[ahrambc]

(7)



المهم بعد الجوله الأستكشافيه الأولى جاء موعد استراحة الغداء . فقلت ياواد شوفلك مطعم ولا حاجه المهم لقيت العيال الصينين كل واحد ماسك فى علبة اكل و بالعصايه و عمال ياكل اشى رز و اشى حاجات خضرا و اشى شوربه سوده قلت فى نفسى فرجت المهم وانا بادور على مطعم لقيت مطعم مكتوب عليه بالعربى حلال قلت بس ياعم رزقك فى رجليك و قربت منه و هوبا لقيت ريحة المطعم كأنى قاعد فى صفيحة زباله و متغطى بيها كمان رحت جارى من جنبه و رحت مطعم تانى و قلت آكل اكل صينى زى اللى فى مطعم الأمم كده المهم لقيت واحد خواجه واقف زيي عاوز يجرب المطعم بس خايف المهم قلتله ياراجل خش و ماتخافش و رحنا داخلين لقيت الراجل اتقرف من منظر الأكل و راح جاب حتتين جاتوه وجه قلت فى نفسى الله يقرفك هناكل جاتوه على الغدا المهم قمت جبت شوية رز و شويه صلصه سودا ( اتضح انها صلصة صويا ) و حاجة خضرا لقيت كل الناس بتاخذ منها و بيضيتين و عصايتين . المهم جيت اكل الرز لقيته مسلوق و بارد و بدون ملح اطلاقا قلت احط عليه من البتاعه السودا دى و بعدين جيت اكل من الحاجه الخضرا شكلها عامله زى القرنبيط بس محطوط عليها زيت قطعت منها حته و جيت ابلعها مش بتنزل …. معلش احاول تانى اجى ابلعها ماتنزلش …. طيب غمض عينيك و حاول …. مافيش فايده . وولاد الجنيه الصينيين نازلين اكل فيها زى القرود . يادى الوقعه السودا . وكل كده و الخواجا عمال يضحك عليا لما وقع فى الأرض من الضحك. رحت راميها و قلت آكل البيض أهوه ده بأه عارفينه و خابزينه . جيت امسك البيضه و باقشرها قام الخواجا الملعون قاللى ايه مش واخذ بالك من البيضه قلت له فيها ايه قال البيضه لونها مش ابيض لكن اخضر فاتح . يانهار اسود ده صحيح البيضه لونها فزدقى فاتح … رحت قايم و سألت الست اللى على الكاشير

- دى بيضه فرخه بالأنجليزى …شاورت لى بما معناه انها مش بتتكلم انجليزى .

مسكت البيضه فى ايدى و قلت لها زى الديك البيضه دى كوكككوك .( بعلو صوتى غصب عنى فى المطعم )

- شاورت لأ

- قلت لها و انا باشاور بأيدى زى البطه دى بيضه كاك كاآآآآآآآك

- شاورت لأ

شاورت انا امال بيضة ايه الله يخرب بيتك ( قلت لها انا بعلو صوتى )

قالت : كيوى

البيضه طلعت بيضة كيوى ( الطائر المرسوم على علب الورنيش )



رحت جبت حتتين جاتوه ……….



يتبع .......