الكرايسلر يا باشا كانت مع اكتر من واحد من اصحابى
و كانت تتنوع بين M300 و Concorde
تتميز زى ما حضراتكم تفضلتم بانها من جوة صالون فخم و مريح جدا و خامة جلد الكراسى كانت ممتازة و مريحة ...و انا كنت باخد 300 M من صاحبى كتير اسوقها لأنى كنت بعت عربيتى و لسة بدور على عربية تانية .. و احنا كنا ساكنين مع بعض
المهم .. ما شاء العربية العربية كانت قوية جدا 3500 سى سى و الثبات بتاعها كان ممتاز بالنسبة لباقى الامريكانى لأن كرايسلر تستعين بتكنولوجيا مرسيدس فى اجهزة التعليق
تكييف كويس جدا ... سى دى تشينجر و كاسيت ... و شياكة داخلية
و دى شوية صور حلوة ليها تبين الفخامة و الشياكة
http://www.allpar.com/reviews/300m.html
انا عن نفسى بصراحة كنت بستمتع جدا بسواقتها ......
اما عن العيوب ... و محدش يزعل ....
فهى تتمثل اولا فى انها جر امامى و ده مش مناسب خالص لعربية بالقوة دى و لعبت من صاحبى كذا مرة و لولا ستر ربنا كان خيش لأنه بصراحة كان مجنون جرى و لو مكنش عداد العربية مقفول على 190 كان زمانه راح من زمان
و فى رداءة الخامات الداخلية للتابلوة اللى كان مشقق عند اصحابى كلهم بلا استثناء
لما تفتح الكبوت .. علشان تغير البطارية مثلا عاوزة شغل 3 ساعات فك و تركيب و طبعا مش اى حد بيفهم فيها
مؤخرا بقت العربية بتهيس تهييس مش طبيعى ,, اشى الكومبيوتر ضرب.. الجيربوكس ضرب.. اعطال غريبة ومكلفة جدا جدا ...
فراملها كانت ضعيفة نوعا ما بالنسبة لقوة محركها...
العربية واطية جدا على الارض فا مع مطبات مصر كمان تبقى عييييشة
سعر اعادة بيع متدنى للغاية ,, ده اصلا لو حد رضى يشتريها منك
بس يا بشوات ... و دى كانت تجربتى مع الكرايسلر