مصر موتورز مجتمع السيارات - تقرير عن تركيب عازل حرارى لدواسة جراند تيريوس

السلام عليكم ورحمة الله وبركاته
صدرت لى بعض الشكاوى من الاسره ان العربيه من دواسة الكراسى الخلفيه بتكون سخنه بس مكنتش عارف السبب لغاية ما قررت افحص المشكله وعرفت ان العربيه من بعد الكراسى الاماميه مفيش عازل تحت الموكيت يعنى الموكيت وتحته الصاج مباشرة ودا طبعا عيب خطير والمفروض ما يبقاش موجود فى العربيه المهم اشتريت عازل او اسمه صوف حرارى من الناس اللى بتبيع مستلزمات الافران والبوتجازات وده عزله بيبقى 100 %
ودى صورته
http://img.alibaba.com/photo/5199474...glass_wool.jpg

وهاقولكم ركبته ازاى بالتفصيل بس من غير صور للأسف اول حاجه فكيت الكرسيين اللى ورا السواق كل كرسى فيه 4 مسامير وكل مسمارين ليهم فبرتين من الامام والخلف بيتفكو بسهوله بس تبقى شايف كويس علشان متكسرش حاجه بعد ما تفك كل كرسى تشيله بره العربيه وانصحك يبقى معاك حاجه بلاستيك تحط فيها المسامير والفبر علشان مفيش حاجه تضيع وبعد ما شيلت الكرسيين دخلت على الكنبه اللى ورا وبردو ممسوكه ب 4 مسامير وكل مسمارين عليهم فبر زى اللى قدام وبعد ما شيلت الكنبه شيلت الفبره اللى قدام باب الشنطه على طول اول ما تفتح بحيث انى اعرف اشيل الموكيت بسهوله وهى سهله فى الشيل لها 6 كليبسات والفبرتين اللى قدام الباب اليمين والشمال او ما تفتح الباب فوق العتبه من جوه وبعدين شيلت قطعة الموكيت اللى تحت الكنبه وهى منفصله بتطلع فى ايدك لوحدها اما اللى تحت الكرسيين اللى فى النص ماشيلتهاش كلها لانها مرتبطه باللى تحت الكراسى الاماميه ودول انا مفكيتهمش لانهم معزولين وكمان فى كنصول وحوارات المهم تنيت الموكيت لقدام لغاية اخر حاجه عرفت اتنيها وقطعت الصوف الحرارى على اد كل حته فى العربيه من اللى تحت الموكيت كله بحيث يبقى الصوف مغطى الصاج اللى قدامى وبعدين فردت الموكيته اللى قدام وبعدين فردت الموكيته اللى ورا وعملت فراغات لبياتات ومسامير الكراسي ودخلت الموكيت تحت الفبر زى ما كان وطبعا هايبقى عالى شويه بس عادى هايطبع بعد الكراسى وركبت الكرسيين اللى فى النص زى ما فكيتهم بالظبط وكذلك الكنبه بنفس الطريقه
وجربت وحسيت بفرق ملحوظ جدا فى درجة حرارة العربيه الداخليه والسخونه بقت مش موجوده
اتمنى يكون الموضوع افادكم ولا تنسونى من صالح الدعاء