[kj1]

خبر لذيذ أوي , تاجر حشيش جاب صفقة حشيش كبيره و سمّاها ( توكلت على الله ) , بيقول عشان ربنا يبارك لي فيها و مايتقبضشي عليا , بس اتقبض عليه !! , تلاقيك ماكنتش متوضي و انت بتسمّي الصفقه يا مولانا .
الخبر ده مش مفاجأه بالنسبالي , الحدوته كلها بتمشي بالعدوى , و العدوى هنا اسمها ( التجاره بدين ربنا ) , التجاره بالله مش مع الله .
الإرهابي اللي بيقتل و يفجّر و يحرق محولات كهربا و الإرهابي اللي بيدعمه بالتأييد و التفنيد و حتى الدعم المادي و طريقة شرح عمل قنبلة بدائية الصنع !! , مستحيل هتدخل صفحته عالفيس إلا و تلاقيها مرشقه بأيات قرأنيه و أدعيه , و طبعا صوره و هو بيصلي و هو بيحج و شوية كلام من اللي بيخلي الناس يتشحتفوا .
و الموظف الحرامي المرتشي اللي السبحه مش بتفارق إيده , مابينساش أبدا انه يعمل عمره كل سنه و يحج كل سنتين تلاته و طبعا موائد الرحمن أساسي , عشان ربنا يبارك له في الرشوه و الفلوس اللي سرقها .
و الشيخ الضلالي البهلول بتاع الجهاد و البكاء و الشحتفه , اللي عمل عشرات الملايين من خطابه الديني الضلالي , و سكن في فيلل و قصور و رمى شباب جاهل في سكة الإرهاب تحت مسمى الجهاد و حور العين اللي مستنيين على نار .
و مولانا تاجر الحشيش بتاع صفقه ( توكلت على الله ) , مفيش فرق , تجاره بالدين , شيزوفرنيا النصابين و الإرهابيين و اللصوص , اللي في النهايه يلزمها شريحه معينه أو قطيع معين من الشعب بتخدعهم الصوره في الحرم أو الدقن الجميله أو موائد الرحمن أو كلمتين في الدين أو فلان ده مسمي بنته عائشه مع إنه ارهابي و ابن كلب ( مش عارف هيفرق معايا ايه اسم بنته عائشه ولّا جولدا مايير ؟ ) .
شريحة البلهاء دي هي الخطر الأكبر على مصر , و الحل لازم يكون عند الدوله , الثقافه و التوعيه , للبيت و الجامع و المدرسه و الإعلام و الدراما , مطلوب خطة شامله متكامله للمواطن من يوم ما يتولد يتعلم و يفهم و يستوعب , ماتخليش حد يضحك عليك بإسم الدين , ماتخليش حد يركبك , ماتبقاش حمار , الحمير لا يدخلون الجنه , الحمير يدخلون الزريبه و الزريبه مفهاش حور عين , الزريبه فيها مداود و مختمه و تبن و برسيم .
منقوووووول