مصر موتورز مجتمع السيارات - حل مشكلة ازمة البنزين بالصور

كلنا بنعانى ومعانا عربياتنا من قلة توافر البنزين اللى اصبح سلعه نادره لدرجة انه بيتباع دلوقتى سوق سوداء ( حسبى الله ونعم الوكيل فى اللى كان السبب )

http://i757.photobucket.com/albums/x...ps6370816a.jpg

وبما انى بقالى فتره متمرمط من بنزينه للتانيه فى رحلة البحث عن البنزين وحسيت فعلا بحجم المعاناه لما شفت ناس بتبات فى عربياتها باليومين امام البنزينه عشان تمون

http://i757.photobucket.com/albums/x...psdcaaee48.jpg

http://i757.photobucket.com/albums/x...ps6fd98789.jpg

حبيت اشارك بحل بسيط ولاكنه فعال فى حل ازمة البنزين

بسم الله نبدأ موضوعنا

البنزين من انواع الوقود السائل المستخرج من تكرير البترول والمستخدم فى الكثير من عمليات الأحتراق وتوليد الطاقه
ولاكن اهم استخداماته اليوميه هى كوقود للسيارات

وبما ان البدائل له حتى الآن ( الغاز الطبيعى ) مكلفه ( صيانه خاصه وعمر افتراضى اقصر للموتور ) وغير عمليه ( لقلة انتشار محطات الغاز الطبيعى ) وايضاٌ تحتاج عملية تحويل مكلفه ( السياره ب 5 آلاف جنيه )

فأصبحنا مضطرين لأيجاد حل لتوفير البنزين

والحل ينقسم الى شقين

اولاٌ
التنقيب عن حقول بترول جديده

وانشاء محطات تكرير وطنيه لتوفير احتياجاتنا من البنزين بدلاٌ من استيراده

وطبعاٌ ده مش بأيدنا ( ده بأيد الحكومه ) يعنى مش قصتنا

ثانياٌ
وهوما يهمنا ( الأستفاده القصوى )
بمعنى اننا نحاول الوصول بالسياره لأكبر عدد كيلوات ممكن بنفس كمية البنزين المتاحه لنا قبل الأحتياج للتزود بالوقود مره اخرى

طيب وده نعمله ازاى ؟

عشان نقدر نحقق المعادله دى هنمشى فى اتجاهين

1 السياره

2 السائق

نبدأ بالسياره

عشان نحقق اكبر استفاده من كل قطرة بنزين لازم تكون السياره بأفضل حاله فنيه
وعشان نوصل بالسياره لكده هنزبط شوية حاجات

A الموتور
هنشيك فى الموتور على الآتى

دورة الأحتراق

1 الموبينه
لازم تبقى سليمه ( مفيهاش اطراف ضعيفه ) فرق قدرة الخرج من طرف الى التانى بيقلل من انتظام دوران المحرك

2 البوجيهات
لازم تكون البوجيهات فى حاله جيده وكمان تكون النوع اللى بيوصى بيه المصنع للسياره ( يعنى منركبش بوجيه 3 شمعه على موتور 8 صباب كامه واحده ونفتكر اننا بنزود آداء العربيه )

3 سلوك البوجيهات
لازم تكون بحاله جيده ( غير قديمه ولا ناشفه ولا مشققه ) كل ما سبق بيهرب جزء من الشراره الخاصه بالأحتراق وبالتالى بيقلل من آداء السياره

دورة البنزين

1 فلتر البنزين
لازم الفلتر يكون نضيف وغير مسدود ( يتنضف كل 5 آلاف كيلو ويتغير كل 10 آلاف )

2 فلتر الهواء
لازم يبقى نضيف دايماٌ لأنه رئة السياره اللى بتتنفس منها ( يتنضف كل 3 آلاف كيلو ويتغير كل 10 آلاف )وعلى فكره الفلاتر الأسبور بتذود استهلاك البنزين فبلاش منها افضل

3 الرشاشات
لازم تكون سليمه وومبتسيلش ولا بتليك ( ودى بتتنضف كل 40 آلف على جهاز الألترا سونيك ده غير ان كل 10 آلاف بنحط منظف رشاشات نوعيه محترمه مع البنزين )

4 الكربراتير
وده فى العربيات القديمه وظبطه اهم حاجه فى توفير البنزين ( عن طريق تنضيفه بأستمرار وظبط العوامه ومسمار السلانسيه ومسمار الهواء )

5 البوابه وحساس الأيدل
وده فى العربيات الحديثه بيتنضفوا ويتعايروا على الكومبيوتر كل 10 آلاف كيلو

دورة التزييت
المحرك اللى اجزاءه بتتزيت كويس بتقل فيه نسبة فقد الطاقه بنسبه كبيره وكمان حرارة بتبقى اقل من الموتور اللى مش متزيت كويس

1 اختيار الزيت المناسب للسياره
العربيات الحديثه اجمالاٌ بتحتاج زيت 10 آلاف مش علشان المده لأ عشان انه تخليقى بالكامل

2 فلتر الزيت
لازم يكون بحاله جيده وده بيتغير كل 10 آلاف كيلو

3 طرمبة الزيت
لازم تكون بحاله جيده تسمح لها بتزييت كافة اجزاء المحرك بكفائه

دورة التبريد
كل ماتكون دورة التبريد مظبوطه كل ما ناخد من الموتور اقصى استفاده واقصى عمر افتراضى

1 الثرموستات
لا غنى عنه فى السياره والغائه فتى من الصنايعيه المصريين وبيسبب زياده كبيره فى استهلاك البنزين

2 مية التبريد
لازم نستخدم النوع الموصى به من المصنع للسياره ( وحذارى واستخدام مية الحنفيه فى دورة التبريد ) لأنها بتسبب تأكل الدوره لوجود الأملاح بها كما تسبب تلف فى اجزاء الدوره لأنخفاض درجة غليانها

3 الريداتير
يجب ان يتم تنضيفه بماء مضغوط من الخارج والداخل كل 10 آلاف كيلو للحفاظ على حالة تشغيل ممتازه

4 غطاء القربه وغطاء الريداتير
لازم يكون بحاله جيده لأنه يقوم بوظيفة منظم ضغط لدورة التبريد غير انه غطاء لها

دورة العادم

وبالرغم من انى اغلب الناس بتهملها الا انها من اهم اسباب زيادة استهلاك البنزين ورفع درجة حرارة المحرك

1 علبة البيئه
ودى من اهم اجزاء دورة العادم لازم تتغير كل 80 الف كيلو او 100 الف بحد اقصى او الغائها واستبدالها بماسوره فى حالة عدم توافرها

2 حساس الشكمان
وده مسئول كبير عن تنظيم عملية الأحتراق واستهلاك البنزين وطبعاٌ بنشيك عليه بالكومبيوتر وبنغيره اذا لزم الأمر

3 علب الشكمان
لازم تكون بحاله جيده لأنها اذا كانت مسدوده او مخرومه بتزود استهلاك البنزين وبتضعف من اداء السياره
وحزارى من علب الديفل ( اللى بتطلع صوت عالى ) لأنها بتزود استهلاك البنزين

طبعاٌ بعد ما نشيك على كل ما سبق هنوصل بالموتور لأفضل حاله ممكنه وده اللى هينعكس بالأيجاب على الآداء و استهلاك البنزين

B العفشه
العفشه بأجزاءها المختلفه هى المسئوله عن توصيل القدره الخارجه من الموتور وترجمتها الى حركه على الأرض

1 الفتيس
لزم يكون بحاله جيده ولا يصدر اى اصوات غريبه وتستطيع ان تعطيه كل النقلات بسهوله ويسر ولحصول ذلك لابد من المتابعه بتتغير زيت الفتيس بالكامل ( كل 20 الف للأوتوماتيك و 40 الف للمانيوال )

2 بلى العجل
لزم يبقى بحاله جيده لا يصدر اصوات ولا يمنع الدوران الحر للعجله وبنشيك عليه كل 50 الف كيلو وبنغيره اذا لزم الأمر

3 الفرامل
لزم نشيك على مساتر الفرامل الفرعيه ونتأكد من سهولة حركتها كل 20 الف كيلو
وكمان نشيك على فرملة اليد بحيث ان العجل يدور بحريه ومتكطونش الفرامل قافشه فتضايق دوران العجل

4 الكاوتش
وده اخطر جزء فى العربيه كلها لأنه الجزء الوحيد من السياره اللى ملامس الأرض
لذلك لابد من ظبط ضغط الهواء فى الأطارات ( الضغط الزايد او الناقص بيزود استهلاك البنزين وبيضعف الفرمله )
بنشيك عليه كل 20 الف وبيتغير بالكامل كل 40 الف او 60 الف كيلو بحد اقصى
ده غير ان العمر الأفتراضى للكاوتش 5 سنين من تاريخ تصنيعه حتى لو لم يستخدم

C الأيروداينامك
كل الزيادات والدفندرات والروفراك والأسبويلارات بتعمل مقاومه كبيره للهواء مما يتسبب فى زيادة استهلاك البنزين
لذلك عند عدم الحاجه لها فالتخلص منها افضل

بكده احنا خلصنا الجزء الخاص بالعربيه

ندخل على الجزء الخاص بالسائق

انتوا عارفين ان عند ثبات نفس السياره ونفس ظروف القياده ممكن الأستهلاك يتضاعف او يقل النص مع اختلاف السائق فقط

ازاى الكلام ده ؟

هتكلم عن نفسى

عربيتى شيفورليه اوبترا موتور 1600 CC
فى الطبيعى العربيه بتعمل معايا فى الصفيحه 170 كيلو فى وسط البلد
بس ده مع نمط قياده رياضى كله تجميع وجرى وشد وتكييف وسرعات عاليه

نفس العربيه مع استخدام نمط قياده هادئ او موفر للبنزين بتعمل فى الصفيحه 320 كيلو فى وسط البلد

ازاى ده

بإتباع النصائح التاليه
1 دور وامشى على طول
متوقفش تسخن اكتر من 30 ثانيه اكتر من كده حرق بنزين على الفاضى

2 عدد لفات الموتر لا يتخطى بأى حال من الأحوال ال 2500 دوره على الدقيقه

سرعتك على الغيار الأول لا تزيد عن 20 كيلو
http://i757.photobucket.com/albums/x...ps9def3bcd.jpg

الغيار التانى 30 كيلو
http://i757.photobucket.com/albums/x...ps4233c049.jpg

الغيار التالت 40 كيلو
http://i757.photobucket.com/albums/x...ps4233c049.jpg

الغيار الرابع 70 كيلو
http://i757.photobucket.com/albums/x...ps75bbfba7.jpg

الغيار الخامس 90 كيلو
http://i757.photobucket.com/albums/x...ps9fddfe3c.jpg

3 اقصى سرعه للسير لا تزيد بأى حال عن 90 كيلو وده على الغيار الخامس

4 حاول انك تقلل من تشغيل التكييف بأكبر قدر ممكن ( التكييف من اهم اجزاء السياره اللى بتزود استهلاك البنزين )

5 استخدام التسارع البطئ مفيش شد ولا تجميع سريع نهائى

6 التخلص من اى احمال زائده فى السياره ( كل كيلو زياده فى السياره بيزود استهلاك البنزين )

7 بقدر المستطاع حاول تستخدم القصور الزاتى ازاى ؟
يعنى فى منزل كوبرى مور العربيه وسيبها تجرى لوحدها هتوفر كتير

8 متوقفش على السلانسيه كتير
يعنى اى اشاره اطفى العربيه وارجع دورها تانى لما الأشاره تفتح ( الطاقه المستهلكه فى بدء الدواره تعادل الوقوف على السلانسيه لمدة 10 ثوانى )
والنظام ده متتبع فى السيارات الحديثه ( ال I DRIVE فى ال BMW )

9 لو البنزين معاك قليل هتمشى على الخامس بسرعة 50 كيلو لحد ما توصل لأقرب بنزينه وده هيبقى اقل استهلاك بنزين ممكن للعربيه

http://i757.photobucket.com/albums/x...ps49ef011a.jpg

بإتباع كل ما سبق صدقونى استهلاك البنزين فى سيارتكم هيقل النص يعنى زيارتك لمحطة البنزين بدلاٌ من ان تكون كل اسبوع هتبقى كل اسبوعين

مستنى ردودكم وارجو ان ينال الموضوع اعجابكم

ولا تنسونى بصالح دعائكم

وطبعاٌ تحت امركم فى اى استفسار

هنا فى الموضوع

او على الفيس بوك
http://www.facebook.com/profile.php?id=100001941737189

او على التليفون 01006898520

اخوكم عصام غنايم