[m.genedy]

وفجأة سمعت اصوات كلاكسات من السيارات التى خلفى يصاحبها هزة غريبة فى سيارتى الستروين وفى البداية نظرت حولى لم اجد السيارات التى كان تسير بجانبى وعندما نظرت فى مراية الصالون
وجدت شرارة -نار- طالعة من سيارتى كثيفة وكبيرة جدا-ياليلة مش فايتة - مابقتش عارف اعمل اية -
فكرت اقف -لكن خطر جدا اقف مرة واحدة على الطريق السريع !! فى نفس التوقيت سمعت كلاكس على شمالى وكان من طارق صديقى يعطى لى اشارات بأن اذهب الى اليمينوهذا ما كنت متردد ان افعلة-وبنظرة للخلف وجدت انى تقريبا وحدى فى الطريق وكل السيارات تبتعد عنى ولم يتبقى الا انا فى منتصف الطريق وطارق على شمالى وشرارة النار تزداد -واتجهت يمينا حتى وصلت الى الحارة الخاصة بالطوارىء(اسعاف-شرطة -مطافى -بوليس)وتوقفت بالسيارة تماما ولم احرك ساكنا نظرت للخلف وجدت ان النار قد اختفت ولكنى مازلت فى السيارة ووقف امامى صديقى طارق وشاهدتة وهو يجرى مهرولا فى اتجاهى ويفتح باب سيارتى ويخرجنى منها وانا مستسلم تماما واخذنى بعيدا عن سيارتى وطبعا بعد ان اطمئن علي -وكان واضح اثر الخضة -
ذهبت معة لنرى ماحدث فى السيارة طبعا لا انسى-- كمية التعليقات والكلاكسات اللى سمعناها
من السيارات التى كانت خلفى-واول تعليق سمعتة من طارق انة توقع ان السيارة كلها تولع او تتقلب -لكن ربنا ستر
ذهبنا لنرى ماحدث فى السيارة واسباب هذة النيران والشرارات الكثيفة وهلعنا عندما وجدنا ان فردة الكاوتش اللى فى الخلف شمال- مخلوعة تماما من مكانها(هى دية الفردة اللى كانت نايمة وزودناها فى البنزينة)مخلوعة تماما من مكانها ومافيش مسامير ربطاها وفردة الكاوتش محشورة
بين بودى السيارة والجنط ووقتها قال طارق الحمدلله انها -ستروين -!!!!
طبعا نظرنا لبعض وفى وقت واحد وفى فم واحد وجهت له سؤوال وكذلك فعل هو
(( الله هو انت ماربطش المسامير بعد تغيير فردة الكاوتش))

نعم يا اخويا --(دة انا بقى بقولة )مسامير اية مش انت اللى كنت بتعملها -قاللى انا ثبتها بأيدى بس لكن لم اقرط عليها -يالا قدر الله وماشاء فعل وستر ربنا ان السيارة انخفضت بعد ان انخلعت فردة الكاوتش ولهذا لم تطير بعيدا واتزنقت بين الجنط وبودى السيارة ولكن الشرارة كان سببها ان الجنط كان يحتك بالاسفلت-طيب والحل-طبعا مافيش لسة لا تأمين ولا حاجة خالص-حتى خدمة النداء الالى- مش ح استفيد منها!!
وكان اقتراح طارق ان نحاول نعيد فردة الكاوتش مكانها واذا امكن -ناخد من كل فردة كاوتش من الثلاثة الاخرين -مسمار-(يعنى زى من كل رجلا قبيلة كدة ) ونحاول نركب فردة الكاوتش وبرغم انة كان هناك اعوجاج فى الجنط المصاب الا ان الفكرة نجحت واصبح كل فردة كاوتش فيها ثلاث مسامير فقط اكملت قيادة حتى اول جراج اعرفة -وحمدت الله انها عدت على خير طبعا تركت السيارة امام الجراج وانصرفت مع طارق فى سيارتة لاننا وصلنا متأخرين وكان الجراج مغلق-
والسبب اننا وبعد تركيب فردة الكاوتش اضطريت ان اسير بسرعة لا تتعدة ال50 كم فى الساعة وطبعا طارق -الله يكرمة - ماشى ورايا تحسبا لاى تطورات-تركنا السيارة امام الجراج وانصرفنا -

وقضى طارق معى بقية اليوم ونحن حقيقى فى حالة ذهول منما حدث ولكن ذهولنا لم يمنعنا من تبادل القفشات - خاصا عندما كان طارق يوصف حالتى وانا جالس فى السيارة بعد ان توقفت بهاولم افكر فى النزول منها مسرعا كما كان متوقعة هو او كما كان مفروض ان يحدث--
لم احكى لزوجتى ماحدث وحتى لا ازعجها وانتهى اليوم العصيب وثانى يوم ذهبت الى الجراج -طبعا بعد ما صحيت براحتى--ولكنى فوجئت ان السيارة لم تكن موجودة امام الجراج -(اية تاااااااانى)
ذهبت لصاحب الجراج وهو مصري واعرفة ويعرفنى جيدا وسألتة عن السيارة -ووجدتة ينظر لية متعجبا وبيسألنى
-اية دة انت بتسأل عن السيارة دية لية -تعرف صاحبها اوعى تقول انها بتاعة حد يخصك -ما تتكلم ياعم ساكت -
قلت لة منتظرك لما تخلص اسئلة -- ايوة دية سيارتى وانا اللى ركنتها هنا علشان لقيتك قافل امبارح وقبل ما اكمل له واحكى لية جبتها -لقيتة بيقول -يانهار مش فايت- دة انا اتصلت بالونش ييجى يشيلها لانها محطوطة قدام الجراج وتوقعت انها تكون بتاعة اى حد مش من هنا !!!!
-انا - وبسرعة مذهلة -الله يخرب بيتك -لية كدة؟ طبعا انا عارف ان الونش معناة 300 ايورو غرامة غير ضياع الوقت واجرات رخمة جدا - قاللى والله انا اسف جدا- بس هو انا يعنى اعرف منين؟
طبعا استغفرت الله وقلت قدر الله وماشاء فعل وقلت لة فعلا انت ماذنبكش حاجة - واجرى هو اتصال وحددوا له المكان الذى ذهبت له السيارة -وبالفعل توجهت الى هناك ولم يذهب معي ولكن ارسل معي احد الشباب الهولنديين الذين يعملون معة --
ونصحنى هذا الهولندى ان يتولى هو الحديث مع المسئولين وبالفعل قد كان - وقال لهم ان صاحب الجراج اخطاء عندما اتصل ليبلغ عن السيارة وانها مخالفة -وانة نسى يقول لصاحب الجراج عنها لنشغالة بتجربة سيارة خارج الجراج وقت ان سحبت السيارة وعلية - دفعت 180 ايورو فقط وعفيت
من غرامة الوقوف فى مكان ممنوع -لكن ال180 ايورو تكلفة الونش(()
طبعا بداية تسد النفس مع الستروين-واتعقدت منها من اول يوم-دفعنا الغرامة ورجعنا على الجراج وانا زعلان ومنزعج جدا وكان صاحب الجراج فى انتظارى - ووعدنى انة فى خلال يومين سوف تكون السيارة على مايرام والغريب انها عجبتة وسعرها عجبة جدا وقالى ان الهولنديين بيحبوا السيارة دية جدا-واقترح علي ان يقوم بعمل تجديد لها-التجديد السنوي- ووافقت وبعد اليومين ذهبت لاستلامها-وصمم صاحب الجراج ان لا ادفع الا حساب رسوم تجديد السيارة فقط
اما تكاليف التصليح وخلافة فكانتهدية منة طيب والله كويس الدنيا لسة بخير -ويمكن هو عمل كدة لاحساسة بالذنب بعد موضوع الونش-برغم انى انا اللى اعتبر غلطان- لكن المهم انة عمل واجب محترم ولكن هذا لم يبدل فى الامر شىء وبرضة فضلت شايل من السيارة دية ومش مرتحلها--وقبل ان اغادر الجراج قلت لة -- لو فى اى وقت لقيت زبون للسيارة دية بلغنى-لانى مش عاوزها ومش ح اركبها!!
فى نفس اليوم بالليل -قابلت الحاج -احمد لالة - وهو تاجر سيارات ومعظم شغلة فى السيارات المقطعة - وكثير ما يرسلها الى مصر فى كونتنرات-
وهذا الرجل الذى كان وقتها يبلغ من العمر 63 الا انة كان حارس مرمى لكرة القدم رائع وكان يواظب على الذهاب معنا كل يوم احد للعب الكرة فى احدى الصالات المغطاة -

قابلتة وبعد التحية والسلام سألتة بهزار -اية اخبار السيارات
ماعندكش حاجة لية ؟
يتبع

<!-- / message --><!-- sig -->