حادثة شفتها فى شارع الهرم و مقدرتش اعمل حاجة
انا كنت فى شارع الهرم راجع من عند دكتور الاطفال محمد سعد الباز فى شارع ضياء و شايل بنتى و لان العربية عطلانه فمشيت لحد شارع الهرم و وقفت علشان اركب ميكروباص للمريوطية و فضلت واقف كثير لحد ما بدأت اتعب و كل ما يجى ميكروباص و يقف يقوللى لحد العريش و يمشى
و فجأة لقيت تاكسى ابيض و جاى وراه تاكسى بيجو اسود و التاكسى الابيض هدى فى نص الشارع و راحت بنتين كبار معديين وراة و البيجو راح طالع منه خبط البنتين احدهما اللى كانت على الحرف طارت فوق الشنطة بتاعة الابيض و عملت دورة كاملة فى الهواء شقلباظ و وقعت على الارض و التاكسى الاسود مشى شمال و راح مهدى و جاى يمين و ظنيت انه هيركن و ينزل يشوف البنتين
و بص عليهم و راح طالع فجاة بسرعة جنونية و جرى و محدش فكر حتى ياخد نمرة
لان الناس لما لقيته هدى ظنت انه هيقف و لكنة جرى و ترك اختاه او ابنتاه ملقيتان على الاسفلت واحدة قامت و قدرت تتحرك و تروح على الرصيف و تقعد عليه و الثانية شالوها الناس و سندوها و قعدوها جنبها على الرصيف
كان نفسى تكون العربية سليمة و انا كنت قفلت علية الطريق و خليته ميتحركش خطوة واحدة
او كنت اخدت البنتين لمستشفى الهرم يتعالجوا حتى هناك و يكشفوا
المشكلة ان الغلبان متداس دايما
يعنى انا وقفت ربع ساعة لحد مالقيت مكان فى الميكروباص علشان اروح
فما باللك باثنين عاوزين مكانين علشان يتعالجوا بس مش حتى يروحوا
و امهم و لا ابوهم و لا اخوهم لما يعرف بالموبايل حالته هتكون ايه و هيعرف يوصلهم ازاى فى الزحمة دى و الطريق اللى واقف مات بيتحركش
و المرور قصدى الظباط سايبين الشارع و رايحين فى شارع النفق عند فندق سياج يعملوا لجنة للى ماشى عكس اتجاه و النقل اللى محمل زيادة و الملاكى اللى مفيم
ياريت يكون اللى سايب الطريق يقف كدة و يتعك العكة السودا دى و ميتحركش و لما و بيقفش من سواق التاكسى دة علشان يشيلوا مخالفة و لا يجيبلوا رخص مسحوبة و لا بياخد رشوة تكون البنتين دول قرايبه اخواته او بناته علشان يقدر يعرف ان الحرام اللى بيعمله ربنا مش هيسبوا و على راى المثل
ليك يوم يا ظالم
__________________
|