مصر موتورز مجتمع السيارات - موضوع متكامل عن شراء السيارات المستعمله

اولا : الكشف علي العربيه :

1- بتخلي الميكانيكي يبص علي المحرك و يشوف كبس البنزين نظامه ايه
2- ترفع العربيه في بنزينه معروفه و تخلي العفشجي يبصلك علي العفشه و الشاسيه و قوايم العربيه و يشوف نظامهم ايه
3- تخلي البوهيجي يشوفلك العربيه راشه دواخل و لا نظامها ايه بالظبط ( لو راشه دواخل ما تخدهاش لو ببلاش )
4- و لو الميكانيكي و العفشجي و البوهيجي اجمعوا ان العربيه ممتازه يبقي توكل علي الله و متنساش صلاه الاستخاره

ثانيا : مواصفات العربيه المستعمله اللي حالتها ممتازه :

1- العربيه فبريكه من بره ( العربيه لسه ببويه الشركه و مش راشه من بره و مفيش خبطات خاااااااالص و لو فيها شويه خدوش بسيطه ميضرش )
2- العربيه فابريكه دواخل ( يعني مش عامله حادثه و راشه دواخل و البوهيجي هيعرف الكلام ده لما يبصلك علي الدواخل )
3- العربيه مش مسقطه مكنه و لا مسقطه فتيس ( والميكانيكي هيعرف الكلام ده لما يكشف علي المحرك و اكد عليه الموضوع ده )
4- عفشه العربيه متكونش متغيره ( و اكد علي العفشجي الكلام ده لانها لو مغيره العفشه يبقي صاحبها مهمل و مبهدل العربيه )

و انت ممكن تريح عقلك و تروح تكشف عليها في التوكيل لو العربيه موديل حديث و طبعا تتأكد من الرخصه و رقم الشاسيه و بصمه المحرك

ثالثا : ما بعد الشراء :

1- المحرك :
تغير طقم السيور ( سير الكاتينه و سير الدينامو و سير التكييف ) و تغير طقم الفلاتر ( فلتر البنزين و فلتر الزيت و فلتر الهوا ) و تغير طقم البوجيهات و تغير سلوك البوجيهات و تنظف الرشاشات و تنظف الانجيكشن و تغير زيت المحرك بزيت موبيل وان ( ال 3000 كيلو و الجركن ب 100 جنيه ) و تزود زيت الباور و زيت الباكم ( علبه زيت الباكم ب 4 جنيه و تزود بيها زيت الفرامل و الدبرياج ) و تغير طقم الفرامل و تغير طقم الدبرياج تخلي الميكانيكي يشحم وصلات البطاريه عشان متملحش و دي الاساسيات في ظبط المحرك و شوف لسه المحرك محتاج ايه عشان يتظبط

2- العفشه :
ترفع العربيه عن العفشجي و تخليه يربطلك العفشه عشان العربيه متترجرجش و تخليه يفحصلك قواعد المحرك و الفتيس و يشوف نظامهم ايه و طبعا لو تحب تغير طقم المساعدين و تركب مساعدين رياضين يكون افضل للعفشه و دي اساسيات ظبط العفشه و شوف لسه العفشه محتاجه ايه عشان تتظبط

3- الكهربه :
تغير طقم الفيوزات بالكامل عشان كهربه العربيه تتظبط معاك و تغير طقم كتاوت للعربيه كلها و تغير الرداخ بالكامل عشان تمشي علي نضيف و تخلي الكهربائي يظبط الكلاكس و خليه يكشف علي المارش و الدينامو و يشوف نظامهم ايه و دي اساسايات و شوف لسه الكهربه محتاجه ايه عشان تتظبط

4- الصاج :
شوف لو في شغل سمكره و لو في خدوش يبقي وش دهان نضافه يكون احسن

رابعا : التوضيب :

1- طقم جنط سبور مقاس 15 بوصه مثلا
2- طقم كاوتش جديد ماركه ماكسيس مثلا
3- عده صوت بايونير ( كاسيت اسطوانات + 4 سماعات )
4- تغير الفوانيس الاماميه بفوانيس لينسيز
5- تغير الفوانيس الخلفيه بفوانيس كريستال
6- طقم زينون الماني
7- تغير الشبكه
8- الفاميه ( تفيم الزجاج الخلفي فقط عشان المرور )
9- شويه استيكرات و نسور و انت و زوقك بقه

موضوع التوضيب ده مش ضروري ده عشان العربيه يبقي شكلها حلو و ارجو انكم تكونوا استفدتوا من الموضوع ده