كنت في ابو رواش ولاقيت زحمه داخل قاعة العرض قولت ابص اشوف في ايه وكانت المفاجأة اني شوفت هيوانداي سوناتا الجديدة 2011 والناس عماله تتفرج عليها من بره
روحت داخل بقلب جامد وسطيهم وفتحت العربية ونزلت فيها تصوير لما هريتها
بس من حظي الوحش ان موبيلي كان قريب يفصل شحن
بس فضلت اصور لحد ما الموبيل فصل شحن مش مهم بس ديه فرصه متتعوضش
شوفو الصور وقولولي ايه رايكم
طبعا ده شكلها الخارجي جميل جدا بس من الزحمة صورته علي 4 مرات تقريبا
الدريكسيون بتاعها جميل جدا وفيه نقل حركة + و - وفيه زاراير تحكم كتيرة جدا
عداد السرعة بتاعها 260 كيلو في الساعه
طبعا ده الار بي ام بتاعها
التابلوه بتاعها جميل جدا وفيه امكانيات عالية جدا
مجموعة الزراير ديه جنب اوكرة الباب مش عارف وظيفتها ايه بس قولت اصورها بردك
انا مش عارف ايه الدواسه اللي جنب البنزين والفرامل ديه تقريبا كدا فرامل يد والله اعلم
تقريبا ديه زارير تسخين الكراسي
طبعا ده الفتيس الاتوماتيك بتاعها
وده مخبأ سري للكوبيات والكنزات
ديه الولاعه وجنبيها مفتاح USB و AUX و IPOD
ده الماتور بتاعها حاجه روعه وفاتحته والناس مستغربه ايه اللي انا بعمله ده لدرجة انهم افتكروني مسئول المعرض
تصدقوا فيها فتحتين سقف واحد اودام وواحد ورا
وديه صورة وانا قاعد في الكنبية الخلفية
وبكدا نكون انتهينا من الصور ومن وموبيلي اللي فصل شحن
والي اللقاء في معرض من معارض اونكل غبور وربنا يخليه لينا ودايما كدا ينزلنا عربيات من غير اي اوبشن فيها
وديه عربيتي وهيه في العناية المركزة بيعلقولها كلوكوز علشان كان عندها هبوط في اليوم ده من الحر
واي خناقة يا رجالة انا في الخدمة