[kj1]

فكل مرة تحدث فيها حادثة إرهابية ينتظر الشارع كلاما جديدا وردود أفعال مختلفة، والحقيقة أنه لا يوجد أبلغ رد أكثر من أن القوات المصرية جيش وشرطة وقيادتهم على خط النار، فلا يوجد أدنى شك فى الاستعداد للتضحية، وأكيد طبعا كل مصرى بيقول لو حركنا ده يمين وجبنا ده شمال وطبقنا النظرية الفلانية كان قدرنا على موضوع الإرهاب ده، الحقيقة لا، وإلا كانت دول كتير قدرت.الواقع إننا لسنا فى حرب ميدانية تعتمد على القوة، بل نحن فى حرب معلوماتية تعتمد على المعلومة، شوية بودرة ومسامير وعيل دماغه مغسولة أنت ممكن بيهم تفجر أى مكان، وامشى بقى فى كل العواصم فى العالم فتش كل واحد شايل كيس صغير، مستحيل طبعا، فلو عندك أكبر قوات خاصة فى الشارع ده ليس هو المقياس فى محاربة هذه الظاهرة، بل بالعكس قد تكون كثرة القوات يجعلها فى مرمى نيران الإرهاب.ويبقى السؤال: ماذا نفعل؟ والأمانة تقتضى منا أن نجيب أنه لا أحد يعرف ولا أحد يملك الحل.
كل ما يمكن أن تقوم به فى هذه المرحلة ألا تكفر بما أنت فيه، بمعنى أن تداوم على إيمانك بالحياة وإيمانك بضرورة أن تعمر فى الأرض، وأن تعرف أنه لا يوجد شعب واحد على الأرض تستطيع حكومته أن تؤكد له أنه فى معزل عن الإرهاب.واقعد بقى هنا فى مصر اتكلم على تجديد الخطاب الدينى واخبط فى الأزهر اللى العالم الإسلامى بيحسدك عليه، أو اتكلم عن التقصير الأمنى، فى الوقت اللى ولادك فى الجيش والشرطة بيتسابقوا علشان يبقوا فى الصفوف الأولى فى هذه الحرب فبالمرة كسر معنوياتهم، لا وألف لا، ما حدش قادر على الظاهرة دى واللى يقول قادر يقولنا حمى شعبه إزاى. هو ضغط كى ترضخ وأنت وصلابتك، إما أن تتفكك كمجتمع من ضعفك وإما أن تمارس نوع من المواءمة السياسية من أجل أن تأمن.الغريبة بقى والمحير فى الشعب المصرى أنه قلبت معاه بعند، والكام سنة اللى فاتوا كل حادثة كانت الدنيا بتولع ومع ذلك الحياة بتمشى، أنا يوم استشهاد النائب العام اعتقدت إننا رجعنا للخلف مائة خطوة، لكن الحقيقة لم يحدث، وتغلبنا على الأمر واستمرت الدولة بكل أركانها، لا وارجع بقى من أول يناير ٢٠١١ لحد النهاردة شوف كم المحن اللى تعرضنالها وأنت تعرف أن صعب جدا الشعب ده يقع. فى الوقت ده بقى وعلى ما كل الدول تلاقى حل لهذه الظاهرة حاول بس تتقى الله فى بلدك، وتتغلب على لغة الإحباط لو كنا مليون مات مننا خمسين ألف لازم الباقى يعيشوا، ومش لازم نموتهم وهما أحياء، بلاش تكسر عزيمتنا وإحنا فى وسط الحرب، لو عندك معركة جانبية بلاش تستخدم الأوقات دى علشان تحقق مصالحك، عيب وقلة أصل. أما الرد على كل من يقفون خلف هؤلاء فسيكون بالفعل وليس بالكلام، فعل البقاء والتماسك والرغبة الحقيقية فى استمرار الحياة، وأكيد أنا وأنت عندنا أخطاء تعالى نحاول نصلحها بسرعة على الأقل عشان نقلل من خسايرنا اللى بتموت ولادنا ليل نهار.
يا كل مصرى مسلم ومسيحى البلد دى هى اللى لينا يانعمرها ونحافظ عليها لولادنا يا نموت فيها قبل ما يخدوها مننا.ويا ما دقت على الراس طبول، ويا إحنا يا هما، صلى على النبى ومجد سيدك وخللى بالك على بلدك.