مصر موتورز مجتمع السيارات - خد بالك وانت بتشتري عن طريق إعلانات النت

السلام عليكم و رحمة الله و بركاتة
اثناء رحلتي الشاقة للبحث عن سيارة مستعملة والتي لم تنتهي بعد اكتسبت بعض الخبرة و احب ان اشاركها معكم في منتدانا مصر موتورز.
اتجاه الكثير من الباحثين الي الشراء المباشر من البائع عبر الانترنت دفع التجار الي مزاحمة البائعين علي النت ايضا متخفين في صورة بائع برئ يبيع لظروف السفر الخ....
وهذه بعض النصائح حتي تكشف البائع المالك من التاجر
1- لا تعجل
تأكد تماما ان "ما اصابك لم يكن ليخطأك وما اخطأك لم يكن ليصيبك " يعني العربية اللي مكتوبلك تخبطها هاتخبطها واللي هاتجرحا هاتجرحها غصب عن الكل
2- الاعلان
الاعلان هو اللي هايحكم اذا كنت هاتكمل و لا لأ
اللي بيعلن بيتغني بأحسن حاجة في السيارة لو مركب لمبة صالون جديدة بيكتب
"لمبة صالون من شهر "
لو الاعلان مش كاتب حاجة عن الدواخل اعرف انها راشة دواخل
لو ماجبش سيرة الرخصة يبقي فيها شهرين بالكتير
2- تحري عن البائع
شوية شغل مباحث و تعرف اذا كان تاجر ولا مالك إزااااااااي...
خد رقم تليفون البائع و ابحث عنة في جوجل و هاتشوف العجب اقرأ معي الاعلان التالي
"89 ريجاتا جميع الكمليات منوال فابريكا اربع كاتوتش جدسد بطاريه والله العظيم انا با ابيع لظروف وربنا يسر ت\.............."
(علي فكرة الاعلان بأخطاءة الاملائية , واللي يتفهم من الاعلان ان البائع مالك و مزنوق في قرشين صح ؟)
و عند البحث عن رقم البائع وجدت معرض بالكامل للبيع عربيات موديل 80 و 90 و2000 كمان و غلطة صغيرة منة بعنوان معرضة في اكتوبر
ممكن تلاقي اكتر من اعلان لنفس الرقم و لكن بنفس موديل العربية يبقي دة تمام ابدأ اتصل بالبائع
3- الأتصال
يفضل الاتصال عن طريق الرد علي الاعلان في النت و ليس بالتليفون لان المالك اللي عمل اعلان عن سيارتة تقريبا بيبقي نايم قدامة اما التاجر غالبا ما يرمي شبكتة و ينتظر الرد علي التليفون و مش فاضي يكتب ويدادي الزبون اللي يتعبة بيشوف غيرة و الزباين كتير
4- لا تتنازل عن صور للسيارة
لا تتنازل عن استلام صور للسيارة علي الاميل قبل المعاينة و يجب ان تكون قريبة وواضحة تظهر فيها الاجزاء التالية عن قرب ..الشنطة ومدي تجانسها مع جسم السيارة و كذلك الكبوت (وجود فراغات بين الغطاء و الجسم لا يبشر بالخير) .. الصالون و التابلوة ... المحرك ... الكاوتش و مدي تاكلة... الفوانيس... رقم السيارة واضح في الصور حتي لا تشاهد صور سيارة احلام وهمية
وكمان اشرط علية في حالة وجود اي اختلافات عن الصور عند المعاينة سوف تتراجع بدون كلام و لا سلام
استلمت الصور و عجبتك خد معاد للمعاينة

5- المعاينة
يفضل تروح لوحدك الاول لو العربية من مكان قريب (و ده توفير لحق الميكانيكي و عشان الاحراج لو طللعت خردة ما يبصلكش البصه اللي بصهالي وممكن تاخدة معاك من اول مرة) و شوف الحالة العامة للسيارة وارتياحك النفسي و كمان شوف الرخصة باسم المالك اللي بيفرجك علي العربية (مش ابن عمة ولا جوز اختة عشان هو مش فاضي , يا المالك يا تخلع) تاكد من موديل العربية و رقمها اللي كان في الصور ... تمام اسأل انت عايز كام و اسمع منة وقولة اجيب ميكانيكي يبص علي الموتور ويديني ثمن و ماتقولش رايك في السعر لا كتير ولا قليل لحد الميكانيكي ما يقول كلمتة
ممكن دلوقتي تروح تجيب الميكانيكي و السمكري و بتاع العفشة و السروجي واصحابك وجيرانك وقرايبك وكل اللي نفسك فيهم عشان هما كمان يباركوا البيعة ويدوك رأيهم
و الف مبروك

يا ريت بقة اللي عندة 131 او ريجاتا او سوفت 94 بحالة كويسة يبعتلي صورهم عشان انا تعبت من التدوير (يفضل مرور المنيا)
يا رب الموضوع يتثبت يا ا/حازم