عايز انقل ملكية ومرور
 

اشتريت شاهين 1300 سي سي موديل 1996 بتوكيل والرخصة لحد ديسمبر 2013 وهي مرور العتبة وانا ساكن في الشيخ زايد والمرور قريب مني في زايد هو والشهر العقاري .. يا ريت حد يفيدني في الموضوع .. لأني عايز انقل دلوقتي لأن قريبي صاحب العربية الأصلي عايز يشتري سيارة ثانية .. أنقل ازاي .. وقيمة ضريبة الشهر العقاري للتسجيل كام .. معذرة فأنا ليس لدي اي خبرة في الموضوع .
برجاء التوضيح بالتفصيل

وشكرا لكم

رد: عايز انقل ملكية ومرور
 

بص ياسيدى
اول حاجه هاتعملها تروح الشهر العقارى بالتوكيل والرخصه والبطاقه وتنقل ملكيه ودى مصاريفها 170 جنيه
وبعدين تروح مرور الشيخ زايد هاتشترى ورق فحص وتجديد ب 25 جنيه
وتفحص فى مرور زايد المهندس هايدليك جواب تروح به مرور العتبه تعمل مطابقة بصمة وكمان تجيب شهادة مخالفات وبحث امنى من مرور العتبه برده
تاخد الورق ده وترجع على مرور زايد تدخل على مهندس الفحص تديله مطابقة البصمة يمضى عليها
وبعدين تروح تدفع التامين الاجبارى وهوه السنه 111 جنيه
ولو الطفايه منتهيه بتشترى طفايه 139 جنيه
وتاخد الورق ده كله وتروح على شباك نقل الملكيه والتجديد (هوه شباك واحد) كل ده فى مرور زايد
هايخد منك الورق كله ومتنساش يكون معاك الوصل اللى اخدته من الشهر العقارى وانت بتسجل لنفسك ده مهم جدا
هاتستنى شويه ساعه اتنين تلاته انته ونصيبك وهتاخد تصريح لمدة 3 شهور لحد مالورق بتاعك يجى من العتبه لزايد تروح بعد 3 شهور تسلم الوصل وتاخد الرخصه ........ مبروك عليك
وربنا يعينك ع المشوار ده

رد: عايز انقل ملكية ومرور
 

هتجيب شهادة مخالفات من مرور العتبة
تروح الشهر العقارى (زايد) تعمل عقد بيع مسجل لو انت شارى بتوكيل وتمنة على فكرة حوالى 250 جنية لان عربيتك 96 - 1300
تروح مرور زايد تشترى ورق فحص ونقل ملكية
تدفع التامين الاجبارى حوالى 102 جنية للسنة الواحدة
تختم ورقة فحص الطفاية ودى هتلاقيها ضمن ورق التجديد ونقل الملكية
ترفع بصمة الموتور والشاسية
ومهندس الفحص هاكتبلك على نموذج الفحص خطاب "مطابقة بصمة "
تروح مرور العتبة تختم مطابقة البصمة
ترجع مرور زايد وتقدم ورقك كولة فى شباك التجديد ونقل الملكية (اصل رخصة السيارة + اصل عقد البيع المسجل+ الصورة الزرقاء بتاعة التامين الاجبارى + شهادة المخالفات + صور من كل الورق دة )
وهتاخد تصريح بـ 6 شهور