|
رد: حكايتى مع السيارات-حكايه 10 سنوات
-5-
كان لابد ان أذهب لعملى بعد فتره غياب دامت لما يقرب من اسبوع00 وهذه المره كان لابد وان آخذ سياره مخصوص مهما كلفنى الامر 00وصلت بسلامه الله وكان المفتش بانتظارى وكانت او ل مره ارى مفتش من الاداره فانا مازلت جديد فى العمل ولم أقض ما يزيد على بضعه أيام00 بادرنى الرجل:- -حمد الله على السلامه يادكتور رردت ببراءه: -الله يسلمك -سعادتك الناس اشتكت من عدم وجودك -كان عندى ظروف -احنا اخدناك غياب اليومين اللى فاتوا قالها بصفاقه 00 فرددت ببرود: -مش مهم00 متفرقش قال بحدة: -دا انت مستبيع قلت محتدا: -مش شغلك -طب روح شوف شغلك قالها فاستشاط بى الغضب00 وكنت فى بدايه الاندفاع وثوره الشباب وحدتها مفتقدا حكمه التعامل مع السفهاء والمستفزين00فقلت وانا مستطير من الشطط: -انت بتأمرنى00انا00 ده انت مجرد موظف حقير فى الاداره(وهذه احدى مهازل وزاره الصحه)00قوم من على المكتب ده00انا مدير الوحده هنا00كلمنى وانت واقف انت نسيت نفسك ولا ايه! بهت الرجل وفوجىء00 وانا اتقدم منه لازيحه عن المكتب الجالس عليه لولا ان امسك بى احد الموظفين ومنعنى عنه لحدث ما لا يحمد عقباه00 صرخت: -اخرج بره -يادكتور ح تدفع التمن -تمن ايه يا تافه00 -والله ما اسيبك وح اقوم الدنيا كلها عليك -ح تعمل ايه؟ ح تجيب لى جزا00 فصل؟ تبقى راجل لو عملت كده00طب ده انا اتمنى بره 00 بره وانصرف الرجل ووجهه يتفجر بالدماء من الغضب والحنق فقال لى الموظف: -اول مره اشوف هنا دكتور راجل المفتش ده كرشه واسع00كل مره يهلب ويحمل ويمشى00يعمل شبوره ويخوف الدكتور عشان يهلب ويمشى -ده راجل قليل الادب00 ثم مين اللى اشتكى؟ انا قعدت هنا اسبوع مشفتش الا واحد جه قاس ضغط ومشى00 ده احنا فى حته مقطوعه -ما هو ده عيب وزاره الصحه سعادتك00 اى واحد يتبرع بحته ارض لو فى المريخ لبناء وحده صحيه وتتبنى يجهزوها -ده احنا اقرب بيت لينا على بعد 2كيلو -وهيه دى ناس بتعيه؟ المناعه هنا حديد00 وبعدين فيه عيادتين واكلين البلد -والله انا قرفت00 ربنا ينقم من اللى جابنى الخرابه دى00 واطلع منها على خير وبعد لجظات 00اخيرا جاء مريض! -خير قال الفتى: -رجلى دخل فيها مسمار قلت مازحا: -وطلع ولا انتنى ف رجلك؟ -طلع ورجلى ورمت -بسيطه -ح نطهرها لك وح اكتبلك مضاد حيوى ومسكن00من هنا وحقنه تيتانوس من بره -هوه مفيش هنا تنتوس -لا -امال فاتحينها ليه انصرف الفتى وهو يقول: -بلد بنت 000000 وهكذا مضى اليوم وجاء موعد الانصراف فكلفت احدهم باحضار سياره لاذهب للبيت 00فقال ده صعب فى البلد دلوقتى00 سعادتك اوصلك للطريق وتفرج ومضينا وانا افكر فى حالى وما آل اليه من بهدله فى المجاهل وغلى الفاضى 00 دكتور بمرتب 138 جنيه+حوافز100 جنيه ممكن تتأخر لسته اشهر وتصرف بأثر رجعى والسياره المخصوض تأخذ20جنيه المهم بلغنا الطريق الرئيسى وانتظرنا ساعه وكل سياره تظهر كالشمس الساطعه فى يناير ووسيله الركوب المتاحه الشعبطه! بدا الرجل ينظر فى ساعته فى قلق فأمرته بالانصراف فعزم على بالغداء فاعتذرت وتركنى لاعانى مصيرى المحتوم وحدى يتبع |
رد: حكايتى مع السيارات-حكايه 10 سنوات
متابعه بشوق وشغب للجديد
|
رد: حكايتى مع السيارات-حكايه 10 سنوات
-6-
مر الوقت كئيبا تزحف الدقائق بمنتهى البطء والرتابه والملل 00بدأت اتنفس بصعوبه من فرط الضيق والحنق وانا أدعو على كل مسئول ساهم فى ايفادى الى هذه الجهنم وآخرتها مائين من الجنيهات وفكه00 واخيرا كالحلم الذى كاد ان يضيع ويتلاشى فى غياهب الزمن الرتيب 00لاحت من على البعد سياره تسير كالسلحفاة او كأنها تعرج على قدم مكسوره00 تنفست بعمق يحدونى الامل فى ان تنتهى رحله العذاب اليومى وانا احلم بطعام يرد الجوع وفراش يلتهم ما أحل بالجسد من تعب00 بلغتنى السياره وتوقفت00كانت سياره لا أعتقد ان احدا رآها خارج أفلام الابيض والاسود فى اربعينيات القرن الماضى00!!!!! لايهم 00المهم مقعد وعجل يسير00نعمة !! ركبت السياره الخاليه سوى من شخص يجلس فى المقعد الامامى بادرنى السائق: -ايه اللى حدفك يا أستاذ على البلاد دى؟ -النصيب -انا عارف ايه الطريق المكسر ده؟وايه كل المطبات دى؟ قلت: -ماهم بيجددوه قال منفعلا: -لمين؟ الناس كل واحد يصحى من النوم ميلقيش حاجه يعملها يقول بينا نعمل مطب -وياريتها مطبات دى جبال -العربيه باظت انا لو اعرف كده مكنتش جيت المشوار المهبب ده0 واستغرقت فى كلماته00السائق متضرر لسيارته الخرده من الطريق وانا غير متضرر! لو كان هناك مترددين لمكثت ولكن ان تجلس منفردا لاتمارس مهنه او تسامر صديق او زميل وليس عندك وسيله ترفيه 00 التلفزيون متعطل00 والكمبيوتر من عصر فات ويكا لا يعمل ولايوجد حتى تليفون ولا بنى آدمين سوى من بعض عجائز الموظفين والعمال اصحاب العاهات والممرضات فو ق الخمسين ومن ذوات الاوزان الثقيله00 كل شىء يبعث على الملل والضجر والاكتئاب! ايقظنى سائقنا من تأملاتى وهو يقول للرجل الجالس جواره: -تعرف الناس النهارده حتولع ف نفسها من الغلا وقله الضمير -معاك حق -البلد انقسمت نصين اللى فوق فوق واللى تحت غرقان طين -معاك حق -انا معرفش الناس ساكته ليه -وح يعملوا ايه؟ -يعملوا كتير 00بس الظاهر اننا بنتعاطى حاجه مبرمجه دماغنا ولاغيه لسانا00 والله ان حاسس انهم بيرشوا حاجه ف الجو او ف الميه -ههههههههههه00تفتكر؟ -العالم ف الطراوه ومشيعه -بكره تتعدل - هوه فيه بكره 00ف المشمش 00 ده انا خايف اصحى الاقى العالم ماشيه ملط -مش للدرجه دى -واكتر يا هندسه00 انت مش من هنا ولا ايه؟ والتفت لى : -ايه رأيك يا أستاذ؟ -الاخرس ياخد على دماغه -الله يفتح عليك00 الناس بتخاف00الجبن سيد الاخلاق 00هيه دى النظريه -طب وانت ساكت ليه؟ -ما انا لو اتكلمت ح اروح ورا الشمس ومحدش ح يعرفنى00وبعدين اتكلم عشان مين؟ عشان دول! سيبهم ياخدوا على راسهم00 يستاهلوا وانا بقى اتفرج 0 كان منطقه غريب وكنت اعد الثوانى حتى اصل وارتاح من صداع جاهل ثرثار ووصلنا وماكدت ابلغ المنزل حتى اتصل بى صديقى الفقر وقال بحماس: -لا قيتها00 اشوفك بالليل |
رد: حكايتى مع السيارات-حكايه 10 سنوات
والنبى يا عم الدكتور كمل الحكايه اللطيفه
|
رد: حكايتى مع السيارات-حكايه 10 سنوات
اين الحلقة السابعة .... وشكرا لك على مواضعيك الجميلة
|
| الساعة الآن 06:31 PM. |
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017