مصر موتورز مجتمع السيارات - تغيير مساعدين التيجو لزيادة نعومة العفشة

بسم الله الرحمن الرحيم، طبعا كلنا عارفين ان العفشة بتاعت التيجو ناشفة جدا، والموضوع ده كان عاملي صداع في دماغي ومضايقني من العربية، طبعا اول حاجة فكرت فيها اني اغير المساعدين ، دورت في مصر في سلقط وملقط علي حد يقولي علي بديل للمساعدين، طبعا ملقيتش، سألت في التوكيل قالوا ما نعرفش، سألت بتوع قطع الغيار، قالوا مالهاش بديل، سألت العفشجية ابدوا يفتوا عليا، لدرجة ان واحد حاول يقنعني ان احنا نركبلها مساعدين الشيروكي، أقولوا ما ينفعش، يقولي لا ينفع، يا عم مش هدفع انا فلوس في مساعدين عارف من الاول انهم مش هيركبوا، قالي انا عندي جوز نجربهم، يا ابن التيتتتتتتتتتتتتتتتتتتتتت تتتتتت.

المهم كان في اختيار المهندس محمد حمدي لتعديل المساعد الاسكودا، بس بصراحة ما كنتش مرحب بيه قوي لانه بيعتمد علي الصنايعية، وقطع زيادة او نقصان ممكن ما يركبش، المهم بالصدفة قابلت واحد صيني، وكنا بنتكلم علي العربية وسألته علي المساعدين، قالي الموضوع سهل جدا ، هات مساعد التويوتا راف 4 موديل من 2000 - 2005، كده الموضوع بأه سهل، أدور علي المساعدين المونرو، مش موجودين، الكوني مش موجودين، الاصلي بتوع الراف مش موجودين ال KYB مش موجودين، ايه الحوسة ديه، مفيش غير الاستيراد.

توكلت علي الله وقررت استورد جوز مساعدين، طب اجيب ايه طبعا نفسي في الكوني بس غالي جدا، يبقي انا واقف علي المونرو أو ال KYB، لقيت الاتنين غاز والاتنين تقريبا بسعر واحد قولت خلاص خلينا في اللي معانا رقمه وبلاش فتي.

اشتريت ال KYB وشحنته علي مصر، طبعا وصل بضعف سعره بس كله يهون عشان خاطر التيجو، روحت للعفشجي، فك يا ابني وركب، في ربع ساة كنت مركب الاتنين الحمدلله، ركبوا مكان الاصلي بالظبط من غير اي تعديل، او فك وشيل،وخت العربية وطلعت اجرب، ما شاء الله في اختلاف كبير جدا في النعومة، العربية احسن بكتير والهبد بتاع الطريق اقل بكتير جدا، حتي فواصل الكباري ما بقتش باينه زي الاول، علي السرعات، جربت لغاية 140 مفيش فرق في الثبات، ولسه بجرب وابلغكم.

وأخيرا انا مستعد لأي سؤال.