[mercedes]

السلام عليكم و رحمة الله و بركاته

على سيرة أمين الشرطة و أن الشعب فى خدمة الشرطة , النهاردة الجمعة كنت مسافر القاهرة من المنصورة و أنا بعدى مطب كده فى أول طريق أجا لقيت عسكرى مش عارف شرطة ولا جيش , كان لابس بدلة بيج مبهدلة و انا والدتى دايما تفكرنى أن ( من كان عنده فضل ظهر فليعد به على من لا ظهر له ) يعنى من الآخر أوصل اللى ألاقيه فى سكتى !!!!!!! , المهم وقفت عالمطب على شمال الطريق جمب الجزيرة عشان أركب العسكرى ده, ماهى بلد مالهاش قانون بقه و مالهاش صاحب , الراجل لف عشان يركب و بالفعل فتح الباب و ركب جمبى, بس على ماركب, لقيت الأرض انشقت و طلعلى واحد لابس ملكى و أصلع كده و فتح الباب اللى ورا و قاللى , صباح الفل يا سعادة الباشا و كل عام و أنت طيب و قام راكب ورا , أنا استغربت من الكلاحة و التناحة اللى مالهاش زى دى , حاجة تقرف , المهم كانوا هما الاتنين قالينلى أنهم عاوزين يركبوا لحد ميت غمر , يعنى لحد المزلقان .

المهم , قلت عادى , ياما لسه هنشوف , و احنا ماشيين و قبل مانصول لميت غمر .......................!! !!!!!!!!!!!!

لقيت الراجل الحلو الأمور الأصلع اللى لابس ملكى ده , قاللى, ممكن يا باشا, بعد ادنك , ناخد الراجل ده معانا؟؟؟؟ و قام مشاورلى على واحد برضه لابس ملكى و أصلع و لابس ملكى و ماشى فى الشارع وبالتالى, كماااااااااااااااااان الأخ التالت ده ركب معانا, خلوا بالكم , هما كانوا نازلين فيييييييييييييييين , فى ميت غمر .

قبل مانصول للمزلقان ب 500 متر , الراجل العسكرى اللى لابس بدلة بيج مبهدلة , قاللى , ممكن يا باشا تنزلنى هنا , قولتله , ماشى يابا , بالسلامة و بالفعل نزل, و فيه واحد من الاتنين اللى ورا نزل و ركب جمبى.

و قبل ماعدى مزلقان ميت غمر , الراجل الأصلع اللى جمبى قاللى: و هو سيادتك يا باشا رايح مصر ( القاهرة ) , قولتله -ودى كانت غلطة عمرى- آه, قاللى : يا باشا, نضايقك لو جينا معاك؟؟؟؟!!!!!, قولتله و انا أتميز من الغيظ , لا أبداااااااااااااااا .

طول الطريق, كانوا بيحاولوا يفتحوا معايا كلام, و أنهم زهقانين من البلد و نفسهم يكتوا منها و ان البلد مقرفة و خانقة الناس و الشباب و الناس مش عارفة تعمل حاجة و الخ و أنا عمال أقول , هم......هم..........هم... .....هم .

المهم الراجل اللى كان راكب جمبى , زهق منى, مانا مابردش عليه و مديله البطرشة و قال , أما أقضيها موبيلات أحسن و بدأ يتصل تقريبا بأصحابه القدامى و يرزل عليهم و هنا بس , عرفت أنهم أمناء شرطة .

قلت فى عقل بالى , آه ياولاد الTEEEEEEEEEEEEET أما أنتوا ياللى تاكلوا مال النبى زهقانين من البلد و عاوزين تسيبوها , أومال احنا نعمل ايه و بعدين جه فى بالى حاجة برضه والدتى قالتهالى , أن بالفعل فيه عناصر من الداخلية و الشرطة و بتندس بين صفوف الشعب و تفتح معاه حوارات و كلام بخصوص الأحوال الداخلية للبلد و تشوفه هيقول ايه , زى نظام المخبرين الخايبين اللى كانوا موجودين أيام جمال عبد الناصر و كده و على فكرن بيبقوا ناس لايمكن أننا نشك أنهم عناصر من وزارة الداخلية .

ألا رأيكم ايه , الواحد لما يكون مسافر بالعربية لوحده و العربية فاضية , ممكن يركب ناس فى سكته و لا يخاف لحسن يطلعوا ناس سقيييييييييييييييلة زى دول؟؟؟؟

شكرا و آسف جدا للاطالة .

MERCEDES S550