مصر موتورز مجتمع السيارات

مصر موتورز مجتمع السيارات (https://www.masrmotors.com/vb/index.php)
-   FIAT Siena (https://www.masrmotors.com/vb/forumdisplay.php?f=235)
-   -   ايه رأيكم في فيات سيينا (https://www.masrmotors.com/vb/showthread.php?t=11711)

sikostar 13-08-2009 06:33 PM

ايه رأيكم في فيات سيينا
 
اخوني الكرام

عمال الف وادور علي عربيات واتفرج
لغاية ما جالي اكتئاب
يمكن عشان بشوف عربيات مضروبة بالنار
ويمكن عشان حدودي السعرية ضعيفة
المهم مش هتعبكوا معايا
انا معروض عليا سيينا 2001 فابريكا برة وجوة 1400 سي سي كاملة مانوال
ممكن تقييم فني للسيارة

وشكرا

sam ram 13-08-2009 07:20 PM

رد: ايه رأيكم في فيات سيينا
 
السيينا ال 1400 كمجمل كويسه
اساسياتها موتور و فتيس ممتاز .. ناعمه جدا و سحبها ممتاز بالرغم انها 1400 سي سي 8 صباب
ثبات متوسط على السرعات لأن اغلب وزن العربيه قدام .. وشنطه طويله
العفشه خفيفه شويه ...

التقفيل مصري طبعا وفيه عيوب التجميع المحلي .. كمثال كاوتش الابواب ممسوك بكلبس بلاستيك ..
قطع الغيار متوفره وموجوده لكن طبعا مش زي الاكسنت او الانوس سواء كتوافر او اسعار
ونفس الكلام بالنسبه للصيانه ..

الشنطه واسعه جدا جدا .. 500 لتر .. لكن على حساب الكنبه .. ضهرها واقف و اللي يقعد ركبه حتكون في ضهر اللي قاعد قدام
العربيه كانت معايا من الزيرو لحد 115 الف .. و كنت مبسوط بيها و الحمد لله ... خصوصا ان معنديش حد كبير يقعد ورايا
كعربيه افضلها عن الانوس و الاكسنت .. لكن من حيث الاسعار و قطع الغيار و سعر اعاده البيع .. الكوري يكسب

الموضوعات دي ممكن تفيد حضرتك اكتر
http://www.masrmotors.com/vb/showthread.php?t=1542

http://www.masrmotors.com/vb/showthread.php?t=5980

sikostar 13-08-2009 08:07 PM

رد: ايه رأيكم في فيات سيينا
 
اخي الكريم sam ram متميز كالعادة
اشكرك بشدة - اشكرك بعنف - اشكرك حتي تستغيث من الشكر
ptmnlo123per159
جزاك الله كل خير

sam ram 13-08-2009 09:34 PM

رد: ايه رأيكم في فيات سيينا
 
العفو يا باشا ... دي حاجه بسيطه ..
مش محتاجه كل التشكرات دي ...
الغوث .. نفس هوا ptmnlo123per1106

sikostar 02-09-2009 10:55 AM

اسئلة بخصوص فيات سيينا
 
السلام عليكم ورحمة الله وبركاته
كل عام واعضاء المنتدي الكرام كلهم بخير

كان عندي مجموعة من الاسئلة بخصوص السيينا - انا لسة جايبها من قريب ومش شاطر فيها قوي
هيا موديل 2001 والسعة الليترية 1400 سي سي

1- في لمبة حمراء في التابلوه بتاعة الانجكشن - المفروض ان الصبح لما ادور العربية اشغل الكونتكت بس لغاية ما اللمبة تطفي بعد كدة ادور العربية - هل الكلام ده صح ولا غلط؟
طيب ما اللمبة دي احيانا بتنور وانا سايق في وسط اليوم وتقعد فترة كبيرة - دا عادي ولا غلط ولو غلط الصح ايه؟؟

2- برضه كنت عرفت ان اول ما ادور العربية لازم استني لغاية مؤشر الحرارة ما يتحرك وكمان مؤشر الـRPM ينزل - لكن مؤشر الـRPM بيبدأ عند 9 ويطلع ويستمر طلوعه لغاية 15 - كل ده وانا بسخن وبستني ينزل مش بينزل - واستنيت 15 دقيقة قبل كدة - بيطلع ومينزلش - دا عيب ولا عادي ولو عيب ممكن يكون من ايه؟

3- كتير قوي بشم ريحة غاز غريبة - مش بنزين ولا عادم - دي حاجة كدة زي النشادر - او الفريون مع العلم اني مش ببقي مشغل التكييف خالص - يعني الرائحة دي موجودة حتي مع عدم تشغيل التكييف؟ حد عارف ايه القصة

4- العربية بتاكل بنزين جامد مووووووووووووت لدرجة اني كنت بحط 92 ونزلت لغاية 90 ومفيش اقل من كدة لاني مش هحطلها 80 ولا بفكر اقلبها غاز - حد عارف دا الطبيعي ولا ايه - مع العلم سواقتي متوسطة من 80 - 100 - لاني بسوق علي الاتوستراد

معلش اسئلة كتيرة - بس ان اشاء الله خير

منتظر الردود

إني احبكم في الله


الساعة الآن 07:23 PM.

Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017