|
رد: صيانة سريعة لعدادات الابيزا ..
موضوع متميز جدا أستاذ محمد .. شكرا لك ..
لكن تفتكر حضرتك لو أنا حاولت أعمل الصيانه دى عندى ، هقدر ؟؟
يعنى الموضوع سهل فعلا .. ؟؟ أحاول وأتكل على الله ؟؟
أنا بحب أعمل حاجات كتير بنفسى فى العربيه ، لكن مجربتش الحكايه دى خالص ..
يمكن وجود العربيه فى جراج البيت هو اللى بيشجعنى إنى أجرب بإيدى الحاجات السهله ..
على فكره أنا مره وصلت لعيب حصل عندى فى العربيه ، كل الكهربائيه وقفوا عاجزين أمامه ومقدروش يعرفوا العيب منين ..
أحكى لحضرتك يمكن تكون فيه ولو ذرة إفاده لباقى الزملاء .. مره من حوالى 4 شهور العربيه قطعت خالص ورفضت تدور .. الكهربائى قال دا عيب موبينه .. إشتريت موبينه جديده أصلى ميد إن جيرمانى وكان سعرها 290 جنيه من أصل 400 جنيه ، لكن حضرتك عارف إن البنات دايما شاطرين فى الفصال !! هههههههههههه
المهم يافندم الكهربائى ركبها .. ودارت العربيه من أول تكه .. مش أسيب الموبينه البايظه فى حالها !! لأ مش أنا ..!! مسكتها فكيتها ، لقيتها بتتكون من جزئين .. الموبينه وفيشة الموبينه اللى بيركب فيها الجاك اللى رايح للأكسراتير .. تمام .. !!
تانى يوم خرجت بالعربيه .. وبعد شويه لقيتها بتبطل لوحدها .. أدورها تدور وأحيانا متدورش .. الغريبه إنى لاحظت إن عداد الآر بى إم وقف ومش شغال !! لما يشتغل العربيه تبطل !!
ولما يبطل العربيه تدور تمام !!!!!!!
شيخ الكهربائيه وقف محتار ومعرفش يعمل إيه !! ولا عرف العيب فين .. وقالى الإكسراتير باظ !!
أنا فكرت شويه مع نفسى .. وفتحت الجراج وقعدت مع العربيه .. فتحت الكبوت ، وفصلت فيشة الموبينه الجديده ، وفكيت الموبينه وطلعتها بره خالص .. وحطيتها قدامى جنب أختها البايظه ..
فكيت فيشة الموبينه الجديده وركبتها للموبينه القديمه وربطتها كويس .. وربطت الموبينه القديمه جوا العربيه ووصلت الجاك .. ودورت العربيه .. دارت وتمام التمام وعداد الآر بى إم إشتغل .. والعربيه مبطلتش .. خرجت بيها .. جربتها .. لقيتها تمام ..
ومن يومها وهى شغاله بالموبينه القديمه + فيشة الموبينه الجديده !!!!!
مع العلم إن الموبينه القديمه دى كانت إستيراد !! كنت جايباها من بورسعيد ب 50 جنيه !! فعلا الأصلى أصلى !! والجديده رغم إنها غاليه والمفروض إنها شغاله 100 % لكن فيشتها طلعت بايظه أو مش متوافقه مع الموبينه !! تخيل !!
طبعا لو شيخ الصنايعيه وقف على شعر راسه ، مكانش هيعرف العيب فين ..
دوشت دماغك يا فندم .. أنا آسفه ..
تفتكر هقدر أعمل صيانه للعدادات ؟؟
|