[miam0502788391]

عودة الى الضبعة ( ألأكل والشرب )
قلنا فى سابق ان مستشفى الضبعة لم يكن بها مطبخ ( طبعا ايام ما كنت هناك) ولذلك لزم على كل طبيب موجود بالمستشفى انه يعتمد على نفسه فى موضوع الأكل والعبد لله فى اول ما استقريت فى المستشفى كنت بأقضيها اى حاجة يعنى تونة ماشى بولوبيف ميضرش اى حاجة تسد الجوع وخلاص لحد ما انزل اجازتى
بعد كده لقيت النظام ان الموجودين فى السكن بيشتركوا فى الأكل وهما اللى بيطبخوا مع بعض
فى الأول انا كنت مستقل مع نفسى فى موضوع الأكل وشيئا فشيئا انضميت للشلة
كنا نخلص الشغل بتاع العيادات الخارجية وواحد او اتنين من الموجودين ينزلوا السوق ويشتروا الطلبات ( علشان محدش يقول الدكاترة دول ناس مريحه ) , والطلبات طبعا كل حاجة بصل وثوم وخضار ولحمة او فراخ (على ما يتيسر) وبعد كده نفوت على محلات البقالة نشترى الرز والزيت والصلصلة
كان معانا دكتور اخصائى نسا ووولادة بس كان متمكن فى الطبخ فعلا , فى الغالب كان هو اللى بيقوم بعملية الطبخ بنفسه مع مساعدة من اطباء السكن يعنى مثلا واحد يقشر البطاطس وواحد يعمل السلطة وواحد يغسل الخضار وهكذا وكان هو اللى يظبط المقادير
بعد ما الأكل يستوى نتلم كلنا على الغدا على ترابيزة مدورة ونقسم الأكل على بعض وناكل احلى اكل , كان الأكل لذيذ وجميل
احلى حاجة كانت اللمة على الأكل بالإضافة الى روح التعاون بين الموجودين كانوا بيعطوا طعم غير عادى للأكل فعلا من اطعم الاكل اللى أكلته فى حياتى
واتعلمت اعمل بعض الأكلات من دكتور النسا ( يلا ما انا فاضى بقى ) زى صنية بطاطس باللحمة, المعمر , الحمام المحشى , مكرونة بالصلصة
طبعا كل الكلام ده كان زمااااان من 10 سنين علشان مفيش حد دلوقتى يقول عاوز ادوق اكلك يا دكتور انا الآن ولله الحمد آخرى اعمل طبق سلطة وكوباية شاى
ودمتم بخير