مصر موتورز مجتمع السيارات - يوم في مرور السلام

امبارح اللي هو [2-10-2010] خير اللهم اجعله خير ، صحيت الصبح ونزلت من بيتنا روحت ركبت الميكروباص من عندنا اللي رايح الجراج ونزلت خدت ميكروباص تاني رايح عند قسم السلام، المهم وصلت بالسلامة الحمد لله ونزلت دخلت في الشارع اللي قدام القسم مشيت حبة كده مسافة 200 او 300 متر ولقيت يافطة كبيرة مكتوب عليها (مرور السلام)
أول ما قريت الاسم افتكرت ذكرياتي الأليمة في فشلي المرة اللي فاتت لما روحت نفس المكان عشان أطلع الرخصة، المهم رجعت بسرعة لأرض الواقع وابتديت أفكر يا ترى ايه اللي هيحصل، وجه في بالي موضوع هنا في الموقع كان عن الطريقة اللي الناس طلعت بيها الرخصة وأزاي إن في تقريبا 95% من الناس اللي ردت على الموضوع قالوا إنهم طلعوا الرخصة يا بواسطة يا بفلوس، ولاقيت نفسي لا إراديا برفع الموبايل واتصل بواحد زميلي قالي إنه هيوصي عليا واحد قريبه
تررررررررررررررررررررن (جرس)
زميلي : ألو
أنا : ألو ازيك يا نجم عامل ايه؟
زميلي : سموس عامل ايه الأخبار، أنا كويس الحمد لله؟
أنا : الحمد لله كويس فينك كده ؟
زميلي : أنا في البيت أنت اللي فين وايه الدوشة ديه أنت روحت ولا ايه؟
أنا : انا هناك اهه قدام المرور، المهم انت عملتلي ايه؟
زميلي : والله يا سامح -سمعت البداية ديه عرفت اللي فيها بس قولت ياواد طنش خالص وشوف آخرتها ايه-الراجل اللي في المرور ما ردش على قريبي
أنا : ماشي خير إن شاء الله
زميلي : معلش ياسامح والله بس الراجل ماردش عليه ومش عارف والله حد تاني
أنا : ياعم عادي ولا يهمك أنا هدخل بقى وربنا يسهل إن شاء الله
زميلي : اه روح كده وتوكل على الله وربنا ييسر الحال بإذن الله
أنا : إن شاء الله ، أنت مش عايز حاجة؟
زميلي : لأ شكرا وربنا معاك ، سلام.
أنا : سلام
صمت تام وإحساس زي ما بيقولوا (وصاحبك أعزل :))
المهم قولت ياواد ولا يهمك توكل على الله وبإذن الله خير، المهم طلعت في الدور اللي فيه الأوراق والمستندات والكمبيوتر والتصوير وكده وروحت على الشباك ولقيت قدامي 3 بس قولت الحمد لله بسيطة شوية ولمحت الطابور المتلاحم مع الطابور الأصلي ولقيت عددهم 2 قولت برده ياواد بسيطة بإذن الله وهي ديه مصر يا عبده، استنيت دوري ودخلت أسأل اللي واقف عن الورق بتاعي نظرا لأني كنت نجحت في امتحان الإشارات المرة اللي فاتت وسقطت في العملي لأسباب مش وقت شرحها دلوقتي المهم طلعهولي وقالي روح هناك استنى في الطابور
وهنا كانت الصدمة .....
مستمر