مصر موتورز مجتمع السيارات - عدم استخدام حزام الامان هو احسن طريقة للشعور بمشاعر البلية جوة علبة ....و العربية عمالة تتقلب

مصر موتورز مجتمع السيارات (https://www.masrmotors.com/vb/index.php)

- سلامتك على الطريق (https://www.masrmotors.com/vb/forumdisplay.php?f=8)

عدم استخدام حزام الامان هو احسن طريقة للشعور بمشاعر البلية جوة علبة ....و العربية عمالة تتقلب

للمرة التانية بتكلم عن حزام الامان علشان ربنا ينجينا من المخالفات !
صدمت و اتألمت لما كنت مرة مسافر على الصحراوى و لقيت العربية الى قدامى فيها اطفال واقفين على الكنبة و بيبوصوا من الازاز الى ورا و بيعملولى باى باى !!
باي باي ايه ؟ !! يا نهار اسود
مشيت بسرعة و علشان ملبخش ابوهم الى سايق استنيت لما هدينا علشان تحويلة و قولتله لو سمحت يا ريت اربطهم بالاحزمة

قبل ما كمل يا ريت الشعور اللا ارادى بتاع هذا يحدث للاخرين و ليس انا ..... نحاول نطرده من عقلنا الباطن
لان بمجرد ان العربية اتحركت فهى اداة قتل محتملة بالاخص بطريقة سواقتنا فاذا لسة محصلش حادثة ( و الحمد لله ) فده معناه ان لحظة الوصول ليها بتقرب ( ربنا ياعفينا و اياكم )

طيب ايه الى يحصل للركاب لو مش رابطين الحزام ساعة لما العربية تتقلب لقدر الله
نفس الى بيحصل لبلية جوة علبة و انت ماسك العلبة عمال تدحرجها

يعنى يكفى ان العربية تتقلب قلبة واحدة بسيطة علشان الى مش رابط الحزام يتهبد على رقبته و تتكسر

او فى الحوادث العنيفة و الانقلاب الجانبى المتعدد الناس جوه العربية عمالين بيخبطوا فى بعض و فى السقف و الارضية و القوايم كذا مرة بصورة عنيفة جدا و ممكن يتنطروا من الشبابيك معرضين للدهس من العربيات التانية
لكن على الاقل لو مربوطين كل واحد يقدر يحط ايده الاتنين ورا راسة و رقبته علشان يحميها من القايم او لو العربية مزودة بايرباج فى القوايم فممكن ميعملش حاجة و ربنا ينجيه
طبعا كله قدر و فى حالات نادرة عدم ربط الحزام بيبقى سبب فى النجاة بس ربنا امرنا ان احنا ناخذ بالاسباب و نتوكل عليه

رد: عدم استخدام حزام الامان هو احسن طريقة للشعور بمشاعر البلية جوة علبة ....و العربية عمالة تتقلب

ابنى الصغير(4 سنوات ) كان على الكنبة ,
و أنا اخدت ملف حاد بسرعة
لقيت الواد راح من اليمين للشمال كأنه كورة مش بنى ادم
فعلا الحزام هام جدا
رمضان كريم ‘

رد: عدم استخدام حزام الامان هو احسن طريقة للشعور بمشاعر البلية جوة علبة ....و العربية عمالة تتقلب

اقتباس:

المشاركة الأصلية كتبت بواسطة sherif fersh (المشاركة 488661)

ربنا يباركلك فيه و يستر طريقنا جميعا
انا عيالى كانوا ميطقوش الحزام بس دلوقتى الحمد لله بيربطوه اوتوماتيك
و كل سنة و حضرتك طيب

رد: عدم استخدام حزام الامان هو احسن طريقة للشعور بمشاعر البلية جوة علبة ....و العربية عمالة تتقلب

وبالمناسبه كنت قريت ان العربيات الحديثة اللي فيها ايرباج مابيشتغلش الا لو كنت شادد الحزام فهل ده صح ولا غلط؟

رد: عدم استخدام حزام الامان هو احسن طريقة للشعور بمشاعر البلية جوة علبة ....و العربية عمالة تتقلب

اقتباس:

المشاركة الأصلية كتبت بواسطة dieseltrucker (المشاركة 490004)

وبالمناسبه كنت قريت ان العربيات الحديثة اللي فيها ايرباج مابيشتغلش الا لو كنت شادد الحزام فهل ده صح ولا غلط؟

فعلا لان قبل الحكاية دي ناس كتير ماتت او حصل لها اصابات بالغة في الوش و الرقبة بسبب عدم ربط الحزام و ساعة الحادثة بيندفع لامام بسرعة و يقابل الايرباج الي بيفتح بسرعة 200 كم / س تقريبا فتقوم كاسرة الرقبة