المشاركة الأصلية كتبت بواسطة kj1
السعوديه على قايمة الإنتظار
.
1- امبارح مجلس الشيوخ الامريكي صوت ضد الفيتو بتاع أوباما ( اللي هو فيتو كده و كده يعني ) , و خلاصة الحدوته إن أقارب ضحايا 11 سبتمبر يقدرو يلاحقو السعوديه قضائيا ....
.
2- الحكايه ملهاش علاقه أوي بأقارب الضحايا ولا لها علاقه ب 11 سبتمبر ولا 34 اكتوبر , إنما لها علاقه بالإدارة الأمريكيه و تكملة مسلسل حرق و تخريب الشرق الأوسط ( و ابتزازه ) .
.
3- بالمناسبه مفيش صراع بين الإداره الامريكيه و مجلس الشيوخ , فيه توزيع أدوار مش اكتر , و الحدوته كلها بتبقى مُعدّه مسبقا , أمريكا و الدول الكبيره كلها بيخطط لها جهاز المخابرات , هو اللي بيوزع الادوار بين مؤسسة الرئاسه و مؤسسه البرلمان ( و مؤسسة الزكاه ) , و حدوتة البرلمان و الديموقراطيه هي حدوته جميله أوي شبه النيش بتاع العروسه كده , إنما الأمريكان صدّرو لنا فكرة إن النيش هو أهم حاجه في شقة العروسه .
.
4- يعني انت يا أوباما هتصدر فيتو , و انت يا برلمان هترفضه , و بعدين انت يا اوباما هتعض على شفايفك كده و يبان انك مستاء أوي من البرلمان اللي رفض الفيتو ده , بالظبط نفس المشهد اللي بتعضه فيه على شفايفك لما نصنع داعش بإدينا و نقولك اطلع اتكلم عنهم و قول هنحاربهم و نخرب بيت أبوهم , كَتْ , هايل يا فنان .
.
5- القرار بتاع ملاحقة السعوديه قضائيا هو وسيلة ابتزاز و لوي دراع من أمريكا للسعوديه مش اكتر , كده مدخرات السعوديه في امريكا بقت مكشوفه , و هيتلوي دراعها في حاجات كتير منها علاقتها و دعمها لمصر طبعا .
.
6- من الواضح ان السعوديه دورها انتهى في التحالف الأمريكي لخراب الشرق الأوسط , خصوصا بعد ما بقى حجم التدمير في الجيش السوري و الإقتصاد و البنيه التحتيه السوريه مرضي جدا لغرور الأمريكان و قوى الشر , يعني ممكن نكتفي بهذا القدر .
.
7- السعوديه دخلت التحالف الأمريكي و ايديها بقت غرقانه بدم أشقائنا في سوريا , و اعتقادي انها دخلت مضطره يعني على طريقة , انت معانا ولا مع الناس التانيين ؟ و انت شايف الناس التانيين بنعمل فيهم ايه ؟ خلاص معاكو يا باشا .
.
8- من أول ماتورّطت السعوديه في خراب سوريا و أمريكا استخدمتها كواجهه لذيذه لتحالف مزعوم بغطاء إسلامي وهمي , من أول يوم و انا متوقع ان السعوديه لما ينتهي دورها هييجي الدور عليها ( عشان المتغطي بالأمريكان عريان ) .
.
9 - على جنب كده , واحد من حلفاء أمريكا في حزب الخراب كان تركيا , و اللي حصل من كام شهر ( محاولة الإنقلاب الفاشله ) تفسيره الوحيد إنه قرصه ودن من الأمريكان لكلبهم أردوغان , يعني اعرف حجمك , احنا في ساعتين اتنين بنحرك قوات من جيشك و نعمل انقلاب عليك و نحتل بلدك , بالنسبالي المسرحيه الامريكيه دي أكدت لي ان الجيش التركي فستك , يعني بلح .
.
10- المهم احنا كمصريين و رغم اعتراضنا على موقف القياده السعوديه خصوصا في ملف سوريا لكن ماينفعش نتمنى الشر للمملكه , مش بس عشان حكاية الأشقاء العرب ولا عشان الكام مليون مصري اللي شغالين في السعوديه , انما السعوديه لو لاقدر الله دخلت في المفرمه ( بتاعة الشرق أوسط الجديد ) مصر هتلاقي نفسها عريانه , يعني من غيرضهر , بص عالخريطه كده ؟ بصيت كويس ؟ سوريا بح , و فلسطين بح , و ليبيا بح , و العراق بح , و السودان بح من بدري , كده مش فاضل غيرك انت و السعوديه , بتعكّزو على بعض ( و النبي خلّي كلامك عن الوهابيه و اركنو على جنب دلوأتي ) انا بكلمك عن معركة مصير .
.
11- الكلام اللي فوق ده مجرد توقع أو تخيل مني , يعني مجرد ظن , و ربنا يخيب ظني .
Mohamed hussein
منقوووووووول
|