شحنت العربية بالفريون بنفسي وغيرت الايدل
مساء الخير
اولا انا معايا فيرنا 2008 وبحب اعمل اي حاجة ممكن اعملها بدون الذهاب للصنايعية وده لاسباب كتير، المهم التكييف السنة اللي فاتت كان ضعيف جدا في بداية الصيف رحت لبتاع تكييفات حط العدادات عشان يشوف الفريون وبعدين شال العدادات في ثانية وقالي خلاص كده اتشحن قولتله نعم شحنته ازاي في ثانية قعد يحلف وقالي كده تلت شحنة وطبعا انا مش مصدقه وقالي كده خلاص بس روح للكهربائي عشان مروحة التكييف مش شغالة ونضف السربنتينة والتلاجة المهم اديته خمسين جنيه ومشيت
روحت للكهربائي عملت المروحة ونضفت التلاجة والسربنتينة والتكييف اشتغل كويس
ودلوقتي في اول الحر برضه التكييف مكانش شغال دخلت على النت واتعلمت اشحن ازاي نزلت شارع نجيب الريحاني واشتريت طقم عدادت ب 95 جنيه وطقم بلف عشان يركب على العربية ب 25 جنيه
وصامولة وبلف يركبوا على علبة الفريون واشتريت الفريون من اخوان رزق نص كيلو ب 30 جنيه وقبل الشحن غسلت التلاجة من تحت التابلوه كويس قوي وطبعا غسلت السربانتينة وقفلت الفتحة اللي بتدخل هواء من بره ولغتها وبعد كده شحنت وكشفت لو فيه تسريب مفيش حاجة الحمد لله والتكييف بقه كويس جدا من اول درجة بيسقع جامد، باقي بس الغي السخن من التكييف وده بالغاء مواسير اللي داخلة تحت التابلوه وده بيتم بانهم بيتوصلوا ببعض من عند الموتور عشان نكمل دايرة تبريد الموتور، نسيت اقول لكم ان علبة الفريون خلصت تقريبا تلتها بس، نيجي بقا على المشكلة اللي عندي التكييف لما بيشتغل بيهبط الموتور وبيبطل والمشكلة دي عندي من الصيف اللي فات وتعبتني جدا ومقلتش ليها حل فدلوقتي غيرت بوجيهات وسلوك البوجيهات والمشكلة موجودة رحت اشتريت ايدل عشان اللي عندي كان تعبان قوي وكل شوية يعلي العربية افتح الكبوت واخبط عليه عشان يعدل وطبعا بعد تنضيفه مفيش فايدة روحت اشتريت واحد النهاردة كوري ب 170 جنيه جديد نفس النوع اللي كان راكب في العربية، الوضع النهارده كالاتي التكييف شغال والعربية مش بتبطل وده كويس بس المشكلة ان العربية بقت عالية ومش عايزة توطي خالص مهما حركت في الايدل ارجو افادتي ومساعدتي اعمل ايه؟
|