اولا ربنا يعينك علي مصاريف العربيه
لان اي عربيه هتحتاج فلوس و كتير
البنزين مثلا وده اول حاجه
التانك 47 لتير وهتمون بنزين 92 ب 185 قرش احسبها انت بقي
لو مشاويرك كتير هتمونها مرتين و نصف تقريبا يعني سكت 180 جنيه شهريا
بالنسبه للسحب كويسه ماشاء الله
تكيفها تلاجه فعلا
العفشه حلوة بس هي ناشفه يعني مطباتك تاخدها براحه مهياش زي الدايو ولا الشيفورليه
بس تدلها 8/10
الشاه الي شوفتها دي شاشه الكاست لانه ديجيتال
فراملها كويسه و جدا علي حجمها وبالانظمه الجديده ABS و EBD
ال ABS ده بيمنع العربيه عن الانزلاق لو فيه مطر او حتي رمل
EBD بيوزع قوة الفرامل علي العجل حسب حموله العربيه و ده مهم جدا
وكنت قريت ان فيها اير باج بس مش متاكد من ده لان ابوالفتوح بيشيله
بالنسبه للسفر في الطريق الناعمه كويسه جدا يعني عايزة طريق اسفلته عدل و مش بايظ
يعني مثلا طريق الاسكندريه منهم لله متعرفش تزود بيها عن 120 لانها هتعوم
لو طريق افضل حبه زي القاهره " بعض اجزاء منه " تجيب بيها 150
بس عموما العربيات الهاتش باك تخاف منها لان ضغط الهوا بيها بالسرعات العاليه خطر
لو بتسافر كتير لو بتحب السرعه هات عربيه سيدان
مجملا العربيه كويسه و تعتبر افضل من كل منافسيها
بس لو معاك 15 الف زود و هات الm11 او 516
افضل كثبات و كبنزين
ولو انت مش من هوات السرعه من الاصل وعايز عربيه تمشي و خلاص بس تكون كويسه وزيرو
نصيحه اي عربيه تجبها حولها غاز
هتمون ب 5 جنيه وهتقعد نفس المده البنزين تقريبا
بس حط في الاعتبار ان موتورك هيقل عزمه و وقته 15 %
فكر بدقه اكتر و تمعن في كل الانواع و شوف ايهم الاقرب لاحتياجك وربنا يعينك
ومبروك مقدما