[حسام البورسعيدى]

المشاركة الأصلية كتبت بواسطة mohsaleh ألف شكر على ردك استاذ حسام بعد اذنك هل يوجد كتالوج للنوبيرا اوتوماتيك موديل 1999 لأن خبرتى ضعيفة جدا فى السيارات وعايز اقرأ فى الكتالوج عشان بحاول اعرف كل حاجة عن السيارة مثلا يوجد زرار اسمة HOLD على بجوار الفتيس الوتوماتيك مش عارف بيعمل اية زراع الفتيس نفسة علية زرار صغير فى الوسط بيكتب Power بجوار العدادات متى اغير زيت للعربية والفتيس كيف احافظ على الفتيس هل اى ميكانيكى يتعامل مع العربية ام بالتوكيل اسف اطلت عليك ودوشتك النقل بالفتيس الاوتوماتيك يوجد بة سرعات 1 2 3 مش عارف استخداماتهم عشان باستعمل D هل عند تشغيل العربية بتكون على N أم P وايهما افضل وشكرا على الاهتمام من حضرتك ومنتظر الرد

شوف يا فندم ..

HOLD و POWER موجودين عندى فى الافانت ودى وظايفهم عن تجربة ..

زرار hold ده وظيفتة بيخلى العربية تاخد غيار بدرى عن المعتاد .. يعنى ايه ؟؟
يعنى مش بتخلى rpm بتاع الموتور يبقى عالى ... واستخدامه لما تكون عايز تمشى على مهلك او فى زحمه وعايز توفر فى البنزين ....

زرار الباور بقى عكس الكلام ده يعنى بيخلى العربية تاخد وقت اطول وبعدين تاخد غيار .. يعنى بتخلى RPM يبقى عالى وبعدين تاخد غيار ..
وده استخادمه فى القرص يعنى لو عايز تسارع عالى تشغله وهتلاقى صوت الموتور بيعلى معاك ..

بس خلى بالك !!!!!
شغل النظامين دول وقت الحاجة ليهم بس .. يعنى متشغلهمش وتنساهم

يعنى تشغل الهولد مثلا وتدوس بنزين جامد يبقى فى تناقض كده فياثر على الفتيس ...



بالنسبة لتغيير زيت الموتور بيبقى على حسب نوع الزيت يعنى فى زيت بيتحط كل 1000 كيلو وفى نوع كل 3000 كيلو وكدة ...
بس نتكلم بعمليه شويه .. كل كام يوم الصبح افتح كبوتك وقيس الزيت ولو لقيت الزيت لونه بقى غامق غيره لان المسافات دى بتفرق يعنى على حسب حاله الموتور وظروف القيادة وكدة كل ده بياثر على عمر الزيت ..

بس فى المتوسط يستحسن تغير زيت كل شهر الى شهر ونص بس لازم تكون متابع زى ما قلت لحضرتك ..


اما زيت الفتيس ده بيقعد فترة طويلة يعنى يستحسن تغيره كل 10000 كيلو او اكتر وبرضه تتابع لونه لو اسود جامد غيره ..

المحافظة على الفتيس الاتوماتيك يا باشا فى اى عربية سهل خالص

لازم بس تبعد عن الاخطاء الشائعة اللى ناس كتير بتقع فيها ...

دى الاخطاء من الاهم فالمهم ..

1- متنقلش ابدا الى وضع P او R والعربية بتتحرك (مهم قوى)

2- حاول متقرصش على العربية قدر الامكان .

3-لما تيجى تركن وتروح على P حاول ترفع فرامل اليد الاول وبعدين انقل على P او تدوس فرامل وبعدين تنقل على P ووانت دايس فرامل لسه ترفع فرامل اليد ..

4-متحاولش ابدا تنقل من N الى D وانت دايس بنزين (تفويت او امريكانى يعنى)


بالنسبة للصيانة لو تغيير زيوت او سيور او بوجيهات او حاجات بسيطة يبقى تشوف ميكانيكى كويش تتعامل معاه ..
لكن لو حاجة كبيرة (عمره او تغيير فتيس او كدة لا قدر الله) يبقى يستحسن التوكيل لو مش مطمئن للميكانيكى ..


بالنسبة ل 1 و 2 و 3 دى نقلات يا باشا بس ملهاش لازمه اوى وخصوصا 2 و 3 (فى عربيات مفيهاش 3 دى ...

حضرتك عارف ان فتيسك الاتوماتيك 4 نقلات

الوضع 1 : بيخليك تمشى على الغيار الاول بس وميزودش عنه وده يفيدك فى طلوع اى مرتفع شديد الميل علشان تحافظ على الفتيس (لاحظ شديد الميل)

الوضع 2 : يخليك تمشى على الغيار الاول والتانى بس يعنى يعنى ميعليش عن التانى وفايدته لو نازل منخفض طويل نازل جبل مثلا او(طالع جبل برضه) علشان بيعمل فرمله من الموتور (زى المانيوال يعنى) بحيث ماتدوسش فرامل طول ما انت نازل الجبل فتسخن منك الفرامل وتتحرق ..

الوضع 3 : نفس النظام اخرك الغيار التالت ...

واى استفسار تانى انا فى الخدمة وشرفنى مساعدة حضرتك ..