رد: ما هو التربو ؟
بص يا ريس
أولا نتفق إن الكفاءة الحجمية تعتمد على نسبة الهواء اللى بتدخل المحرك يعنى لو قدرنا نزود كمية الهواء اللى بتدخل المحرك يبقى الكفاءة الحجمية هتزيد و بالتالى قدرة المحرك
ثانيا فى شوط السحب و المكبس نازل لتحت و صمام السحب مفتوح و صمام العادم مقفول بتدخل كمية هواء معينة طب نزود الكمية إزاى؟
لازم يبقى فى قوة ( تزق ) الهواء و تجبره غنه يدخل غرفة الإحتراق عشان كدة بنسمى القصة دى الشحن الجبرى او forced charging
و فى نوعين من الشحن الجبرى :
الاول سوبر تشارجنج Super charging و ده بيتم عن طريق كمبرسور بيقوم بضغط الهواء و يدخل كمية هواء أكتؤ لغرفة الإحتراق و بالتالى الكفاءة الحجمية بتزيد و ده بيأدى لزيادة فى قدرة المحرك HP و النوع ده مش منتشر و انا ماشوفتوش لحد دلوقتى عشان من وجهة نظرى بعتبره نوع متخلف من زيادة القدرة عشان الكمبروسر نفسه بيكون حمل على المحرك و بياخد شوية قدرة من المحرك يعنى اللى بيديه باليمين بياخد ربعة (مثلا) بالشمال
و النوع التانى تربو تشارجر Turbocharger و لما نسمع كلمة تربو معناها إن فى توربينة و التوربية عاملة زى المروحة -بس طبعا حسابات دقيقة فى صناعة الريش بتاعتها- و المروحة دى لو شوية هواء جه أدامها هيخليها تلف طب تصور لو إحنا حطناها أدام العادم و هوا خارج تحت ضغط عالى و درجة حرارة عالية جدا يعنى بإختصار يحمل طاقة كبيرة حرام غننا نسيبها تروح ( اونطا ) و ده اللى بيحصل اننا بنخليها فى مكان تجميع العادم بعد مجمع العادم (Exhaust manifold ) و بالتالى الريش بتاعتها هتلف نروح جايبين كمبروسو و حطينه على عمود واحد مع التوربية معنى كدة إن التوربينة لما تلف الكمبروسور هيلف و بالتالى هيضغط هوا و ندخلة للمحرك و الكفاءة الحجمية تزيد و قدرة المحرك كمان تزيد و يبقى احنا كدة استفادنا من طاقة العادم و معملناش حمل على المحرك زى النوع الاول
موضوع الإنتركولن Inter Cooling طبعا لما الهواء اللى بيكون داخل للمحرك من التربو تشارجر مضغوط أكيد درجة حرارته بتعلى و بالتالى كثافته بيقل و حجمة بيقل فنروح مبردينه بتمريره على سربنتينة ميه عشان يبرد و حجمه يكبر و نستفيد منه اكبر إستفاده
معلش طولت عليك بس فى ملحوظة مهمة فى المحرك الديزل التربو تشارجر بيكون فعال اكتر من المحرك البنزين و ده نتيجة غن المحرك الديزل بيعتمد اساسا على كمية الهواء و حجمة و ضغطه عشان الغحتراق يكون سليم بعكس محرك البنزين بوجود البوجيهات اللى بتدى شرارة عشان غتمام عملية الإحتراق
شكرا يا matmm و أسف على الإطالة
__________________
شارك دافع عن أفكارك
|