السادة الاعزاء

هل يعقا ان يذهب مواطن لاستخراج رخصة قيادة فيجد نفسه متهم بالنصب والاحتيال

ذهبت يوم السبت الموافق 16 يناير 2011 لادارة مرور 6 اكتوبر لاستخراج رخصه قيادة

وانتظرت دوري في امتحان الاشارات

وجاء منادي " احمد صلاح احمد "

تقدمت بثبات لكي امتحن

قال لي احدهم اتبعني

فتبعته

ذهب بي الي غرفه في المرور لا اعرف ماذا يسمونها

واخذ يتحدث في التليفون

قضيه نصب من سنه 2008 و حكم بالحبس سنه و غرامه 50 جنيه

دا مين يا باشا

دا حضرتك

حضرتي مين ، انا عمري ما دخلت قسم ولا عندي مشاكل مع حد او قواضي

لا والله ، انت نصبت علي مين قبل كدا

استناني شويه

وخرج الباشا وقفل الباب ومشي

اخرجت التليفون واتصلت بحد اعرفه

الحقني يا باشا انا محبوس

بيقولولي انا متهم بالنصب والاحتيال و علي حكم غيابي بسنه

يا باشا انا عمري ما دخلت قسم اساسا

قاللي ما تخافش دا اكيد تشابه في الاسماء

طيب وانا مالي

يعني ايه تشابه في الاسماء

ليه كرامتي تتهان عشان تشابه في الاسماء

ليه يبصولي علي اني نصاب عشان تشابه في الاسماء

ليه واحد ياخد مني تليفوناتي عشان تشابه في الاسماء

ليه حد يمسكني من ايدي ويرحلني لمكان انا ماعرفش رايح فين عشان تشابه في الاسماء

ليه انا افضل واقف علي رجليا والبشوات ياكلوا و يشربوا عشان تشابه في الاسماء

دا كله وانا عارف ان في حد هيخرجني م الورطه دي

طيب لو مافيش حد يخرجني انا اعمل ايه

هيرحلوني للقسم

ومن القسم للنيابه

ويا سلام لو مافيش نيابه مسائيه

استني بقي لتاني يوم

دا كله عشان تشابه في الاسماء

يا جماعه بجد الموضوع دا سببلي الم نفسي رهيب


انا عايز اخد حقي

ياتري ممكن اخد حقي من مين

اروح لمين يا ناس

طيب ايه الحل؟

لازم اجيب ورقه تقولي اني مش انا الشخص دا

والورقه دي تكون معايا علي طول

زي البطاقه

واي كمين او لجنه اعدي عليهم من غير الورقه دي يبقي يا ليلتك السودا يا احمد

هتترحل يابني يعني هاتترحل

ياباشا دا مش انا

يقولي اثبتلي

ياباشا انتوا الحكومه تعرفوا كل حاجه


واحنا مالنا

انت اللي في موضع اتهام

اثبت انك برئ؟

كرامتنا متهانه يا جماعه

بجد حد يساعدنا ويتكلم في الموضوع دا


كلموا وزير الداخليه


كلموا اي حد مسئول

كلنا معرضين اننا نتحط في الموقف دا


بجد شوفوا حل

ارجوكم