مصر موتورز مجتمع السيارات - السر في تفوق تكييف السيارات اليابانية

طبعا... أكيد السؤال ده ناس كتير سألته.. وأعتقد إن ناس كتير كمان معتقدة إن السر في الكمبريسور الياباني القوي

أبداً... الموضوع وبكل بساطة.... اليابانيين أذكى وعمليين أكتر

مبدأ اليابانيين في كل شغلهم... ليه تكلكعها ما دام ممكن تعملها بكل بساطة

مش هطول عليكو... الفرق كلوا في حتة محبس صغير محطوط على خط المية السخنة اللي بيدخل على الدفاية

اسمه محبس التحكم في الدفاية ... أو Heater Control Valve

http://repairpal.com/images/managed/...e_07.30.11.png

نشرح أكتر

بالنسبة لأنظمة التكييف المتعارف عليها في معظم السيارات... النظام التقليدي الموجود من زمان وفي أغلب العربيات الرخيصة نسبيا هو أشبه ما يكون بخلاط المياه في الحمام...

لإن الهوايات اللي بيطلع منها هوا التكييف/الدفاية موحدة على النظامين... بمعنى إن الخلط بيحصل في وحده التوزيع اللي بتوزع الهواء على فتحات التكييف وتخلط السخن مع الساقع.

http://mesaautofix.com/jakes-wp/wp-c...nditioning.jpg

ده نظام التبريد اللي بناخد منه وصلة على الدفاية
http://d3d71ba2asa5oz.cloudfront.net...ng_diagram.jpg

وده نظام التكييف
http://www.2carpros.com/images/artic...ner_system.gif

بيبقى فيه وحدة فيها سربنتينة التكييف وسربنتينة الدفاية في حجرة واحدة بتخلط الهوا الساقع اللي جاي من التلاجة مع الهوا السخن اللي جاي من الدفاية

... والتحكم في درجة الحرارة بيبقى بطريقة من اتنين:

الطريقة الأولى

الطريقة المستخدمة في معظم السيارات الأوروبية (وربما الأمريكية): الدفاية متوصلة بشكل مستمر ولما نشغل التكييف بنتحكم في درجة الحرارة عن طريق بوابة مخصوصة

زي كده:
http://d3d71ba2asa5oz.cloudfront.net...c-air-flow.jpg

في الحالة دي... الهوا الساقع بتاع التكييف متأثر دايما بهوا سخن جاي من الدفاية

الطريقة التانية

مستخدمة في السيارات اليابانية والكورية (ما عدا الدايو/شيفروليه لإن التكنولوجيا بتاعتها متاخدة من أوبل)، وفيها مية الدفاية عليها محبس بيتحكم في دخول المية السخنة إلى الدفاية، ولما بنحرك مؤشر الحرارة بنفتح سكة للمية السخنة إنها تدخل وتبدأ تدفي.

زي كده:
http://0.tqn.com/d/autorepair/1/0/-/t/91330788.gif http://www.autopartslib.com/wp-conte...components.png

في الحالة دي الدفاية ما بتأثرش على أداء التكييف إلا لو شغلناها...

الموضوع هنا عامل بالضبط زي خلاط الحمام ... لو عايز مية ساقعة شغل الساقع واقفل السخن... ولو عايز مية سخنة شغل السخن واقفل الساقع... ولو عايز حاجة في الوسط.. افتح الاتنين واضبط زي ما انت عايز

http://upload.wikimedia.org/wikipedi...hroom_sink.jpg

النظام ده فعال أكتر بدون شك

إنما في النظام الأولاني (الأوروبي).. الموضوع عامل زي ما يكون الخلاط فيه حنفية السخن بتسرب وعايزة جلدة :)، أو ممكن نعتبره زي النوع التاني من خلاطات الحمام...

http://raymondpoort.com/images/water_tap_mixer.jpg

وده طبيعي لإن الجو عندهم ساقع طول السنة...

يعني بالنسبالنا... ممكن فعلا لما نمنع المية السخنة من دخول الدفاية.. التكييف هيسقع أكتر... بس هنفقد ميزة الدفاية... خصوصا إن فيه مناطق في مصر والخليج بتعاني من البرودة في الشتا.

لو مش مصدق.. انزل اسكندرية في فبراير... أو الكويت في يناير!!!

بس المفروض إن النظام ده يتغير في الدول الحارة زي مصر ودول الخليج... إنما مشكلة الأوروبيين إنهم لسه شايفين إن نظامهم كويس... وما دام مش حاسين بالمشكلة يبقى عمرهم ما هيصلحوها.

...