انا والدى عليه رحمه الله عللمنى على البيجو 504 اللى هى معايا لوقتى
الله يرحمه كان بيحب العربيه دى جدااا لأنه كان شاريها زيرو و بيتعبرها عيل من عياله
لدرجه انه مابدئشى يعلمنى السواقه غير لما وصلت لسن 20 سنه بعد الحاح شديد من عمى
و كان يخليني اسوق العربيه مره كل شهر او اتنين و عند اول غلطه يزعقلى و يخليني انزل خوفا على العربيه
و بالتبعيه انا قولت النظام ده مش نافع
فبقيت انزل الفجر و اسرق العربيه بعد ما اعلم مكان ركنتها بالطوب علشان اعرف اظبطها زى ماكان ظابطها و بعد ما انزل امسح اثار الكاوتش فى الخمسيميت مره اللى بطلع فيها لقدام وورا علشان اظبطها مكانها اللى معلمه
و الحمد لله ربنا كان بيسترها و مره كنت راجع بضهرى و مره واحده فرملت "لغايه دلوقتى مش عارف ليه" و لاقيت بيني و بين عربيه جارنا (من اصدق اصدقاء والدى) يادوبك 5 سم
بعد بقى الكلام ده ب 10 سنين و بعد ماكبرت و اتجوزت و خلفت و جبتلى عربيه كمان كنا قاعدين ووقعت بلسانى و قولتله على مغامرات الفجر بتاعتى - لاقيته اتنرفز اوى و شويه كان حيضربنى
يا حج خلاص - انتا ازاى تاخد العربيه من ورايا يا ابن .... - ياعم ماجت سليمه - ولو ماكنتشى سلمت كنت حعلقك على باب العماره !!!
ملحوظه : والدى نفسه كان بيسرق العربيه من جدى هو و عمى فى الفجر - و اتعلمو السواقه برضه بالطريقه دى بإعترافهم
الظاهر ان ده عرق فى العيله عندنا
بس لو مهاب او زياد اولادى عملو الحركه دى حعلقهم على باب العماره عندنا و تبقى وقعت ابوهم سوده