عمل طقم شنبر
 

السلام عليكم ....

تم بحمد الله و توفيقه ... عمل طقم شنبر للموتور ...

المحرك ..... جى ام 350 .. شورت بلوك ... فيه منه لونج بلوك ... بس ده مش منتشر كتير
المحرك ده بتكنولوجيا السبعينات .... حديد زهر .... 8 سلندر على حرف فى... 5700 سى سى .. كاتينة جنزير ... اسبراتير اليكترونى ... راكب على عربيات امريكانى كتير .... زى البليزر و الكابريس

كنت رحت للاسطى حمدى مخترع الفتيس المانيوال بدون دبرياج .... لاصلاح الكاربراتير الى كان تاعبنى و كشف على الكاربراتير و فكه علشان ينظفه و يظبطه .... و كانت ملاحظته ... ان الموتور محتاج طقم شنبر لأن كان فيه دخنة بيضاء واضحة جدا من الفايز الموجود فى علبتين غطاء التاكيهات

و طبها انا كنت عارف بموضوع الشنبر بعد ما اشتريت العربية فى 2010 ... الفايظ بيجيب دخنة زيت ... و كنت مأجل موضوع الشنبر ده حتى اشعار اخر.... المهم .... قررت عمل طقم الشنبر و بدئنا الفك و اخراج البساتم و دى صور الموتور عند الفك ....

http://7rea.com/d/1389560054431.jpg

http://7rea.com/d/1389560054462.jpg

http://7rea.com/d/1389560054493.jpg

http://7rea.com/d/1389560054714.jpg


و تم ملاخظة التالى ...
الشنبر العلوى مكسور داخل كل البساتم .... مكسور حتتين ... و فى بعض البساتم 3 حتت ... الغريب .... ان المحرك كان شغال كويس ... و مفيش تعريق زيت على البوجيهات !!!! الحمد لله ... ربنا عالم بالحال
و دى صورة ... لأحد قطع الشنبر المكسور ... و ملاحظة عم حمدى عليه ... ان فيه جزء بيلمع ... و ده كان بيحتك بالشميز فى الحركة ... و جزء تانى عليه طبقة كربون .... و ده معناه انه لم يكن يحتك بالشميز على الاطلاق

http://7rea.com/d/1389560806771.jpg

لاحظوا حضراتكم الاجزاء المشار اليها بالاسهم ... جزى بيلمع و جزء اسود

تم الكشف على وش السلندر و الصبابات ... و حالتهم كانت جيدة
و تم الكشف على الشمايز .... و كانت بحالة جيدة .... تقريبا مفيهاش عالى و واطى
ده جزء الفك و الملاحظات


ملاحظات .....

قابلت الاستاذ هشام الجزار .... انسان محترم و خدوم و مبيبخلش بمعلومة او بنصيحة و انا استأذنه برفع صوره الى صورها للموتور

عم حمدى .. انسان محترم و طيب جدا .... و متحسش انك فى ورشة ميكانيكة ... و تتابعه فى الشغل تتعلم كتير جدا جدا ...خبرته كبيرة و دماغه شغالة و مبيحبش يفتح شغل فى العربية

يتبع

رد: عمل طقم شنبر
 

بعض النصائح الفنية فى عملية فك المحرك ....
1- تجميع المسامير و الصواميل فى علبة للمحافظة عليها من الضياع
2- محاولة تفضية المحرك من الزيت و عدم دلق الزيت على الارض
3- كتابة قطع الغيار الناقصة للشراء ( زى ما كان ادهم بيعمل ) ..... انا كنت بنسى حاجات عم حمدى قالى اشتريها
4- شراء بوجيهات 3 شمعة اليكترونى مستقبلا
يتبع ان شاء الله

رد: عمل طقم شنبر
 

الجزء الثانى

اخدت بستم لبتاع قطع الغيار ... و تم قياس قطر البستم و هو عرف ان البستم ده استاندرد ... يعنى الشنبر لم يتم خرطه من قبل .. و كان رأى بتاع قطع الغيار استخدام شنبر اكبر من الاستاندرد و يقوم الميكانيكى بظبط خلوص الشنبر داخل الشميز بالمبرد !!!!
عم حمدى كان رأيه انه مش حيعرف يظبط الخلوص ده بالمبرد زى المصنع ... و حيحصل ان ممكن الشفه متقفلش على الشفة التانية بالظبط ....تم شراء طقم جوانات كامل

و تم شراء الشنبر الاصلى و تركيبه و تدخيل البساتم

و لاحظنا ... صعوبة فى تدخيل البستم .... و جربنا ندور الموتور بالمارش بعد ما دخلنا 4 بساتم .... الموتور اتحرك ... بس البساتم تقيلة
و جينا ندخل البستم الخامس ... حلف براس ابوه ما هو داخل ...
و تم اخراج البساتم و البحث عن السبب

شنبر الزيت السفلى كان بارز قليلا عن البستم

http://www.upimage.us/server/php/files/IMAG0956.jpg

http://www.upimage.us/server/php/files/IMAG0958.jpg

http://www.upimage.us/server/php/files/IMAG0959.jpg

و ده كان الفرق بين شنبر الزيت القديم و الجديد
و بعد عدة اختيارات ... تم الاتفاق على سؤال خراط ازا كان ينفع نخرك من مجرى شنبر الزيت السفلى ما يسمح ببيات الشنبر ... و كان راى الخراط اننا ممكن ناكل من المجرى 1/4 ملى .. و لحمية الشنبر تسمح بذلك

و بعد الخرط .. الشنابر ركبت كويس .... و دخلت جوة الشمايز عادى جدا و تم التركيب

http://www.upimage.us/server/php/files/IMAG0963.jpg

العربية لينت شوية عند عم حمدى و انا اخدتها علشان تلين قرابة 500 كيلو متر .... و بعدين نرجع نربط وش السلندر تانى و نظبط تاكيهات ان شاء الله

رد: عمل طقم شنبر
 

و شرفنى انى قابلت الاستاذ هشام الجزار تانى ....
و قابلت الاستاذ الكبير .... كارز ادماير ( الاستاذ وائل ) ... و فضلنا نتكلم و نتجاذب اطراف الحديث اكثر من ساعة ... استفدت و عرفت و سمعت عن حاجات اول مرة اسمع عنها

من بعض الحاجات الى الاستاذ كارز ادماير اتكلم فيها :-

1- عجبه جدا فكرة عم حمدى استخدام ديسك الفولكس القديم على الفتيس الى حيركب على العربية السيات قريبا ان شاء الله
2- اقترح عمل ساندوتش للردياتير ... مروحة امامه و مروحة خلفه ... زى ما وضح فى نفس الموضوع هنا فى المنتدى
3- تمت معاينة عربية سايبا ... و الاستاذ هشام الجزار جربها بنفسه
4- بلغنا ان فيه عربية لادا جراناتا حتنزل مصر على شهر ابريل القادم
5- عرفت ان فيه مواتير 12 سلندر ... بى ام دبليو ... مرسيدس ... جاجوار
6- يمكن تركيب فلتر زيت مختلف بعد تمشيط السن
7- كان زمان يتم تركيب بساتم الفيات ال 132 و ال 131 مكان بساتم البيجو 504
و حاجات تانية كتير

عم حمدى دماغة رائعة بسم الله ما شاء عليه .... استفدت منه فى حاجات كتير .. و عرفنى ازاى اقسم 8 سلندر ببساطة ... و عدلنا فلانشة الدركسيون علشان كانت مقطوعة .. ( الاستاذ هشام الى اكتشف انها مقطوعة )

من الحاجات الى معجبتنيش فى شغل الخراط :-
1- الخراط كان بيتعامل مع البساتم باهمال ..... فيه بروز بسيطة نتيجة عدم مسكه للبستم باحكام على المخرطة
2- انا جبت البساتم من وسط الرايش الى تحت المخرطة .... كان باين جدا انه بيرمى البستم على الرايش بعد ما يخلص و ده جعل البساتم مليانة رايش صغير

رد: عمل طقم شنبر