[kj1]

خالد أبو بكر يكتب:11/11 انتهى تنظيم الإخوان فى مصر للأبد..فى رئيس فى الدنيا هتقوم ضده ثورة يعوم العملة ويغلى البنزين قبلها بكام يوم؟
الرئيس السيسى ده مش سهل، إية الحكاية؟ الحكاية إن الجماعة الإرهابية المسماة بالإخوان وكل تنظيماتها ادعت أن محدودى الدخل «الغلابة» هيقوموا بثورة يوم 11/11 الماضى.
إذا من المفهوم تماما إن الرئيس اللى هاتقوم الثورة ضده يحاول أن يتخذ قرارات لمغازلة الشعب كنوع من التهدئة قبل اندلاع أمواج «الثورة»، ويتم البعد تماما عن أى قرارات من شأنها المساس بالمواطن البسيط، لأن هذا النوع من القرارات عادة يتم اتخاذه فى أوقات تتناسب مع حالة الشارع، فدائما تنصح التقارير الأمنية بإقدام الحكومات على قرارات رفع الأسعار فى أوقات معينة يتم دراستها بعناية، تحسبا لأن تأتى هذه القرارات بردود أفعال سلبية من الناس.وطبعا قبل 11/11 اشتغلت قناة قطر وقنوات تركيا على مصر، والغلاء والحالة الصعبة والحريات، والكلام اللى من النوع ده، حتى تنزل الجيوش المجيشة من الجماهير المصرية إلى الشوارع فى «ثورة» عارمة.لكن الرئيس السيسى قرر أن يتخذ قرارات للإصلاح الاقتصادى فى هذا التوقيت «قبل الثورة» معقول!!
يعنى يبقى الجماهير هاتثور ضدك يا ريس وقبلها بيومين تقرر تعويم العملة عشان الدولار يبقى بـ16 جنيه وتغلى البنزين؟ طب ده كلام؟
أيوه، هو ده الكلام.
هو ده الكلام اللى أنت كنت لازم تسمعه من زمان.
ولو أنا مش عاجبك أو مش واثق فيا انزل «الثورة».
طب كنت استنى سيادتك كام يوم لحد ما «الثورة» تعدى.
ما فيش وقت الإصلاح لابد منه وفى مواعيده ولكل داء دواء.
طب يا فندم الأمور دى بتأثر على شعبية الرؤساء.
ولا تفرق معايا.
طب سيادتك ناخدهم على مراحل.
أبدا، إصلاح فورى وبشكل قاطع وسريع.
وتم اتخاذ القرارات فى هذا التوقيت.
وعدى 11/11 وعدى موضوع تعويم الجنيه وعدى موضوع رفع البنزين ومصر كسبت غانا وولا حاجة حصلت، ولا الهوا.
طب يا إخوانا ده أنتم عندكم فلوس قطر والجزيرة وقنوات تركية فمع الإمكانيات دى لما تقولوا يا
«ثورة» نشوف حتى تمثيل مشرف! ولا الهوا.
طب أنتم كنتم وعدتم الناس إن مرسى راجع وأنكم هتحاكمونا كلنا طب عيب عليكم الناس استنت أى حاجة من الحاجات دى! ولا الهوا.
طيب أمريكا هاتضغط على مصر ومعاها كام دولة من الاتحاد الأوروبى ويحصل عزلة دولية على مصر، وأنتم شغالين على الموضوع ده بإديكم وسنانكم! ولا الهوا.
خلاص يبقى الهيكل التنظيمى لجماعة الإخوان فى مصر يتحرك لحشد الجماهير فى الشوارع، تعبيرا عن عدم الرضا! ولا الهوا والله عيب عليكم.
طب خلونا نتكلم بشىء من الشرح،الحقيقة أيها السادة أن جماعة الإخوان نشأت عام 1928 برئاسة الشيخ حسن البنا فى الإسماعيلية، وبدت فى بداية الأمر تتخذ منهج الدين والأخلاق، ثم بعدها بأعوام بدأت تتحدث عن حلول تتوافق مع الإسلام لقضايا مصر الاقتصادية والمجتمعية.
ثم مارست الجماعة السياسة بشكل واضح للجميع، وكان الرئيس عبدالناصر أول من اصطدم بهم، ثم أتى السادات، وحاول أن يعطى لهم فرصة فساعدوا من قتلوه.ثم جاء مبارك فتفاوض معهم تارة وسجن قياداتهم تارة أخرى، ووصل بهم الأمر فى عهده إلى أن حصلوا على نسبة هى الأكبر فى تاريخهم من مقاعد البرلمان المصرى.