[drmagola]

المشاركة الأصلية كتبت بواسطة hazem_khidr مش حقولك مبروك لكن حقولك 1000 مبروك علي عربيتك الجديده ربنا يديك خيرها و يحميك من شرها عاوزين تقييم عن العربيه حالتها و اخدتها بكام و احساسك بيها عامل ازاي و اهلا و سهلا بك في نادي تويوتا

اولا 1000 شكر لحضرتك يا استاذ حازم على ذوقك و مجاملتك

و يارب تكون العربية وش خير على
ثانيا العربية ما كنتش بافكر فيها خالص انا كنت رايح اشترى دايو لانوس من كذا
معرض و ميكانيكية و كان معاى حماى و ميكانيكى ....المهم و احنا ماشين نتفرج شفنا
العربية دى كورولا عيون بصراحة انا اول ما شفتها مكنتش مرتاح لشكلها لان كانت مش متروق عليها
المهم ركبتها حسيت بنعومة رهيبة و سحب ممتاز و مش سامع صوت موتورها خالص و هى فابريقة من جوه و بره و مفيهاش زجاج كهربا .....
المهم رحت شفت كام واحدة لانوس و ركبتها حسيت بفرق فى وسع الصالون و الموتور و نعومة العربية .....و حسيت بفرق كبير
بس بصراحة كنت محتار جدا:
ليه؟؟؟ اللانوس شكلها حلو و حديثة و منتشرة جدا اما الكورولا 99 العيون فشكلها مش عاطفى خالص و لكن اداء عالى جدا و متانة ..
بس انا شاب و صغير ...طيب اركب ايه؟؟؟
المهم حمايا اقنعنى بالكورولا خصوصا ان هو معاه كورولا 92 خليجى و مش ناوى يبيعها حتى لو جابولوه زيرو مكانها
رجعنا تانى للراجل بتاع الكورولا و انا فى قمة الحيرة و فى الوقت ده كلمت الست مراتى ربنا يخليها و باستشيرها لقيتها محتارة اكتر منى....قامت فى التو و اللحظة و صلت صلاة استخارة و دعت ربنا ان يهدينى للافضل....
المهم لما رحنا تانى لصاحب الكورولا قالنا العربية بتتغسل و بتتزبط و جايه بعد شوية
تصدق بجد يا استاذ حازم ان لما العربية جت تانى و شفتها حسيت انى ارتحت لها ازاى ما اعرفش مع انى كنت متضايق من شكلها....
قلت لصاحب العربية انا عاوز اركبها تانى شوية...ركبتها انا و الميكانيكى اللى معايا و مشيت بها ...بصراحة ارتحت اكتر و الميكانيكى اقعد يقنع فى انى اشتريها مع العلم ان الميكانيكى ده معاه عربية لانوس 2007 و قالى لا يعلى على اليابانى يا دكتور و هى افضل من اللانوس اللى معاه....
رجعت و اتفقنا مع الراجل صاحب العربية و دفعنا عربون و امبارح خلصنا كل حاجة
بس اللى ضايقنى فيها ان عرفت بعد كده ان اعادة بيعها صعبة شوية فقلت اتأكد من حضرتك؟؟؟ مع انى ناوى ما ابيعش الفترة اللى جاية-يعنى مش قبل من 4-5 سنين
نسيت اقولك انى اشتريتها ب 48000 فايه رأى حضرتك فيها و فى سعرها و فى اعادة بيعها؟؟
تقبل تحياتى
اخوك
د. محمد