[خالدخليفة]

الشخير(1)
كنا فى صحراء العلمين رحلة مرهقة طول اليوم وأراضى غير ممهدة وطبعا طالما لايوجد حمام فلا طعام (بالنسبة لى طبعا لكن العرب على أى جنب وأديها )ثم عدنا
وفى طريق العودة وكان الجو شتاءا تأخرنا الى الليل والشبورة هبطت بكثافة وانا كنت متخذ القرار بالتكملة الى الاسكندرية لتوصيل اخوننا ثم العودة الى القاهرة ولكن اعترض الجميع والطريق خطر واحنا خايفين اومال انت اللى سايق مفروض تبقى اكتر خوفا
ونـزولا على رغبة الجماهير دخلنا عند احد اخواننا من العرب فى بيته واستضافنا فى المربوعة(شرحناها قبل كده)
لكـن حدث شىء غريب
كنا 8 أفراد مقسمين على سيارتين وفوجئت ب5 من ال8 هربو من المربوعة والنوم فيها وانا مش فاهم
ايه الموضوع
ودخلنا احنا ال3 الباقيين الى المربوعة وهى واسعة وكبيره
وبعد العشاء
فوجئت بدل م ننام كلنا فى المربوعة وخاصة انها تكفى اكتر من 20 واحد لقيت الكل اصر انه ينام فى مكان تانى ماعدا انا وواحد غريب زى حالاتى وواحد من العرب اهل المكان
واللى معايا لم يلاحظ اى شىء لكن انا ساورنى الشك
ونايم متحفز والمخ شغال
ايه اللى هيحصل
ولكن مفيش اى دلائل لشىء غلط ثم ان دول اهل ثقة مش هيعملو فيا مقلب
وطفينا النور وجينا ننام
ظهر المقلب
صاحبنا العرباوى كان له شخير عاااااااااااااااااااااااا ااااااااااااااااااااالى جدا لدرجة تحس زلزال يهز المربوعة رغم انها واسعة جدا(أه والله بلا مبالغة )
تتصرف كيف ياعبد الرحيم تتصرف كيف ياعبد الرحيم تتصرف كيف ياعبد الرحيــم
ملهاش حل يمكن نايم غلط
حطيت المرتبة على دماغى ونمت على الأرض والمخدة فوق المرتبة لكن تحس شنيور اخترق كل المصفحات دى ودخل خرم دماغك
مفيش فايدة
وبكلم اللى معايا وهو فلاح فصيح من ابيس /اسكندرية
فقال /ياعم نصحيه هو نايم على جنب غلط
وراح منادى عليه ياحاج فلان
نعم
اتعدل
حاضر
واتعدل على الجنب التانى فعلا ومفيش 30 ثانية والزلزال رجع والله ولا فيلم توم وجيرى لما كان البيت كله يتهز من زلزال النمل
ده ايه الليلة البيضا دى
المهم منمناش طول الليل وم صدقنا الفجر أذن وصحيناه صحى شاف منظرنا ومات على روحه من الضحك واخواننا شافو منظرنا فهمو الموضوع وهات ياتريقة
ناس مرهقة بفتح (الهاء) بعد رحلة مرهقة(بكسر الهاء المرة دى) ومناموش شكلهم طبعا تحفة
وبعدين سأ لته بعد الصلاة
كان فى زلزال عندنا فى المربوعة طول الليل
فضحك وقال / أه تقصد الشخير
أيوه
انا محتاج عملية جراحيه هتتكلف 27000 جنيه
انا وبغيظ / ليه ياعم هيركبولك مناخير تانية ؟؟
فقال/ لأ أصل انا عندى عيب معين فى المناخير بيطلع الصوت بالمنظر العالى ده
وهتعمل ايه
ولاحاجة اللى متضايق منى يعمل لى هو العملية على حسابه
على كده المدام مقدمتش استقالتها (طلبت الطلاق بس بهزار)
المدام اخدت على كده (مش عارف حاسس ان دى نصباية)
معقول حد ياخد على كده؟؟؟؟؟؟؟؟