لا شكر على واجب يا أستاذ جنيدي وبجد اللي قولته ده صدق مش مجاملة ولا حاجة والله
وأنا شايف تبدأ بتحفيز يمكن ربنا يجعل في كلامك القبول وفي نصايحك طريق السلامة بإذن الله
أما بالنسبة إذا كان ليا هدف نفسي أحققه فأه ليا بصراحة، ليا أكتر من هدف كمان مش هدف
واحد وأنا عارف إن إيطاليا فيها مصريين كتير بس أنا بشتغل مبرمج ومش عارف ممكن ألاقي
شغل هناك ولا لأ كمان ابن عمي قالي السفر لهناك بقى صعب جدا جدا ومفيش شغل أصلا
كمان أنا ما بحلمش أسافر إيطاليا أنا بتمنى أروح انجلترا أو كندا أو استراليا، بس إذا زنقت قوي
ومفيش غير إيطاليا ماشي بس هي تيجي وأديك سامع عن الشباب اللي كل يوم والتاني بيحاولوا
يروحوا بأي طريقة والنتيجة بيغرقوا أو يفشلوا ويرجعوا بخيبة الأمل، على العموم لو حضرتك عندك
نصيحة بصدد الموضوع ده أو معلومة ياريت تفيدني بيها وأكون شاكر جدا، اه نسيت أقولك إني صحيح
شاب نوعا ما لسه صغير 27 سنة بس أنا متجوز دلوقتي وعندي بنوتة صغيرة وكمان شغلي هنا كويس
الحمد لله وشغال في شركة كويسة ومرتبي مجزي الحمد لله ويمكن ديه حاجات مخلياني كسلان شوية في
الموضوع ده بس أنا بحلم بحياة أفضل ليا ولأولادي بإذن الله من ناحية التعليم والصحة والمعاملات....
إلخ، وأنا بصراحة من زمان بحلم ألف وأروح هنا وهناك وأشوف مدن جديدة وحاجات جديدة،
وطبعا بما إني راجل مبرمج بسمع بره الناس شغالة أزاي والدنيا وصلت فين واحنا هنا لسه فين
ونفسي أواكب التطور التكنولوجي ده بقى وأتعلم حاجات جديدة صح وعن اقتناع مش زي ما هو حاصل
عندنا هنا في أماكن كتير اللهم إلا ما رحم ربي. المهم طولت عليك معلش على العموم سعيد جدا
بالتعرف عليك وأتمنى أقابلك لما تنزل مصر إن شاء الله وأعزمك عندي على الغدا بس أوعى تيجي بقلب
جامد وتجيب بقيت أصحابك اللي في هولندا معاك
، أخيرا تقبل خالص تحياتي ليك يا أستاذ جنيدي