السلام عليكم و رحمة الله
انا النهاردة بانقل وجهة نظر مختلفة شوية عن الماتريكس و الكلام اللى بيتقال عنها و خلينا نتخطى المقدمات الطويلة و ندخل فى الموضوع على طول
.
بداية انا اسمى احمد شريف وواحد من ملاك الماتريكس
احب اعرفكم بالعربية
الماركة:هيونداى
الموديل :ماتريكس
سنة الصنع :2006
بلد الصنع : كوريا الجنوبية
عدد الكيلومترات المقطوعة :84500 تقريبا
نوع ناقل الحركة :مانيوال
اللون اسود (اللى فى التوقيع )
...............
الكلام اللى جاى ده منقول عن تجربة شخصية
نبدأ
التقييم العام للسيارة جيد جدا وده لانى شايف الموتور بتاعها مع الفتيس المانيوال ممتااااااز و اكرر المانيوال عشان ركبت الاتنين
المتور طبعا غنى عن التعريف بس لمعلومات عنه دى نبذة مختصرة عنه
هو من فئة مواتير DOHC اللى راكب فى الفيرنا و الجيتز و الانترا 2006 و سعتة اللترية 1.6 لتر و بيعطى قوة اقصاها 106 حصان عند 5700 RPM و عزم دوران 135 N/M عند 4200 RPM و بيطلع من 0-100 كم/س -مع المانيوال -10.7ث ( قياس شخصى) وده اقل زمن جبته من غير ما اوصل للريد زون على الار بى ام
الشكل الخارجى -معروف -و من وجهة نظرى مقبول الا انه من تصميم الايطالى بينى فيرينا و مع ذلك اجده مقبول و لكنه عملى جدا
المقصورة ..الوسع الداخلى مع ارتفاع السقف بيديك احساس ان انت قاعد فى بيتك و من غير مبالغة اوسع عربية مينى فان ركبتها
و ما يعيبها ممكن خامات الصنع اقل من المتوسط
و مستوى العزل يكاد يكون رديئا و خاصة من ناحية الموتور -تحس ان الموتور قاعد جنبك ع الكرسى -على الرغم ان صوته هادئ جدا ولكن كما اسلفنا (العزل)
العزل الحرارى جيد و ده كويس فى مصلحة التكييف المتوسط الكفاءة عالى الملائمة
استهلاك الوقود من 7-8 لتر فى ال100 كم وده بطريقة سواقتى
الثبات *على الرغم من عفشة العربية الناشفة الغير مريحة الا ان الثبات كويس لحد 140 او اقل بس المهم تبقى حاسس بالعربية وهى ماشية لانها ما بتنقلش الثبات اللى ع الطريق
الامان * خليها على الله
و مع ان واحد صاحبى مر بتجربة ملائمة تماما لاختبارات الامان (حادثة ) الاصطدام كان على سرعة 60 كم/س -بعد ما هدئ السرعة من 100 -طلع سليم و المقصورة ما فيهاش قايم اتعوج كل الضرر كان في الموتور و كبوت و من غير ايرباج
ولكن انا لم اشهد اختبار امان واحد لها مع ان الظروف فى صالحهم
الفرامل ميزتها عن الفيرنا لانها قوية و تقدر على الموتور و الوزن بتاع العربية وهى ديسكات قدام و طبلة ورا
العيب اللى انا شايفة ان شنطتها صغيرة بس ممكن طى الكنبة الخلفية للحصول على مساحة تخزين كبيييييييييييرة
العداد اللى فى النص ده انا مش شايفه عيب فيها و دى وجه نظر
و للعلم انا معظم سواقتى ع السريع ولازم اراقب العداد عشان الرادار بس يعنى هو مش بعيد اوى هو بس تلوح رقبتك 5 درجات بس او ممكن بالنظر
و كمان كتابته واضحة و نوره قوى
و فيه لمض تانية دى لازم اتابعها و بتقدر تلفت نظرى زى البنزين و الباب المفتوح و الشنطة لو مفتوحة و النور العالى و لمبة الاعطال و لو اوتوماتيك بيوضح الغيار اللى انت عليه
ارجو ما كنتش طولت ولو حد عايز يسال انا موجود و شكرا