المكان: ابو ظبي اوائل عام 2006 و كانت نازله بقالها سنه و كانت مع واحد قريبي هناك كان يدوب لسه شاريها(حوالي 110 الف جنيه مصري!!!!)
و كان بيفاضل بينها و بين الكامري مع ان الياباني واخد سمعه جامده في الخليج بس هو فضل البيجو عنها.
طبعا العربيه ال 407 خليفه ال 406 في نفس الفئه يعني بتنافس في الفئه المتوسطه و اقرب منافس ليها الاوبل فيكترا و السكودا اوكتافيا و الباسات و طبعا بعيده عن المرسيدس سي كلاس و البي ام الفئه التالته .
من الخارج:
العربيه من قدام شكلها وهم طبعا و ماحدش ينكر كده نهائي و بيجو خدت الشكل دا و عممته علي كل العربيات الجديده بتاعها(207 و 307 المعدله اللي موجوده في مصر)
بس الضهر ماجاش زي ما انا متخيل يعني الوش احلي من الضهر بكتيير .
من الداخل:
ركبت العربيه و بصيت عليها كويس .التابلوه رائع و كل حاجه في متناول ايدك و خامات التابلوه نضيفه جدا اينعم مش بمستوي مرسيدس بس الصراحه يستاهل كل مليم يندفع فيها و الكونسول باللون الفضي ليحاكي الموضه السائده في التصميمات حاليا و كل المفاتيح التعامل معاها سهل جدا و فيها سي دي اوديو فقط و صوته بالمناسبه رائع مش محتاج تركب سماعات تانيه غير اللي فيها لو انت عاوز تسمع صوت نضيف بس و مش عاوز دوشه و كان فيه زرار للتحكم بالتماسكESP و فعلا لما كنت مش بشغله كنت بحس بفرق جامد في الملفات العدادات كانت الاضاءه بتاعها بلون احمر و عباره عن دواير و كان كل دايره عليها طوق نيكل و ابره العدادات كانت لما النور يقيد كان لونها بيبقي ازرق و بيعكس علي الدواير النيكل كان بيديها منظر حلو الصراحه في الاول معجبنيش تناسق الوانه بس بعد كده لقيته حلو جدا.الكراسي مريحه جدا و شكلها يوحي انها بيجو مش من اي شركه تانيه حتي فرش الابواب و مكان الاكره برضه بيجو مش عارف ليه افتكرت ال 504 ساعتها مع الفارق الشاسع طبعا بينهم و بين بعض :lol: .
المحرك و الاداء:
شغلت العربيه و سمعت صوت الموتور عادي مش ملفت اوي زي الهوندا بس عموما العربيه دي عربيه سياحيه مش عربيه رياضيه و علي فكره الموتور كان 2000 سي سي 140 حصان .
طبعا راكب جوه و قافل الزجاج و مشغل التكييف (ضروري هناك تشغل تكييف ما تعرفش تمشي من غيره معظم اوقات السنه) مش سامع اي حاجه من بره اطلاقا العزل بتاعها نضيف اوي .
زوايا العربيه هيا اللي كانت مشكله علشان ارتفاعها عموما و ارتفاع الشنطه بطريقه ملحوظه بس لما تتعود عليها ما يبقاش في مشكله .
سحب العربيه معقول مش حلو قوي يعني مش زي الهوندا سيفيك ال 2007 مثلا(سوقتها هناك وكانت 1800 سي سي) و كانت اوتوماتيك و فيها ستيبترونيك بس مالوش لازمه علشان لما كنت بقرص علي العربيه اوي كان ينقل لوحده.
السحب عموما كويس و انا وصلت لسرعه قصوي بيها 215 و كانت في منتهي الثبات و ممكن تزود عن كده لكن كان الار بي ام حيخش في الاحمر.وصلت من صفر ل 100 كيلو في حوالي 11 ثانيه و ثباتها مالوش حل الصراحه و علي فكره العربيه دي اجهزه التعليق بتاعها او اليايات و المساعدين الاماميه متركبه بزاويه ميلان زي سيارات الفورميلا واحد علشان الطريقه دي بتزود ثبات العربيه و فعلا كانت ثابته جدا جدا حتي بعد 180 كانت ثباتها معقول و فراملها كمان كانت فعاله اوي بس بتحس ب ال ABS لما بيشتغل و دا ضايقني شويه اني سمعت صوته كنت متصور انه من الجيل الاحدث بس عموما مش عيب قاتل يعني.الدركسيون بتاعها دقيق جدا بس مش بينقل ليك احساس الطريق .
و طبعا ما تحسش بيها في المطبات و دي لعبه بيجو من زمان من ايام ال 504 !!
فعلا ما تحسش بمطب ولا بحاجه العربيه سلسه جدا و تكييفها رائع و دي اول مره اركب فرنساوي و يعجبني تكييفه يمكن علشان لسه جديده الله اعلم بس عموما التكييف حلو جدا و عربيه ممتازه و علي فكره دي من اول العربيات اللي تكون متماشيه مع قوانين السلامه اللي حيتعمل فيها باوربا علشان المحافظه علي سلامه المشاه و دا اللي بيفسر ان الكبوت بتاعها قصير و تصميمها غريب كده(الياريس برضه متصممه علي نفس الاسلوب علشان القوانين دي)
تقييمي الشخصي:
سياره ممتازه بالنسبه لفئاتها و كنت اتوقع لها المزيد من النجاح لولا الجمارك
ايه رايكم بقي في العربيه؟طبعا اللي نازله مصر ديزل بس لو نفس القوه حتبقي بنفس نتايج التجربه ....
بعض الصور:
[IMG]http://www.**********.com/Nile/images/statusicon/wol_error.gif[/IMG] | This image has been resized. Click this bar to view the full image. The original image is sized 800x533 and weights 48KB. |
صالون السياره الرحب جدا مع لمسات الاناقه الفرنسيه المعهوده
[IMG]http://www.**********.com/Nile/images/statusicon/wol_error.gif[/IMG] | This image has been resized. Click this bar to view the full image. The original image is sized 800x533 and weights 62KB. |
الواجهه الخلفيه لل 407 و يزينها اسد بيجو بحجم كبير
[IMG]http://www.**********.com/Nile/images/statusicon/wol_error.gif[/IMG] | This image has been resized. Click this bar to view the full image. The original image is sized 1024x768 and weights 125KB. |
[IMG]http://www.**********.com/Nile/images/statusicon/wol_error.gif[/IMG] | This image has been resized. Click this bar to view the full image. The original image is sized 1024x768 and weights 164KB. |
الواجهه الاماميه الانيقه و تصميم مميز لخطوط المقدمه و الفوانيس و مصابيح الضباب