السادة النواب أعضاء مجلس الشع!!!! إيه ده إيه اللى انا بقوله ده.

بإذن الله يا جماعة هنعمل تانى مقابلة لرجالة طنطا والدلتا عموما,
والدعوة مفتوحة طبعا للجميع .

إن شاء الله المقابلة المرة دى بقترح تكون فى مكان Indoor علشان البرد وكده وأنا بقترح تكون فى أبوسلامة كافيه على الطريق السريع وفيها مكان للركن وبعيدة عن جوة البلد برضو.

وصف الطريق كالأتى:
بالنسبة إلى القادم من القاهرة يسلك الطريق الزراعى الى ان يصل طنطا اسفل الكوبرى العلوى المتقاطع مع الطريق من اعلى ثم يستمر فى السير الى ان يجد اول يوتيرن ويعود فى الاتجاه الأخر الى ان يجد كوبرى مشاه صغير عنده سيجد الكافيه على يمينه ويركن.

بالنسبة الى القادم من الأسكندرية بعد ان يصل الى مدخل طنطا الاول يستمر فى السير الى ان يجد كوبرى المشاه ايضا ويركن برضو .

بالنسبة الى القادمين من المحلة والمنصورة عليهم بأخذ طريق السريع بإتجاه الأسكندرية ويكملوا مع وصف طريق القادمين من القاهرة .

القادمين من زفتى والسنطة وميت غمر يأخذوا ايضا إتجاه الاسكندرية ويكملوا مع وصف طريق القادمين من القاهرة .

اما بالنسبة للميعاد انا بقترح إنه يكون يوم جمعة برضو بس ممكن يكون يوم
21 / 1 / 2011 على اساس إن الجمعة الجاية يوم 7/ 1/ 2011 اولا عيد الاخوة المسيحيين اعاده الله عليهم بالخير , ثانيا هيكون اول يوم من اليومين بتع الجولة النهائية من جولات اوتو كروس وطبعا فى ناس هتروح وإن شاء الله انا أولهم .

اما الجمعة اللى بعدها هتكون موافقة لفعاليات معرض فورميولا الأهرام اللى برضو فى ناس رايحاه وانا منهم باإضافة انه فى إحتمال أكون فى الشغل اليوم ده. فهيبقى الجمعة اللى بعدها انسب ده بيتهيألى.
وبرضو الكلام لسة مش نهائى لو فى اى حد عنده إقتراح أفضل يتفضل يقوله وإحنا مع الأنسب للجميع , وطبعا بكرر الدعوة مفتوحة لكل أعضاء ورؤساء ومشرفين المنتدى طبعا ينورونا وينوروا الدلتا كلها .

مستنيين الموافقات والتعليقات