مصر موتورز مجتمع السيارات - هل تحتمل سيارتى السفر من الاسكندرية للسخنة

مصر موتورز مجتمع السيارات (https://www.masrmotors.com/vb/index.php)

- منتدى السيارات العام (https://www.masrmotors.com/vb/forumdisplay.php?f=2)

- - هل تحتمل سيارتى السفر من الاسكندرية للسخنة (https://www.masrmotors.com/vb/showthread.php?t=138972)

هل تحتمل سيارتى السفر من الاسكندرية للسخنة

سوال يا جماعة هى المسافة من اسكندرية للسخنة قد ايه وياترى هل عربية لادا 2105 تستحمل المسافة وايه اقصر الطرق عشااان نوصل

رد: رجااااااااااااء المساااااااااااعدة

ايه ده مفيش تفاااااااعل خالص

رد: هل تحتمل سيارتى السفر من الاسكندرية للسخنة

يرجى اختيار عنوان الموضوع المناسب عن استفسارك لان الموضوعات اللى عناوينها غير واضحة غالبا ما بيتم تجهالها وحتى لو تم الرد عليها محدش يقدر يستفيد منها او يوصل ليها تانى بسبب اختيار العنوان

اما عن سؤال حضرتك فاى عربية ممكن تسافر من القاهرة لاسوان كمان الفيصل هنا هو حالة العربية مش نوعها وطبيعة القيادة كمان

حالة العربية يعنى تحديدا حالة الموتور بيسخن ولا لاء بياكل مية ولا زيت ولا لاء وحالة العفشه والكاوتش لو حاجة من دول فيها مشكلة هيبقى لا قدر الله طريقك فيه مشكلة سواء كنت راكب مرسيدس او لادا
والعكس صحيح

اما عن طريقة القيادة فمهم نعرف ان فيه بين انى اسافر مسافة وانا سواقتى كلها حرق على الموتور وجرى وغرز ومبصش على عدادات حاجة ومبريحش العربيه كل فترة وبين ان الواحد يمشى بسرعات معقولة على غيارات معقولة ويراقب عدادات العربيه وصوتها ويديها استراحات

انا شخصيا والله كنت بسافر بكيا برايد موديل تسعينات من القاهرة لمطروح من غير اى مشاكل على سرعات 90 - 120 وعلى استراحتين فى الطريق وقبل ما امشى ابقى باصص على كاوتش وعفشه وموتور واتوكل ومكانش بيبقى فيه مشاكل الحمد لله
ومرة البى ام على طريق مصر اسكندرية نورتلى عطل ريداتير خلتى خدت الطريق فى 4 ساعات علشان كل شوية انزل ازود مية وابردها شوية
ومعايا دلوقتى تريوس اخاف اروح بيها من القاهرة للقاهرة الجديدة حتى علشان عارف ان المكنة فيها مشاكل

الخلاصة هى مش بنوع العربية خالص .. المهم الحالة وطريقة السواقة ع الطريق وربنا يسلمك وايانا شر الطريق

رد: هل تحتمل سيارتى السفر من الاسكندرية للسخنة

من اسكندرية للسخنة حوالي 350 كيلو
اولا الطريق الصحراوي ثم الي الدائري
وبعد كدة نزلت العين السخنة طريق الجيش
وخلاص
ودة احسن طريق
الادا مشاكلها كتير الا لو متابعين الصيانات

رد: هل تحتمل سيارتى السفر من الاسكندرية للسخنة

نصيحتى علشان أخوك زميل كفاح فى اللادا
أنا جربت أطلع الطلعة دى من المعادى للسخنه و كانت أول - و آخر - مرة أسافر بيها
مش هأحكى أيه اللى حصل بس هأقولك على المفيد, لأنه درس و لازم نتعلم منه.
واحد زميلنا طلع باللادا من اكتوبر للغردقة و مفيش أى مشاكل بفضل الله, اللادا أصيلة بس تخلى بالك منها فى الآتى:
شيك على الريداتير و خراطيم الريداتير من و إلى الموتور و ياريت تغسل دورة التبريد و تحط مياه جديدة (جو السخنه مش زى إسكندرية و لا القاهرة حتى, سخنه بجد.
عينك على مؤشر الحرارة كل شوية و معاك زيت إحتياطى فى الشنطة.
متقرصش بالعربية مهما الطريق أغراك, ثبت رجلك على 100 بالكتير و يا ريت تستريح و تريح العربية شوية فى نص الطريق.
لازم تربط عفشة و تتأكد من كل الزيوت و السيور و الفرامل و تضبط هوا الكاوتشات قبل متتحرك
أفضل جو تمشى فيه بعد الفجر صباحاً , هتوصل بإذن الله قبل الشمس الحامية.
و إنت راجع تبص بصة على العربية قبل متتحرك, و تشوف مستوى الزيت فى الموتور و المياه فى الريداتير و برضه تمشى براحة و عينك على أمبير الحرارة.

تروح و ترجع بألف سلامة و ربنا يسلم طريقك