سؤال مهم عن كيا برايد هتشباك موديل 1997 (تاني )
 

دلوقتي انا معايا كيا برايد 1997 هتشابك 1100 cc من غير تكييف وكنت بسأل هل التكييف هياثر علي العمر الافتراضي للموتور والشباب قالولي لا ملوش اي تأثير علي الموتورو وأتوكل علي الله ، بس اخ فاضل قالي اسال حد يكون مركب تكييف قبلك في نفس العربية وشوف التكييف عامل ايه مع العربية سواء في السحب بتاع العربية او في التبريد بتاعه --- علي اساس انه لو الموضوع مش مجدي مع العربية دي نبيع العربية ونشتري مكيف من بابه علي طول
فياريت بالله عليكم الشباب اللي معاهم نفس الموديل يقولي ليا علي التفاصيل دي بالله عليكم علشان هاخد كلامكم ثقة سواء في الابقاء علي العربية وتركيب التكييف او البيع ان شاء الله ؟

افيدونا مشكورين ؟؟

رد: سؤال مهم عن كيا برايد هتشباك موديل 1997 (تاني )
 

انا هارد على سؤالك وبعدين اقولك على نصيحتى
اى تكييف فى الدنيا بياثر على العربيه فى ايه ؟
سحب العربيه بيقل فبتزود بنزين وتعلى العربيه وبيزيد استهلاك الوقود والموتور بيسخن شويه اكتر
احسن اداء بقه لازم يكون الكرباتير بتاعك مزبوط تمام بالاضافه للكهرباء وطبعا التكييف فريون وكبس ومراوح ده بالاضافه لدوره الزيت علشان العربيه هاتسخن اكتر وبالتاكيد دوره المياه
========= الكلام ده لاى عربيه مش الكيا برايد بس
طيب بافتراض ان كل الكلام اللى فوق ده مزبوط وان ربنا اكرمك بصنايعى ركبلك التكييف نوعه كويس وظبطه وانك اتغلبت على مشاكل العزل فى العربيه (حراره بتيجى من صدر العربيه او من الدواسات بسبب الموتور) علشان تحس فعلا بالتكييف.
ايه نوع مشاويرك
لو مسافات قصيره وسريعه هاتحس بفرق كويس وركبه ومش هاتضغط على العربيه
لو مسافات طويله او سفر وطريق طوالى مافيش فيه ركن فى اشارات كتير ركبه العربيه مش هاتسخن منك بس العنايه بدوره البنزين والمياه مافيش فيهم اى هزار
لو فى بقه اشارات ومطالع وركن كتيير فانا انصحك تفتح الشباك احسن لك لانك هاتضغط على عربيه مكوناتها بقالها اكتر 15 سنه ماشيه فى الارض هاتلاقى حاجات عماله تطلعلك من تحت الارض وده طبيعى طبعا بعد سنين الاشغال الشاقه فى مصر وجوها ومطابتها
===========
طيب بافتراض اننا ظبطنا كل اللى فوق ده وعزلنا صدر العربيه بحرارى محترم وحسينا بفرق هل هاتستمع بالفلوس اللى دفعتها ولا هاتظبط عربيتك للى بعدك
يعنى هل اسرتك لسه صغيره وانت مش محتاج عربيه مستقره على الطرق السريعه
لو مشاويرك مش محتاجه تزود عن 100 كم\س ركبه
اكتر من كده سرعه يبقى انت هاتحتاج تغيير قريب حتى لو مش معاك اسره فبمجرد ركوبك لعربيه المانى او امريكانى او يابانى هاتلاقى فرق كبير قوى بينها وبين عربيتك فى الاستقرار على الطريق والشعور بمطبات الهواء والعربيات اللى بتمشى جنبك وهاتفكر تبعها علشان تغير ويبقى ساعتها بلاش تركبه
================اخر حاجه
الناس بتشترى البرايد علشان عربيه موفره فى قطع الغيار وفى استهلاكها للبنزين وحتى الزيت لانها ما بتسخنش
هل انت مستعد انك تصرف على البرايد شويه اكتر وتحتفظ بيها اطول فتره ممكنه فى حسن انك لو مسكت على ايدك شويه ممكن تجيب فيرنا مثلا يكون سنين شغلها اقل نسبيا وفيها اللى انت عايزه جاهز وراكب على تجربه
==========انا ما جاوبتكش اجابه صريحه لكن ساعدتك على الاجابه
نصيحتى بقه ليك انك تعمل حاجات ابسط شويه زى الازاز الكهرباء او السنتر لوك او تروشنها من بره او حتى تعملها فرش جلد محترم , لكن ما تطلبش منها اكتر من طاقتها علشان تحبك زى ما انت بتحبها .
وبانتظار راى الزملاء وربنا يوفقك

رد: سؤال مهم عن كيا برايد هتشباك موديل 1997 (تاني )
 

ياباشا مبدئيا مش عارف اشكر حضرتك ازاي علي الرد المفصل ده ، هو انا حاليا اسرة صغيرة مراتي وبنتي وشغلي كله غالبا بيكون جوه القاهرة وساعات باه لما الدنيا بتزنق في الحر والزحمة بيكون الوجود جوه عربية غير مكيفة حاجة عذاب وعلشان كده فكرت في التكييف ، هو انا اساسا متهم بيها جدا ومظبطها زجاج كهرباء وسنتر وانذار وكاسيت وسماعات وفرش ومياة خضراء للردتاير وبنزين 92 وزيت موبيل 1 اعلي فئة وقطع الغيار الكوري والكوري بس والعربية ماشية معايا الحمد لله زي الفل ومن غير اعطال وحتي سافرت بيها مطروح ورجعت والحمد لله العربية مش مقصرة معايا خااااالص ، فبيني وبينك قولت كنوع من التكريم للعربية دي لازم اخلها مش اقل من اي عربية في نفس الفئة واركب لها تكييف لانها عزيزة عليا جدااا ، وغالبا لو كان في العمر بقية ممكن تقعد معايا كمان 5:6 سنين مثلا لاني اني يدوب انا ومراتي وبنتي وبس ---- عموما انا ان شاء الله هروح اعمل الصيانة الدورية بتاعتها كمان عن احمد بتاع مصر القديمة واشوف هو كمان رايه في الموضوع ده .

خليني اشكرك مرة تانية علي رايك الجميل المفصل وانا سعيد بمعرفتك والله ياباشا

رد: سؤال مهم عن كيا برايد هتشباك موديل 1997 (تاني )
 

توكل على الله يا باشا
وان شاء الله تفيدنا بتجربتك برده علشان الزملاء يستفادوا منها
وفى انتظار لو حد من الزملاء ممكن يقولك على اسم صنايعى محترم ومكان تشترى منه التكييف
وربنا يسعدك بعربيتك ويحرسهالك

رد: سؤال مهم عن كيا برايد هتشباك موديل 1997 (تاني )
 

ان شاء الله لو حصل هقولك علي التجربة بامر الله
ومشكور حبيبي علي ذوقك