مصر موتورز مجتمع السيارات - لو حد نضف بلف الايدل قبل كده يساعدنى ارجوكم

يا جماعة انا فكيت البوابة انا والميكانيكى علشان انضف الايدل (عربية اوبترا) ولقيت الاتى:
1-فى فيشه داخلة فى حتة سوداء فيبر فى البوابة من تحت والحتة السوداء دى داخلة فى بلف الايدل طبعا انا فى بالى ان دى فيشة حساس tps
والحتة السوداء دى هى الحساس
2- شيلت الفيشة دى وخراطيم المية اللى داخلة للبوابة وخارجة منها وفكينا البوابة 3مسامير وصامولة
3-والبوابة فى ايدى ببص على البلف (انا لحد دلوقتى متخيل ان ده البلف مش حاجة تانية) لقيته متغطى بغطا فيبر كبير مربوط يجى ب6 مسامير الانكيه مش مسامير عاديه
4-فكيناهم وبفتح الغطا ده لقيت حاجات غريبة الشكل اول مرة اشوفها تروس بيضاء كبيرة وصغيرة كأنه موتور صغير وفيه سيور صغيرة كمان طبعا لما لقيت كده قفلته وقولت اكيد انا فتحت حاجة تانية لأن ده مفهوش حاجة تتنضف وده مش زى بلوف الايدل اللى شفتها على اليوتيوب.

فيا ريت يا جماعة اللى يعرف يقوللى ايه ده بالضبط ولو ده مش بلف الأيدل امال هو انهى لأن عندى مشكلة دلوقتى ان الrpm على السلانسيه من اول لما ادور العربية لحد ما ابطلها (يعنى وهى باردة او سخنة بس وهى باردة اكتر) فيه رعشة منتظمة كده كل 3 ثوانى ينزل وبعدين يطلع وطبعا الكلام ده بيظهر فى الموتور اساسى تحس ان فيه غلطة فى السلانسية بتحصل بايقاع منتظم وسألت كتير وقالوللى الايدل او الtps قلت انضفهم فحصل اللى حصل رأيكوا ايه.

طبعا مع المشى العربية كويسه لكن بلاحظ وانا مشغل التكييف وماشي على غيار معين التالت مثلا وشيلت رجلى من على البنزين من غير ما افصل الغيار ان العربية تكلبش وعداد السرعة بينزل بسرعة قوى لكن ده مش بيحصل من غير التكييف وبتهيألى دى لها علاقة بالأيدل لأن الوضع كده من غير بنزين يبقى سلانسيه.

مستنى ردودكم وخبراتكم وعذرا للاطالة.