[TELEBK]

الحمد لله رحت التوكيل ، وقابلت المهندس وطلع الصوت ده شئ طبيعي لإني بأرفع رجلي من علي الدبرياج بسرعة ومن غير ما الغيار والأسطوانه تلحق تعشق ، وده يمكن أنا إتعودت عليه من سواقتي للعربية اللي قبل ديه وكانت علي كبالن ، بس الحمد لله المهندس طمني وحظبت نفسي عليها ، وطلع شئ طبيعي فيها ، وعلي العموم العربيه مش وحشه هيه كويسة والكاسيت بتاعها صوته كويس ، وتحس وإنت راكبها إنك متحكم فيها كويس ومسيطر علي العربية ولامم كل أبعادها بعنيك وده يرجع لحجمها الصغير في فئة الجيب ، وبالنسبة للماتور هوه ماتور مصنع في الصين في شركة ميتسوبيشي ، وحمال قسية يعني تقدر تقرص عليه وحيستجيب معاك ، والعفشة بتاعتها كويسة وتتحمل الطرق بتاعتنا وممكن تسوق بيها في الرمل وإنت مطمن إنها ماتغرسش معاك لإن الكاوتش بتاعها عريض ، أنا سوقت بيها في طريق مدغدغ وبسم الله ماشاء الله كانت كويسة وإستجابت معايا ، وعلي فكرة كل قطعة في العربية مكتوب عليها " Made in chaina يعني إنت عارف إنك راكب عربية متصنعة كلها في الصين ، مش عربيه بعد ماتشتريها تلاقيها متجمع كل قطعة في بلد ، والإسم كوري أو إيطالي ، هيه العربية بصراحة بيظهر فيها بعض العيوب لكن الحق يقال عيوبها أقل بكتير من الجيل الأول منها ... أه هيه زيرو لكن تعالي شوق توكيل المرسيدس قبل توكيل المسلمي بأمتار قليلة حتلاقي عربيات كتير وزيرو بتتصلح فيه ... متهيألي عن نفسي بأحمد ربنا علي العربية وبأقول أهيه علي أد فلوسي بدل ماكنت رحت أشتريت بنفس سعرها عربيه مستعملة بقالها كام سنه أه ماركة وحاجة متجربه ومعروفة لكن برضة صاحبها باعها لسبب يعني لوكان فيه الخير ماكان رماه الطير علي الأقل راكب زيرو وربنا يسترها ، نصيحتي ليك ، توكل علي الله , وهيه العربية شكلها مش وحش بالعكس ديه فخمة وأبهه بتدي لصاحبها برستيج عالي أوي في أي مكان ، أنا عرفت إن التصميم الجديد بتاعها من عمل شركة إيطالية ودول ناس أساتذه في التصميم بكل أنواعه وده إللي خلاها تاخد شكل مميز عن الجيل الأول شبه التريوس والناس بدأت تتجاوب معاها ، بالتوفيق .
د / خالد