حضرتك غلطان انك اخدت منه الورقه من غير ما يكون مهندس بتاع عيسي موجود .
و دا نفس اللي حصل معايا لما غيرت اكصدام الياريس في توكيل العباسيه
الاكصدام و الكارتيره اتخبطوا و قولتاستفيد بالتأمين اللي بدفع فيه 2500 جنيه سنويا (شركه كونتاكت)
المهم اتصلت بيهم قالولي مافيش مشكله و حضرتك روح شركه الكويت العربيه صلح فيها!!!
قولتلهم اناحعملها في تويوتا العباسيه قالولي اوك يبقي تدفع من معاك و تستلم اللي دفعته في خلال اسبوعين قولت مافيش مشكله .
و قالولي حضرتك تسيب العربيه فيالتوكيل يا فندم و تخبرنا انك سايبها و المهندس في خلال 24 ساعه حيكون في التوكيل يعاينها ,
اتصلت بواحد صاحبي في تويوتا العباسيه شرحت له الموقف قالي دول بيستعبطوا و الموضوع اصلا حخلصهولك في 5 ساعات بالضبط مش حياخد وقت و حرام تركن العربيه في التوكيل.
المهم تاني يوم كلمت شركه التأمين و قولتلهم انا سايب العربيه في التوكيل (بحيث اني كده بلغتهم و المندوب بتاعهم حيروح في خلال 24 ساعه اكون وديت العربيه و عملت المقايسه و صلحتها و اخدتها في نفس اليوم ...و طبعا دي احلام يقظه
)
روحت انا يوم الاتنين من الساعه 8 الصبح التوكيل و مستني البيه المندوب لحد الساعه 11 ماجاش قمت اتصلت بالشركه قالولي حيجي علي الساعه واحده الضهر يا فندم قولت ماشي لسه في وقت و جات الساعه اتنين الضهر محدش جه قمت متصل بيهم تاني قالولي هو في مشوار و حيجي علي الساعه تلاته يا فندم قولتلهم انا من المحله و عاوز اروح و التوكيل مش عاوزني اسيب العربيه لان الي فيها حاجه تافه و ... و ... و ......
المهم فضلت قاعد لحد الساعه تلاته و ربع بالضبط ما جاش و اتصلت بيهم تاني قالتلي هو اتأخر و حيجي بكره متأسفين و انا بكل هدوء قولتلها هاتي مديرك تقولي هنا مافيش مدير روحت فاتح فيها و زعقت و هللت و شتمت في الشركه و صوتي يجيب لحد الاتوستراد من الي عملته
المهم عشر دقايق و قام واحد بيتصل بيا و بيقولي الاستاذ حازم معايا (عرفت انه من شركه التأمين)
قولتله معاك الاستاذ زفت خير عاوز ايه ؟؟؟قالي فيه ايه بي يا فندم؟؟
قولتله فيه ايه؟!! تصدق انكم عالم بارده و مش بتراعو حد
انا قاعد هنا في المخروبه دي من تمانيه الصبح و ورايا شغل و ورايا حاجات كتير مش مشكلتي ان الهباب بتاعكم دا يتأخر مكنتوش تدوني ميعاد(انا بقول كده و مطمن انه مش حيعرف يرد لان كل المكالمات بتبقي متسجله)
قالي يا فندم حصل خير ...قولتله منين يعني الخير هو انا بشحت منكم انتوا كل سنه بتطلبوا فلوس مني بتاخدوها و بيبقي علي وشكم ابتسامه من الودن للودن لما بيجي الثور اللي بيدفع انما بعد كده تدوني بالجزمه ..هو انا لو اتأخرت في قسط حترحموني ؟؟!!! و شغلي اللي متعطل دا مين اللي حيحاسبني علي وقتي اللي مضيعه مع عالم هواه زيكم مش بيفهموا و .........كميه كلام من النوع دا خليت الراجل مش عارف يرد..
قولتله بص انحنا واخدين تلات عربيات من عندكم و اقدر اقولك ارقامهم و في ثانيه حلغي التامين من شركتكم دا غير ان فيه اتنين قرايبي حيشتروا و انا مش حخليهم لا يشتروا ولا يأمنوا معاكم و الخبطه دي حتتصلح علي حسابكم و بمزاجكم و ممكن كمان يبقي غصب عنكم و انا مقدر اوي حجم الكلام اللي بقوله و حقدر انفذه .
المهم قفلت معاه و في خلال تلت ساعه لقيت المندوب بتاع التأمين جه و بيتصل بيا بره التأمين.
لقيته راجل كبير معدي الخمسين مثلا و شاف المقايسه كانت في حدود 2500 جنيه للاكصدام و الكاتريه و اعمال مصنعيات و حاجات كده
المهم لقيته بينزل من تمن المصنعيات و بيقول مافيش شغل كهربا في العربيه و مش عارف ايه و عمال يشطب في البنود و يقلل في الاسعار بنفس الطريقه اللي حصلت معاك و بيديني الورقه و بيقولي ادخل بيها و هما حيعملوا كل حاجه.
قولتله يا فندم حضرتك ممكن ادخل بيها يقولوا مالناش دعوه و دي اسعارنا و بتاع
يقولي لا ادخل بيها و هما حيوافقوا بالكلام اللي مكتوب
قولتله طب اتفضل معايا قالي بتناكه انا عندي شغل مش فاضي و بيفتح باب العربيه بتاعه.
قمت ماسك الباب منايده و رزعته و قولتله و دا برضه شغل اتفضل معايا جوه فهمهم اللي بتقول عليه انت مش حتمشي من هنا
و دخل جوه و شفت عجب العجاب
ولا كأني واقف في ورشه سمكري اي كلام عمالين يفاصلوا مع بعض
لحد ما وصولها ل 1700 جنيه و قام ماضي و المهندس مضي.
طبعا اليوم كان انضرب و مش حلحق اعمل حاجه في العربيه و روحت لهم تاني يوم
كنت دفعت نص الفلوس و رشوا الاكصدام و روحت ركبته في ساعتين و مشيت!!!!!
انا بحكي دا كله علشان تعرف ان التأمين في مصر من اسوأ ما يكون و عاوز نفس الطويل
المره الجايه ححكي عن اللي حصل معايا لحد ما اخدت الشيك منهم