تجربتى مع صيانة تكييف الافانتى ...
 

السلام عليكم ورحمة الله ...


ازيكوا يا جماعة .. كل سنه وانتوا طيبين وبصحه وسعاده ودايما الى الله اقرب ...


حبيت احكيلكوا تجربتى مع تكييف الافانتى النهارده ..

السربنتينه اللى عندى كان فى الضياع وكنت محتاج سربنتينه تانيه .. نزلت "الشونه" ادور عليها استيراد واكتشفت ان التجار مستغلين الجو النار ومغليين اسعار قطع غيار التكييف ..

وبالمناسبة دى احب انبه بعد كده باذن الله قبل ما الصيف يدخل .. يعنى على شهر 3 كده ولا حاجة .. اللى عنده مشكله فى تكييف عربيته او حتى محتاج شحن بس يعمله بدرى وهيوفر جامد ...

المهم قعدت ادور على واحده نضيفه لغاية لما لقيت قطعيه اماميه لعربيتى وطبعا السربنتينه راكبه فيها ... يعنى لا اتخبطت ولا اترزعت ولا غيره ..

عاوز كام يا عم فيها .. قالى 450 جنيه ..


ننننننننننعم .. 450 جنية ليه .. دا لو فى الشتاء كنت جبتها بـ 150 جنية يا عم انتا ..

لسه هيقول اصل وفصل والافانتى اصلها حاجتها قليله .. مع العلم ان الحمد لله حاجتها متوفره فى بورسعيد جدا ..

قلتله بص احنا صايمين وانا مش عاوز احرق كلام كتير .. اللى انا هدفعه فى سربنتينه يوم لما تتمعظم اوى وتكون حالتها زيرو 250 جنية ..

مينفعش يا باشا ومش عارف ايه .. قلتله خلاص كل سنه وانتا طيب .. ولسه هسيبه وامشى قالى استنى لحظة بعد اذنك وراح مكلم صاحب المحل وبعدها قالى ماشى ..

فكلى السربنتينه وافتكرت انى هحتاج الفلتر بتاعها برضو .. قلتله انا عاوز الفلتر ده هتحسبهولى بكام .. قام مكلم الراجل برضو قاله هيعمل 120 جنية (مع العلم انو جديد بـ 150) .. قلتله هاته اكلمه .. قلتله بص يا باشا انا مش هدفع غير 300 جنية فى السربنتينه والفلتر .. وانا لو لفيت هجيبها ارخص بس الجو حر وانا عاوز اخلص وكمان مش هاين عليا امشى بعد ما تعبت الصنايعيه بتوعك ...المهم قالى عاوز 350 اخر كلام .. قلتله خلاص مفيش نصيب .. ولسه همشى .. قام ندهلى للمره التانية وقعد يتحايل عليا طب هزها شويه طب هات 325 قلتله 300 ميزيدوش مليم وانا كده اخدها غاليه ..

واخيرا اخدتها وطلعت على كهربائى التكييف بتاعى قالى ممتازه وكبسها هوا لاقاها تمام الحمد لله ...

ركب السربنتينه وكبس هوا وسابه نص ساعه الحمد لله تمام ومفيش تسريب .. كشف ع التلاجه لاقاها نضيفه وتمام الحمد لله .....

شحن الفريون وتمام التمام وظبطلى واير بتاع السخن والبارد وكله تمام الحمد لله ...

والتكييف بقى تلاجه ولله الحمد .. انا برضو منتظر اجربه بكره الصبح علشان احكم كويس ......


المشكله بقى اللى مضايقانى ان الموتور الخاص بتغيير مكان خروج الهوا اتحرق وقالى انى صعب الاقيه بيتباع لوحده .. وبضطر حاليا لو حبيت اغير مكان خروج الهوا يبقى يدويا بلف بكره موجوده تحت جنب دواسه البنزين .....

يا ريت لو حد يعرف ايه حل الموضوع ده يفيدنى يا ريت ....


حابب برضو اقول ان الصنايعى اللى انا بتعامل معاه امين جدا ومحترم جدا ما شاء الله عليه وانصح بيه اى حد من بورسعيد عاوز يظبط تكييف عربيته ...

انا مجربه قبل كده فى عربيتين بتوع اصحابى غير بتاعتى ..

هوندا سيفيك 96 كانت محتاجة شحن وتنضيف مروحه وتلاجه .. وعملها بكفائه تامه

و دايو سيلو 96 شحن تكييف وبعدين قعد يوم وسرب ولما راحلوا تانى اكتشف ان فى ماسوره اتخرمت .. وعملهالو وشحنلوا تانى ومحاسبوش الا على مصنعيه وتمن الماسوره فقط لانها غلطه منه ...

يعنى راجل محترم وانا حبيت انوه عنه لان فى كتير من ورش التكييف شغاله نصب فى نصب ...

هو اسمه محمد حامد وعنوان الورشه . حرفيين الزهور بجوار فضالى بتاع الكماليات ...

وده تليفونه : 01224910088

لو حد راحلوا يقوله بس انا من طرف حسام صاحب الأفانتى .. ويشوف الواجب اللى هيحصل معاه شكلوا ايه .....

حبيت انقل تجربتى ليكم ويا رب تستفيدوا منها .. واسف جدا للاطاله .....


وكل سنه وانتوا طيبين يا احلى اعضاء فى اجمل منتدى :Wkiss5:

رد: تجربتى مع صيانة تكييف الافانتى ...
 

وانت بالصحة والسلامة يا باشمهندس حسام

انا عندى استفسار بخصوص تغيير السربنتينة الخارجية إزاى دى مالحقتش والمفروض ان العربية جديدة يعنى اقل واجب 10 سنين قبل ماتتغير

أسعار القطع الإستيراد مشابهة اوى لمصر مع العلم ان عندكم مالز وطاب

تقريبا والله اعلم يفضل فلتر الفريون يكون جديد

هل لازم نكبس هوا ونقعد نص ساعة ( لو الناس هنا فى مصر عملوا كده هتلاقى طوابير عند بتوع التكييف ومش هيخلصوا قبل الشتا )

شكرا جزيلا للسرد الرائع للموضوع :36_13_6[1]::120105~352:

رد: تجربتى مع صيانة تكييف الافانتى ...
 

اقتباس:

انا عندى استفسار بخصوص تغيير السربنتينة الخارجية إزاى دى مالحقتش والمفروض ان العربية جديدة يعنى اقل واجب 10 سنين قبل ماتتغير

فعلا هى عمرها طويل .. بس هيا كانت مخبوطه زمان ومش نافعه ..

اقتباس:

أسعار القطع الإستيراد مشابهة اوى لمصر مع العلم ان عندكم مالز وطاب

هههههههه طب اتفضل معانا يا باشا ....

الاسعار هنا اقل من بره المفروض .. بس احيانا بيكون فى تشابه فى الاسعار فى قطع الغيار المتداوله ....

اقتباس:

تقريبا والله اعلم يفضل فلتر الفريون يكون جديد

فعلا .. بس هو برضو من القطع المعمره .. وانا جايبه من على قطعيه نضيفه مع السربنتينه يعنى حالته شبه جديده ...

اقتباس:

هل لازم نكبس هوا ونقعد نص ساعة ( لو الناس هنا فى مصر عملوا كده هتلاقى طوابير عند بتوع التكييف ومش هيخلصوا قبل الشتا )

يفضل طبعا تطول شويه علشان تدى فرصه لو فى تنفيس صغير يبان .. فبتكبس هوا على ضغط عالى شويه وتحفظ قرايه العداد وتفضل تراقبه لغاية لما تتاكد انها فضلت زى ما هيا .....

والراجل علشان شغله نضيف وامين بيعمل كده ...

اقتباس:

شكرا جزيلا للسرد الرائع للموضوع :36_13_6[1]::120105~352:

اشكرك على مرورك الكريم يا باشا وكل سنه وسيادتك طيب ...

رد: تجربتى مع صيانة تكييف الافانتى ...
 

جزاك الله خيرا يا استاذ حسام موضوعك جالى فى معاده
لسة فى اسكندرية واحد صلحلى التكييف بس نصحنى اجيب كومبريسور من بورسعيد فكنت ناوى لو جبته من هناك يبقى الحق اركبه هناك عند واحد كويس
فإن شاء الله احوش و فى زيارتى الجاية لبورسعيد حروحله و لو قالى فعلا كومبريسور اجيبه من هناك و هو يركبهولى

رد: تجربتى مع صيانة تكييف الافانتى ...
 

طب الحمد لله يا باشا انه جاى فى معاده ..

طبعا يفضل انك تجيب الكمبريسور من هنا .. ارخص وتقدر كمان تضمن حالته ...

وبعدين باذن الله تروحله .. وهيعجبك شغله اوى يا استاذ احمد باذن الله ...

ومتنساش تقوله انك من طرفى علشان يعمل معاك واجب باذن الله .. لانى مظبطه وجايبله شغل كتير .. ولما تنوى حضرتك باذن الله حتى عرفنى واكلمهولك .....

وبالتوفيق يا باشا ...